කොළඹ ඩී.එස්. සේනානායක සහ මහානාම විදුහල් අතර 19 වැනි ‘රන් සටන’ වාර්ෂික මහා ක්‍රිකට් තරගය අද (9) කොළඹ එස්එස්සී ක්‍රීඩාංගණයේදී ආරම්භ වේ.
ජාතික ක්‍රිකට් පිලට මෙන්ම දේශීය ක්‍රිකට් පිටියට ක්‍රීඩකයින් රැසක් දායාද කළ මේ දෙවිදුහල් අතර මහා ක්‍රිකට් තරගය මේ දක්වා දෙදින තරගයක් ලෙස පැවති අතර, මෙවර තරගයේ සිට තෙදින තරගයක් ලෙසින් පැවැත්වෙනු ඇත.
ඩී.එස්.සේනානායක විද්‍යාලය මේ මහා ක්‍රිකට් තරග ඉතිහාසයේ තරගයක් ජය ගනිමින් 1 – 0ක් ලෙස පෙරමුණ ගෙන සිටී. ශ්‍රී ලංකා විස්සයි20 කණ්ඩායම නියෝජනය කරන බිනුර ප්‍රනාන්දුගේ නායකත්වය යටතේ ඩී.එස්. සේනානායක විද්‍යාලය 2014 වසරේදී ඉතිහාසයේ එකම මහා තරගය ජයග්‍රහණය කළේය. මහානාම පිලට මෙතෙක් කිසිදු ජයග්‍රහණයක් වාර්තා කිරීමට නොහැකි විය.
මලිත පෙරේරා මෙවර තරගයේදී කොළඹ ඩී.එස්. සේනානායක විද්‍යාල පිල මෙහෙයවනු ලබන අතර, අනුක විජේවර්ධන කොළඹ මහානාම විද්‍යාල පිල මෙහෙයවයි.
මේ තරගයට සමගාමීව සංවිධාන කරන ‘අරවින්ද ද සිල්වා අභියෝගතා කුසලානය’ සඳහා වන එක්දින ක්‍රිකට් තරගය මේ මස 18 වන දින එස්එස්සී ක්‍රීඩාංගණයේදීම පැවැත්වීමට නියමිතය.
