සුන්බුන් එකතුවක් රටේ ජනවරමට අභියෝග කරන්නේ කෙසේදැයි ජනාධිපති අනුර කුමාර දිසානායක මහතා ප්‍රශ්න කර සිටියි.
ජනාධිපතිවරයා එසේ ප්‍රකාශ කළේ ඊයේ (14) කොළඹ විහාරමහාදේවි එළිමහන් රංග පීඨයේ පැවැති ජනතා විමුක්ති පෙරමුණේ 60 වැනි සංවත්සරයට සහභාගි වෙමිණි. මෙහිදී ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා, ඇමැති විජිත හේරත් මහත්වරුන් සහ එහි සාමාජික, සාමාජිකාවෝ රැසක් ද අදහස් දැක්වූහ. විදෙස්ගතව සිටින ජනතා විමුක්ති පෙරමුණේ සාමාජික, සාමාජිකාවෝ ද මෙම අවස්ථාව සඳහා අන්තර්ජාලය හරහා සම්බන්ධ වූහ.
මෙහිදී තවදුරටත් ජනාධිපතිවරයා මෙසේද පැවසීය.
ජනවරම හොඳට තේරුම් ගත යුතුයි. සභා 152ක් අපි ආරම්භයේදීම පිහිටුවනවා. ඉතුරු 115 පිහිටුවන දවසේ පිහිටුවනවා. එයට අකුල් හෙළන්න, බාධා කරන්න එනවා නම් නීතියේ ඕනෑ තරම් ඉඩකඩ තිබෙනවා. අපි සෑමවිටම ජනවරමට ගරු කරනවා. ජනවරමට එරෙහිව කවුරුන් හෝ කටයුතු කරනවා නම් ව්‍යවස්ථාව, නීතිය, දේශපාලනය මේ සියල්ලන්ගෙන් අප වැඩ කරන්න ලැහැස්තියි. හදල පුළුවන් නම් මාස කීපයක් යන්න. ජනවරමට තමයි අප ගරු කරන්නේ. නීති මදිනම් තුනෙන් දෙකක් තියෙනවා.
පළමු කොටම අපි ඇයි මේ ඉතිහාසය සිහිපත් කරන්නේ. අපි ආණ්ඩු බලය අත්පත් කරගෙන තිබෙනවා. එම යටගිය ඉතිහාසය ඇයි අපිට වර්තමානයේදී අවශ්‍ය වෙන්නේ. ඇතැම් විට “සහෝදරයා ඒ ගැන නම් වැඩිය කථා කරන්න එපා” කියා තැන තැන මුමුනන්නත් ඉඩ තිබෙනවා. බොහෝ දෙනා අපේක්ෂා කරනවා ඒ ඉතිහාසය ඉතිහාසයට උරුම කර වර්තමානය අලුත් පරිච්ඡේදයකින් ආරම්භ කරන්න පුළුවන් වේවි කියා. මම දන්නවා සමහර කවයන් ඒ ඉතිහාසය අමතක කරමින් අපිත් එක්ක ඉන්න ලැහැස්තියි. එහෙත් අපට එම ඉතිහාසය අමතක කොට අලුත් පරිච්ඡේදයක් අලුත් අනාගතයක් නිර්මාණය කරන්න හැකියාවක් නොවෙන බව අපි විශ්වාස කරනවා.
