නැඟෙනහිර ගාසා තීරයට එල්ල වූ ඊශ්‍රායල ගුවන් ප්‍රහාර මාලාවකින් පලස්තීනුවන් 53 දෙනකු ජීවිතක්ෂයට පත්වූ බවත්, ඉන් 22 දෙනකුම දරුවන් බවත් විදෙස් මාධ්‍ය වාර්තා කරයි. නැඟෙනහිර ගාසා තීරයේ ජබේලියා නුවර ඉලක්ක කරමින් එල්ල කළ එම ගුවන් ප්‍රහාරයෙන් සරණාගත කඳවුරු හා නිවාස රැසක් විනාශයට පත්වූ බවද විදෙස් මාධ්‍ය වැඩිදුරටත් වාර්තා කරයි.
ප්‍රහාරය සම්බන්ධව නිවේදනයක් නිකුත් කරමින් ඊශ්‍රායල හමුදාව ප්‍රකාශ කර ඇත්තේ පලස්තීන සන්නද්ධ කණ්ඩායමක් විසින් ඊශ්‍රායලයට එල්ල කළ රොකට් ප්‍රහාරයකට ප්‍රතිචාර දක්වමින් ගුවන් ප්‍රහාරය එල්ල කළ බවය. ප්‍රහාරයට පෙර නිවාසවලින් ඉවත්වන ලෙස පලස්තීනුවන් දැනුම්වත් කළ බවත් ඊශ්‍රායල හමුදාව සඳහන් කර ඇතැයි වාර්තා වේ.
ඊශ්‍රායල ගුවන් ප්‍රහාරය එල්ල වී ඇත්තේ ගාසා තීරයේ ජන සංහාරය නැවැත්වීමට පියවර ගන්නා ලෙස එක්සත් ජාතීන්ගේ සංවිධානයේ මානව හිමිකම් ප්‍රධානි ටොම් ෆ්ලෙචර් ආරක්ෂක කවුන්සිලයෙන් ඉල්ලා සිටීමෙන් පසුව බවද වාර්තා වේ.
