ශ්‍රී ලංකාවේදී මේ දිනවල පැවැත්වෙන කාන්තා තුන්කොන් එක්දින ක්‍රිකට් තරගාවලියේ අවසන් මහා තරගයට සුදුසුකම් ලබා ගැනීමට ශ්‍රී ලංකා කාන්තා පිල සමත් වෙයි. ශ්‍රී ලංකා කාන්තා ක්‍රිකට් පිලක් එලෙස එක්දින ක්‍රිකට් තරගාවලියකදී අවසන් මහා තරගයකට සුදුසුකම් ලැබූ ඉතිහාසයේ පළමු අවස්ථාව මෙහෙයවීම වි‍ශේෂත්වයකි.
කොළඹ ආර්. ප්‍රේමදාස ක්‍රීඩාංගණයේදී ඊයේ පැවති ඉන්දියාව හා දකුණු අප්‍රිකාව අතර තරගයේදී දකුණු අප්‍රිකාව ලකුණු 23ක පරාජයක් ලැබීමත් සමඟ තරග දෙකක් ජය ලබා සිටින ශ්‍රී ලංකාව හා තරග තුනක් ජය ලබාගත් ඉන්දියාව ලබන ඉරිදා (11) පැවැත්වෙන අවසන් මහා තරගයට සුදුසුකම් ලබා ගත්තේය. ශ්‍රී ලංකා කණ්ඩායම හා දකුණු අප්‍රිකාව අතර හෙට (9) මූලික වටයේ තරගයක් ඉතිරිව ඇතත් එහි ප්‍රතිඵලය කුමක් වුවද ශ්‍රී ලංකා කාන්තාවෝ අවසන් මහා තරගයේ දොරටු විවර කරගෙන සිටිති.
ඊයේ පැවති තරගයේ කාසියේ වාසිය දිනාගත් දකුණු අප්‍රිකානු කාන්තා පිල මුලින් පන්දු රැකීමට තීරණය කළ හෙයින් ඉන්දීය ක්‍රීඩිකාවෝ කඩුලු 9ක් බිඳවැටී ලකුණු 337ක් ලබා දැවැන්ත ලකුණු පුවරුවක් නිර්මාණය කළහ. පිළිතුරු ඉනිම ක්‍රීඩා කළ දකුණු අප්‍රිකානු කාන්තා පිල ඕවර 50 නිමා වෙද්දී කඩුලු 7ක් දැවී ලකුණු 314කට සීමා විය. දකුණු අප්‍රිකාවට ජයග්‍රහණය උදෙසා අවසන් ඕවරයේදී ලකුණු 26ක් ලබාගත යුතු වුවද එම ඕවරයේ වාර්තා වූයේ ලකුණු 3ක් පමණි.
ඉන්දියාවේ අංක 4 පිතිකාරිනිය ජෙමීමා රොඩ්‍රිගස් විශිෂ්ට පිතිකරණයක නිරත වෙමින් පන්දු 101කදී ලකුණු 123ක් රැස් කළ අතර, ඇගේ ඉනිමට හතරේ පහර 15ක් සහ හයේ පහරක් ඇතුළත් විය. එය ඇය‍ගේ දෙවැනි ජාත්‍යන්තර එක්දින ශතකය වූ අතර, කාන්තා එක්දින තරගවලදී ඇය රැස් කළ වැඩිම ලකුණු ගණනද වූවාය. රොඩ්‍රිගස් මේ තරගාවලියේ ඉනිම තුනකදී මේ වන විට ලකුණු 201ක් ලබාගෙන පිතිකාරිනියන් අතර ඉදිරියෙන්ම සිටී. ආරම්භක පිතිකාරිනි ශ්‍රීමතී මන්දනා ලකුණු 51ක් රැස් කළ අතර, දීප්ති ෂර්මා පන්දු 84කදී හයේ හා හතරේ 10ක් සමඟ ඉක්මන් ලකුණු 93ක් වාර්තා කළාය.
දකුණු අප්‍රිකා කාන්තා පිලේ අංක 4 පිතිකාරිනි අනෙරී ඩර්ක්සන් පන්දු 80කදී හයේ පහර 2ක් හා හතරේ පහර 5ක් එල්ල කරමින් ලකුණු 81ක් ලබා ගත්තද එය ජයග්‍රහණයට ප්‍රමාණවත් නොවුණි. නායිකා ක්ලෝයි ට්‍රයන් සමඟ එක්ව 6 වැනි කඩුල්ලට පන්දු 60කදී ලකුණු 72ක සබඳතාවක් ගොඩනඟා සිටියදී වේග පන්දු යැවූ අමන්ජොට් කෞර්ගේ පන්දුවක් කෙළින්ම කඩුල්ලේ වැදීමෙන් ඇය දැවී ගියාය. නායිකා ක්ලෝයි ට්‍රයන් පන්දු 43කදී හයේ 5ක් හා හතරේ පහර 4ක් සමඟ ලකුණු 67ක් ලබා ගත්තාය. නදීන් ඩී ක්ලර්ක් නොදැවී ලකුණු 22ක් ලබා ගත්තාය.
ඉන්දීය කාන්තා පිල කඩුලු 9කට ලකුණු 337 (ඕවර 50)
ශ්‍රීමතී මන්දනා 51, හර්මන් ප්‍රීට් කෞර් 28, ජෙමීමා රොඩ්‍රිගස් 123, දීප්ති ෂර්මා 93, රිචා ගෝෂ් 20 (මසබෙටා ක්ලාස් 51/2, නදීන් ඩී ක්ලර්ක් 54/2, නොන්කුලුලෙකෝ 71/2)
දකුණු අප්‍රිකා කාන්තා පිල කඩුලු 7කට ලකුණු 314 (ඕවර 50)
ටස්මින් බ්‍රීට්ස් 26, මියාන් ස්මිට් 39, අනෙරී ඩර්ක්සන් 81, නොන්ඩියුමිසෝ සන්ගාසේ 36, සිනාලෝ ජෆ්ටා 21, ක්ලෝයි ට්‍රයන් 67, නදීන් ඩී ක්ලර්ක් නොදැවී 22, අතිරේක 16 (අමන්ජොට් කෞර් 59/3, දීප්ති ෂර්මා 57/2)