මෙම වර්තමානය තේරුම් ගැනීම සඳහා අපිට එම ඉතිහාසය අවශ්‍යයි. අද මේ මොහොත අපිට තේරුම් ගැනීම සඳහා එම ඉතිහාසය අවශ්‍යයි. අනාගතයේ අවම වරද්දා ගැනීම් කරමින් අනාගතය ගොඩනැංවීම සඳහා අපිට එම ඉතිහාසට ඉවහල් කරගත හැකියි. මොකද කුමන ඉතිහාසයක්වත් වැරදීම්වලින් තොරව නිර්මාණය වන්නේ නැහැ. ඒ නිසාම අපිට තිබෙන්නේ නව පරිච්ඡේදයක් නෙවෙයි, අපිට තිබෙන්නේ අඛණ්ඩ ඉතිහාසයක අඛණ්ඩ පරිච්ඡේදයක්. කවර හෝ කෙනෙක් කුමන හෝ ආකාරයෙන් මෙය සියල්ලන්ගෙන් වියුක්ත කොට නව පරිච්ඡේදයක් ලෙස ලිවීමට උත්සාහ කරනවා නම් ඒ තුළ තිබෙන්නේ කුහකත්වයයි. ඒ වගේම අතීතයට තිබෙන බියයි. අපි මේ නව පරිච්ඡේදයක ලියමින් තිබෙන්නේ ඉතිහාසයේ අඛණ්ඩතාවයි. එම අඛණ්ඩතාවයම අලුත් පරිච්ඡේදයක්ම මිස අඛණ්ඩතාවයෙන් ගිලිහුණු හා විතැන් වූ පරිච්ඡේදයක් නොවන බව හැම දෙනාම තේරුම්ගත යුතුයි.
වේදනාවෙන් පිරි ඉතිහාසයක් අපිට තිබෙනවා. ශාරීරික වශයෙන් සහ මානසික වශයෙන් අතිශය වේදනාවට ලක්වූ ඉතිහාසයක් තිබෙනවා. මා දන්නවා එම ඉතිහාසය සමඟ අඛණ්ඩ සම්බන්ධතාවක් තිබෙන
බොහෝ සහෝදර සහෝදරියන් මෙහි සිටිනවා, එයින් බොහෝ දෙනෙක් එක් දිනයකදී හෝ ඉකිගසා හඬා තිබෙනවා. මමත් එහෙමයි. වැඩකරන විට මුහුණ දෙන දුෂ්කරතාවන් පමණක් නොව, මහා සංවිධානාත්මක හා ප්‍රචණ්ඩකාරී ප්‍රවාහයක් තමන් ඉදිරියට පැමිණෙන විට ඊට මුහුණ දීම අතිශය දුෂ්කර ව්‍යායාමයක්. ඒ නිසා ඉතිහාසයේ වේදනාවන් තිබෙනවා, දුෂ්කරතාවන් තිබෙනවා.
පොදු මහජනයාගේ වුවමනා වෙනුවෙන් සියල්ල අත්හැරීමට සහ කැපකිරීමට සූදානම් වූ ඉතිහාසයක් අපිට තිබෙනවා. අපේ සහෝදර සහෝදරියන් වසර ගණනාවක් සිරගත කර තිබුණා. දුෂ්කරතාවන්ට මුහුණ දී, වද හිංසා හුදකලා කිරීම් සියල්ලට මුහුණ දී තිබෙනවා. ඒ විතරක්ද අපි දරුණු පන්නයේ පරාජයන්ට මුහුණ දුන්නා. අපි අවට සිටි අය අපිට අහිමිවන පන්නයේ පරාජයන්ට අපි මුහුණ දුන්නා.
