19
පළාත් පාලන මැතිවරණයේ අරලගංවිල පොලිස් වසමේ පොලිස් ජංගම සංචාරයේ යොදවා තිබූ පෞද්ගලික වෑන් රථයකට පෙරේදා (06) රාත්‍රී 10.30ට පමණ වනඅලියකු පහර දීමෙන් එම වෑන් රථයට අලාභහානි සිදු වී ඇති බව අරලගංවිල පොලීසිය පවසයි.
වනඅලියාගේ පහරදීමෙන් වෑන් රථයේ පිටුපස වීදුරුවට අලාභහානි සිදු වී ඇති අතර එම ප්‍රහාරයෙන් වෑන් රථයේ ගමන් ගත් කිසිවකුට හානියක් සිදුව නොමැති බව ද පොලීසිය පවසයි. 
දිඹුලාගල ඇල්ලේවැව වැව් ඉස්මත්තේදී වෑන් රථයට මෙම වනඅලි ප්‍රහාරය එල්ල වී ඇති බව ද පොලීසිය සඳහන් කරයි.
වනඅලියා පහර දෙන විට එම වෑන් රථයේ පොලිස් නිලධාරින් තිදෙනකු සහ සිවිල් ආරක්ෂක භටයන් දෙදෙනකු සිට ඇති අතර, ඒ මොහොතේ වෑන් රථය පදවා ඇත්තේ සිවිල් පුද්ගලයකු විසින් බව ද පොලීසිය සඳහන් කරයි.
