8
ජාතික ඩෙංගු මදුරු මර්දන සතිය ලෙස මේ මස 19 වැනිදා සිට 24 වැනිදා දක්වා වූ කාලය ප්‍රකාශයට පත් කර ඇතැයි ජාතික ඩෙංගු මර්දන වැඩසටහනේ අධ්‍යක්ෂ විශේෂඥ වෛද්‍ය සුදත් සමරවීර මහතා “දිනමිණ”ට ඊයේ (13) පැවසීය.
දිස්ත්‍රික්ක 15ක ඩෙංගු අවදානම සහිත සෞඛ්‍ය වෛද්‍ය නිලධාරී කොට්ඨාස 95ක් ඉලක්ක කරමින් මෙම සතිය තුළදී ඩෙංගු මර්දන වැඩසටහන් ක්‍රියාත්මක කරන බව ද ඒ මහතා පැවසුවේය.
සෞඛ්‍ය කාර්ය මණ්ඩලය, ත්‍රිවිධ හමුදාව ඇතුළු පොලීසිය, ජනතාව යනාදි සියලුදෙනා එක්ව මෙම මර්දන වැඩසටහන් ක්‍රියාත්මක කරන බව ද ඒ මහතා පැවසුවේය.
මෙම වර්ෂයේ ආරම්භයේ සිට පෙරේදා (12) දක්වා ඩෙංගු ආසාදිතයන් 19,724ක් වාර්තා වී ඇති බවත් මැයි මාසයේ මෙතෙක් ආසාදිතයන් 2000කට වැඩි පිරිසක් වාර්තා වී ඇති බවත් ඒ මහතා ප්‍රකාශ කළේය.