අපේ ව්‍යාපාරය ගොඩනැඟීමට උර දුන් රෝහණ විජේවීර සහෝදරයා ඇතුළු කණ්ඩායම අපිට අහිමි කිරීමේ පන්නයේ පරාජයන්, අපේ සමීපතමයන් අපේ දෑස් ඉදිරිපිට මියයන මට්ටමේ පරාජයන්ට අපි මුහුණ දී තිබෙනවා. එම ඉතිහාසය එවැනි පරාජයන්ගෙන්ද ගැබ් වී තිබෙනවා. එම ඉතිහාසය පාවා දීම්වලින් ගැබ් වී තිබෙනවා. තමන් සමඟ එකට සටන් කරන කෙනා, තව විටක ඊට එරෙහිව පාවා දෙන්නන්ගේ භූමිකාවට පණ පොවනවා. අදත් අපි එය දකිනවා. ජනතා විමුක්ති පෙරමුණ නොතිබෙන්න අනිත් දේශපාලන කඳවුරක පාපිස්සටවත් නොගන්නා අය මාර වීර චරිත බවට පත් වෙනවා. අද යළි ඒවා වෙනුවෙන් හඬලන තත්ත්වයට පත්වී තිබෙනවා. පසුගිය බටලන්ද වාර්තාව පිළිබද සාකච්ඡාවේදී 88, 89 ඊට එරෙහිව එකට සිටි අය රූපවාහිනියට ගොස් බටලන්ද සිදුවීම සාධාරණීකරණය කරනවා අපි ඇස්වලින් දකිනවා, කන්වලින් අහනවා. මේ ඉතිහාසය අපිට එහෙම දේවල් ඉතුරු කර තිබෙනවා. මේ ඉතිහාසයේ කුමන්ත්‍රණ අපි අත්දැක තිබෙනවා. මෑත දශකයේත් අපි කුමන්ත්‍රණ අත්දැක තිබෙනවා.ඒ නිසා මේ ඉතිහාසය වේදනාව, දුෂ්කරතාව, ඔරොත්තු දීම, කැපකිරීම, කුමන්ත්‍රණ පාවාදීම්, පරාජයන්, හා ජයග්‍රහණයන් ඒ හා සමාන ලෙසම අපි දැක තිබෙනවා.
ඒ නිසා එවැනි ඉතිහාසයක් මොනතරම් සංකීර්ණ ඉතිහාසයක් ද?. අපට අපේ ඉතිහාසය පරිච්ඡේද කිහිපයකට කඩන්න පුළුවන්. 65-71 ඉතිහාසයේ පරිච්ඡේදයක්. 71- 78 ඉතිහාසයේ තවත් පරිච්ඡේදයක්. 78-83, 83-89 , 89-94 ඉතිහාසයේ තවත් පරිච්ඡේද ලෙස දක්වන්න පුළුවන්. 94- 2024 සැප්තැම්බර් මාසයේ 21 තව පරිච්ඡේදයක්. සැප්තැම්බර් මාසයේ 21- අද තව පරිච්ඡේදයක්. මේ ආකාරයේ පරිච්ඡේද ගණනාවක් අප ගතකර තිබෙනවා.
60 වසරක විවිධ පරිච්ඡේද හා සිදුවීම් මේ සියල්ල එකට ගොතා තිබෙන මෙවලම මොකක්ද? මා හිතනවා ප්‍රධාන සාරයන් 03ක් තිබෙනවා. එක හෘද සාක්ෂිය. දෙක එඩිතරභාවය. තුන ව්‍යවහාරික බුද්ධිය. මේ වසර 60 මුළුල්ලේම විවිධ උච්චාවචනයන් , පරාජයන්, ජයග්‍රහණ, පාවාදීම් මේ සියල්ල තිබියදී එක් මහා පොදු සාධක කිහිපයක් තිබෙනවා. මම කියනවා අනාගතයටත් අපිට මඟපෙන්වන්නේ අන් කවරක්වත් නෙවෙයි හෘද සාක්ෂිය. එඩිතරභාවය සහ ව්‍යවහාරික බුද්ධියයි.
මා හිතනවා ශරීරවලින්, පවුල් පසුබිම්වලින් මහා ප්‍රතාපවත් ඉතිහාසයේ බලව්‍යුහයන් තුළ මහා සැණකෙළි පෙන්වූ ඒ හැම දෙනාටම වඩා කුඩා මිනිසුන් වන අප ළඟ තිබෙන හෘද සාක්ෂිය තුළින් ඔවුන්ට වඩා ගව් ගණනක් ඉදිරියෙන් අපි ඉන්නවා. දුෂ්කරතා විසින් විතරක් නෙවෙයි තනතුරු, ඒවායින් ලැබෙන ආලෝකය, ඒවාට ජනතාව දක්වන ප්‍රතිචාර, සාම්ප්‍රදායික ආයතනික ව්‍යුහයන් , එම තනතුරුවලට දක්වන ප්‍රතිචාර යන සියල්ලගෙන්ම හෘද සාක්ෂිය බිඳවට්ටන්න පුළුවන්. එහෙත් මතක තබා ගන්න, අපි මේ රටේ පොදු ජනතාවට සහතිකයක් දෙනවා ඉතිහාසය ද, අද ද, හෙට ද අපි අපේ හෘද සක්ෂිය අනුව වැඩ කරන මිනිස්සු. කටුක දුෂ්කරතාවන් හමුවේ හෝ පරිභෝජනවාදී දුෂ්කරතා හමුවේ හෝ පාවා දෙන්නේ නැති, අත් හරින්නේ නැති හෘද සාක්ෂියක් සමඟ වැඩ කරනවා. මේක තමයි අපේ 60 වසරක ඉතිහාසයේ අඛණ්ඩතාව. එය අපි ආරක්ෂා කරනවා. ඊට අප වගකියනවා. ඊට අපි බැඳී ඉන්නවා.
දෙක එඩිතරභාවය. එඩිතරභාවය කියන්නේ කුමක්ද?. එඩිතරභාවය කියන්නේ ඇඟේ හයිය විතරක් නෙවෙයි. ඇඟේ හයියත් එඩිතරභාවයේ ලක්ෂණයක්. හැබැයි මා මේ එඩිතරභාවය කියන්නේ ඇඟේ හයිය නෙවෙයි. ව්‍යාපාරයක්. 60 වසරක් ලංකා දේශපාලන ඉතිහාසයේ කිසිදු දේශපාලන ව්‍යාපාරයක් මුහුණ නොදුන් අතිශය විනාශකාරී අත්දැකීම්වලින් ගැබ් වෙලා, මම හිතනවා ලෝක ව්‍යාපාරයෙත් එහෙමයි. අතිශය දුෂ්කරතාවන්ට මුහුණ දී එහෙත් මේක ආරක්ෂා කරනවා. අද වනවිට මොකක්ද වෙලා තිබෙන්නේ? . අනෙක් සතුරු කඳවුරු සියල්ල සුනු විසුනු කොට විනාශ කොට දමන තරමට මේ ව්‍යාපාරය ශක්තිමත්භාවයට ගෙනවිත් තිබෙනවා. ඒ පිටුපස තිබෙනවා එඩිතරභාවය.
එය මේ අඛණ්ඩ ඉතිහාසයේ පැවැත්මට ප්‍රධාන සාධකයක්. නැත්නම් මේ ව්‍යාපාරය අත්හරින්න, නතර වෙන්න මොන තරම් අවස්ථා තිබිලා තියෙනව ද? මේ මව්බිමේ එහෙම ව්‍යාපාරයක් තිබෙනවා නම් ඒ ජනතා විමුක්ති පෙරමුණ පමණක් බව මතක තබාගන්න. සාමාන්‍යයෙන් අප අත්දකින්නේ නැතුව, අප ඒ කතාව ඇතුළේ ජීවත් වෙන්නේ නැතුව පිටස්තරයෙක් ලෙස අප පොතක ඒ කතාව කියෙව්වොත් එය කිසිවෙක් විශ්වාස කරන කතාවක් නෙවෙයි. ඒ තරමට ජයග්‍රහණය පිළිබඳ විශ්වාසය බිඳවට්ටන්නේ නැතුව මේ ව්‍යාපාරය 60 වසරක් ගමන් කර තිබෙනවා. ඒ තුළ තිබෙන එක් ප්‍රධාන සාරය එඩිතරභාවයයි. ආ ගමන්මඟ නිශ්චිත දේශපාලනයකදී ඒ ගමන්මඟ හැරවීම සඳහා එඩිතරභාවය. ඒවා සාමාන්‍ය දේශපාලන ව්‍යාපරවලට කරන්න බැහැ. ජයග්‍රහණය වෙනුවෙන් වැඩ කරන්න අපි එඩිතරයි. අඛණ්ඩ ඉතිහාසයේ පැවැත්මේ ප්‍රධාන සාධකයක්. මේ 60 වසරක දේශපාලන ගමන්මඟේ ජයග්‍රහණයේ කොඩිය අප අතට ගන්න විට, අපට අත්හැර යන්නට අවස්ථා විශාල ප්‍රමාණයක් තිබුණා. නිහඬ විය යුතු අවස්ථා විශාල ප්‍රමාණයක් තිබුණා. අපේ දේශපාලන ව්‍යාපාරය නමක් ලෙස පමණක් ඉතිහාසගත වීමට ඕනෑ තරම් සන්ධිස්ථාන තිබී තිබෙනවා. හැබැයි, ඒ සියලු සන්ධිස්ථාන හමුවේත් අද මේ ජයග්‍රහණය සඳහා ගෙන එන්න එඩිතරභාවය ඉතාමත් ප්‍රබල සාධකයක්. ඒ උරුමය, ඉතිහාසය තිබෙන්නේ ජවිපෙ අපට පමණයි. අපේ සතුරන් අපට වඩා හොඳින් තේරුම් අරන් තිබෙනවා. ඒ ගණන් ගත යුතු නැහැ.
ව්‍යවහාරික බුද්ධිය ඊළඟ වැදගත් සාධකයයි. අප අධ්‍යයනය කරලා, සංකල්ප ගොඩනඟලා, පොතපත හදාරලා, ලෝකයේ සිදුවීම් අත්දැකීම් ලෙස එකතු කරලා ඇති. නමුත් ඒවා ඒ නිශ්චිත මොහොතේ ව්‍යවහාරයට නැඟීම තමයි වැදගත් වන්නේ. බොහෝ සංකල්ප රචනා කරන්න පුළුවන්, හැබැයි ව්‍යවහාරික බුද්ධිය ඊට වඩා ප්‍රධාන සාධකයක්. සංකල්පවලින්, පොත පතෙන්, අත්දැකීම්වලින් එකතු කර ගන්න බැහැ. ඒ ඒ මොහොතට අනුරූප වන පරිදි නිවැරදිම තීන්දු තීරණ ගැනීම ව්‍යවහාරික බුද්ධියයි. එය අපේ දේශපාලන ව්‍යාපාරයේ අඛණ්ඩතාව රඳා පවතින ප්‍රධාන සාධකයක්.
හොඳ ශක්තිමත් ව්‍යාපාරයක් ගොඩනඟන්නේ, අපේ ව්‍යාපාරයේ සාරය හෘද සාක්ෂිය, එඩිතරභාවය, ව්‍යවහාරික බුද්ධියයි. නැවත නැවත අපිව ජීවත් කරවන්නේ මේ සාරයයි. ඕනෑම අභියෝගයකට මුහුණ දිය හැකියි කියන විශ්වාසය ගොඩනඟන්නේ මේ සාරය තමයි. කුමන පරාජයන් හමුවේ හෝ ජයග්‍රහණය පිළිබඳ විශ්වාසය අත්නොහරින්නේ මේ සාරය නිසා තමයි. මේ සාරය පිහිටුවන්නේ කුමක් මතද? අපි අපිව ජනතාව උරගා බලනවා. අපි ජනතාවට උරගා බලන්න විවෘත ව්‍යාපාරයක් බවට පත්විය යුතුයි. හොඳ නරක නිරීක්ෂණය කරන්න ඕන. එනිසා අපි සතුරන් හමුවේ නොව, පාවාදෙන්නන් හමුවේ නොව, සෑම විටම පොදු ජනතාව හමුවේ පරීක්ෂණයට භාජනය වෙන්න කැමැති ව්‍යාපාරයක්. අප සාරය මත, ජනතාව මත ගොඩනැඟෙන ව්‍යාපාරයක්. ජනාධිපතිවරණය, මහමැතිවරණය අත්හරින්න. පසුගිය මැතිවරණයේදී මහා අනුහස් සහිත නායකයන් බිහි කළ මැදමුලන කොට්ඨාසයත් අප හමුවේ පරාදයි. කොළඹ නගරාධිපති අපේක්ෂකයෙක් වීම සඳහා තරග වැදුණු බොරැල්ල දකුණ කොට්ඨාසය අපේ පොඩි සහෝදරියකට පරාදයි. ඉතාමත් ශක්තිමත්ව ජනතාව මත මේ ව්‍යාපාරය පිහිටුවා තිබෙනවා.
අස්සක් මුල්ලක් නෑර, විහිදුණු ජනතාවගේ පදනම සහිත දේශපාලන ව්‍යපාරය ජාතික ජන බලවේගය පමණයි. අනික් අය විවිධාංගීකරණයට ලක් වූ විපක්ෂයයි. විවිධාංගීකරණ විපක්ෂය එකතු වුවහොත් විවිධාංගීකරණය වෙලා ලද ප්‍රතිඵලයවත් ලැබෙන්නේ නැහැ. ඒ අය බෙදිලා ඡන්දය ඉල්ලලා, සභාව පිහිටුවන්න එකතු වෙන්න හදනවා. මොන ලැජ්ජා නැති වැඩක්ද. ඔවුන් එකතු වෙලා ඡන්දය ඉල්ලන්න ලෑස්ති නම් අපි කුමන හෝ ඡන්දයක් තියනවා එකතු වෙලා වැඩ කරමු. විවිධාංගීකරණය වූ විපක්ෂය එක කණ්ඩායමක් ලෙසත්, ජාතික ජන බලවේගය තවත් කණ්ඩායමක් ලෙසත් කඳවුරු දෙකකට බෙදමු. නමුත් හෙටත් මේ රටේ ජනතාවගේ පවුරු පදනම් සහිත ව්‍යාපාරය ජාතික ජන බලවේගය පමණයි. මේක ආපසු හරවන්න කාටවත් බැහැ. ඇතැමුන් එක සභාවක්වත් දිනන්නේ නැතුව ඊළඟ ජනපති වෙන්න හදනවා. පුස් ව්‍යාපාරවලට රටේ බලය ගන්න හිතන්නවත් එපා. ඔවුන්ට ජනතාවගේ ධනය හොරාකෑ, මාධ්‍යවේදීන් ඝාතනය කළ, පුරවැසියන්ගේ අයිතිවාසිකම් කප්පාදු කළ, ජාතිවාදය වැපිරූ ඉතිහාසයේ සාරයක් තමයි ඔවුන්ට තිබෙන්නේ. මේ සාරයට පුළුවන්ද විප්ලව කරන්න.
අපට ජනතාවගේ විශාලතම බලයක් තිබෙනවා. අපට සිතන්නේ නැති ඡන්දදායකයන්ගෙන් වැඩක් නැහැ. අපට අවශ්‍ය අනුගත වන ඡන්දදායකයෙක් නොව, ප්‍රතිචාර දක්වන, විරෝධය දක්වන ඡන්දදායකයෙක්. ඒ සියල්ල කරන විට අවසන් සටනේ අපිව ආරක්ෂා කරන ඡන්දදායකයෙක් අපට අවශ්‍යයි. තීරණාත්මක මොහොතේ හරි බල කඳවුර තෝරා නිවැරදි තීන්දු තීරණ ගන්නා ඡන්දදායකයෙක් අපට අවශ්‍යයි. ප්‍රතිචාර දක්වන, විරෝධය දක්වන ඡන්දදායකයෙක් නොමැතිව මේ ව්‍යාපාරය ඉදිරියට ගෙන යන්න බැහැ. අනුගත සාමාජිකත්වයෙන්, අනුගත ඡන්දදායකයන්ගෙන් විනාශකාරීත්වයට ඇදගෙන යන්න පුළුවන්. හැබැයි යහපත් දේ කැඳවා ගෙන යන්න නම්, සිතන, ප්‍රතිචාර දක්වන, විරෝධය දක්වන, තීරණාත්මක මොහොතේදී අපිව ආරක්ෂා කරන ඡන්දදායකයෙක් තමයි අපට ඉන්නේ. අපි නැවත නැවත ජනතාව කියන උරගලේ උරගා බැලිය යුතුයි. නිද්‍රාශීලි අනුගත වන සාමාජිකයාගෙන් රටක පරිවර්තන ඇති කරන්න බැහැ.
අවුරුදු පනස් නවයකට වඩා අපි ගත කළේ බලය ලබා ගැනීමට පොර බදපු ඉතිහාසයකයි. අපි රෑ දවල්, නිවාඩු දින කිසිවක් සැලකිල්ලට භාජනය නොකර හෘද සාක්ෂියට එකඟව මේ රට පත්වෙලා තිබෙන විපත්තියෙන් බේරා ගැනීමට කටයුතු කළා. අප මෙය අත්හරින්නේ නැහැ. අපිට වැරදෙන්නේ වචනයක් දෙකක්. ඒ වචනවලට දෙන අර්ථකථන පමණයි. අපිට මේ අලුත් පරිච්ඡේදයක්. අප වැඩ කරමින් ඉගෙන ගන්නවා. ඉගෙන ගනිමින් වැඩ කරනවා. අප ආණ්ඩු බලය හෙබවීම සඳහා පුරුදු පුහුණු වූ කණ්ඩායමක් නෙවෙයි. බලය ලබා ගැනීම සඳහා දිගු ඉතිහාසයක් පුරා පොර බදලා අපි මෙතැනට පැමිණ තිබෙන්නේ. අප රටටත් ජනතාවටත් අසීමිත ආදරයෙන් මෙතනට පැමිණියේ. ඒ නිසා අප වැඩ කරමින් ඉගෙන ගන්නවා. ඉගෙන ගනිමින් වැඩ කරනවා. අපි සෑමවිටම කටයුතු කරන්නේ හෘද සාක්ෂියට අනුවයි.
ලංකා ඉතිහාසයේ පළමු වතාවට ආණ්ඩුවක් ගොඩනැඟී තිබෙනවා හෘද සාක්ෂිය සමඟ ජනතාව සමඟ වැඩකරන ආණ්ඩුවක්. අපට ව්‍යවස්ථාවෙන් බැඳීම් තිබෙනවා. අණ පනත්වලින් බැඳී සිටිනවා. ඒවා සංශෝධනය කළ හැකියි. තුනෙන් දෙකක් තියෙනවා. නමුත් අපි තුළ ඇත්තේ නීතියෙන්, ව්‍යවස්ථාවෙන් තිබෙන බැඳීමක් නෙවෙයි. මේ රටේ ජනතාව සමඟ අපි හෘද සාක්ෂියෙන් බැඳී සිටිනවා. මේ රට ගොඩනැඟීම වෙනුවෙන් අපට තිබෙන අසීමිත ආසාව හෘද සාක්ෂියේ විමසමින් කටයුතු කරනවා.
සමහරු කියනවා පේනවා මදි කියා, බයවෙන්න එපා. මම කලින්ම කීවා එඩිතරභාවය කියන්නේ ඇගේ හයිය නොවන බව. විධායක බලය තිබෙනවා. පාර්ලිමේන්තුවේ තුනෙන් දෙකක් තිබෙනවා. නියමිත තැන, නියමිත හැරවීමේ තීන්දුව ගන්න අපි කටයුතු කරනවා. නියමිත තැන නියමිත දිශාවට ගෙන යන්න අප එඩිතර වෙනවා. අපේ එඩිතර භාවය බලයේ බලවත් භාවය ඇඟෙන් මනින්න එපා. අද තියෙන්නේ ඇඟේ දේශපාලනය නොවෙයි. නිශ්චිත තැනදී පැකිළීමකින් තොරව නිසි තීරණ ගැනීමට එඩිතරභාවය මේ පක්ෂයට තියෙනවා. මේ ආණ්ඩුවට එඩිතරභාවයක් තිබෙනවා. සමහර දේ තව සති දෙක තුනක් යනකොට බලා ගන්න. අපේ ව්‍යාපාරය අපේ ආණ්ඩුව එක්ක විපක්ෂය අලගු තබන්නවත් සුදුසු නැහැ. අපි ව්‍යවහාරික බුද්ධියෙන් කටයුතු කරනවා. අප විසින්ම ගොඩනඟා තිබෙන සංකල්ප මත හිර වෙයි කියලා විපක්ෂය සිතුවා. ඒ නිසා ඩොලරය ඉහළ යයි ,තෙල් පෝලිම් ඇති වෙයි කියා බලාපොරොත්තුවෙන් සිටියා. අපි ව්‍යවහාරික බුද්ධියෙන් පෝෂණය වු දේශපාලන ව්‍යාපාරයක් නිසා එසේ වැරදුනේ නැහැ.
අපි පසුගිය සැප්තැම්බර් 21 වෙනිදා බලය ගන්න විට කිව්වා මාස තුනෙන් ආණ්ඩුව වැටෙනවා කියලා. දැන් කියනවා උඳුවප් මාසෙ ජනාධිපති කෙනෙක්ව පත් කරනවා කියලා. අපේ ආණ්ඩුකරණය යනු විශ්මිත ක්‍රියාමාර්ගවලින් සමන්විත ක්‍රියාවලියක්. අප ඉදිරියේ තිබෙන දේශපාලන ව්‍යාපාරය ළදරු, අපරිණත, හිස් ව්‍යාපාරයක්. මේ මාතෘ භූමිය අභියෝගවලින් මුදා ගැනීමට සාර්ථකව කටයුතු කරන ව්‍යාපාරය ජාතික ජන බලවේගය ප්‍රමුඛ ආණ්ඩුවයි.
මාධ්‍ය නාළිකා විශාල චිත්‍ර පෙන්වා ඇතැමුන් ස්වයංමෝහනයට ලක් කර තිබෙනවා. දැන් අපට ජුනි දෙවෙනිදායින් පසුව ගමේ බලය ලැබෙනවා. ජන වරම හොඳට තේරුම් ගත යුතුයි. සභා 152ක් අපි ආරම්භයේදීම පිහිටුවනවා. ඉතුරු 115 පිහිටුවන දවසේ පිහිටුවනවා. සභාව පිහිටුවීමට පොර බදින්න දීපු පළමුවැනි කණ්ඩායම සහ දෙවෙනි කණ්ඩායමටයි ජනතාව මනාපය ලබා දී තිබෙන්නේ. ඒ නිසා එය ලබාගත් කණ්ඩායමට සභා පිහිටුවීමට අයිතියක් තිබෙනවා. එයට අකුල් හෙළන්න, බාධා කරන්න එනවා නම් නීතියේ ඕනෑ තරම් ඉඩකඩ තිබෙනවා. අපි සෑම විටම ජනවරමට ගරු කරනවා. මේ පළාත් පාලන මැතිවරණ ප්‍රතිඵලය මහ මැතිවරණයට යොදා බැලුවත් පාර්ලිමේන්තුවේ මන්ත්‍රීවරු එකසිය විසිදෙකක් ඉන්නවා. ඒ නිසා මෙවර ජයග්‍රහණය ලැබූ සියලු පළාත් පාලන ආයතනවල බලය පිහිටුවන්න අපි සූදානම්. එයට අභියෝග කරනවා නම් අපි අභියෝගය භාරගන්න සූදානම්. අපිට තිබෙනවා හෘදසාක්ෂියේ බලය, අපිට තිබෙනවා එඩිතරබවේ බලය. අපිට තිබෙනවා ව්‍යාහාරිකබවේ බලය. පාර්ලිමේන්තු අණපනත්වල බලය. ඒ නිසා මේ අවස්ථාව අපි අත් නොහැර කටයුතු කරනවා. ඒ සඳහා අප සියලු දෙනාට ආරාධනා කරනවා.
ඡායාරූප – චින්තක කුමාරසිංහ, රංජිත් අසංක සහ චන්න ජයවර්ධන
