රැඳවුම් නියෝග පරිදි බන්ධනාගාරගත කර සිටින නඳුන් චින්තක වික්‍රමරත්න හෙවත් Òහරක් කටාÓ නමැත්තාගේ රෝග තත්ත්වය සම්බන්ධයෙන් තංගල්ල ප්‍රදේශය භාර වෛද්‍යවරයාගෙන් හෝ ඔහු විසින් නම් කරන වෛද්‍යවරයකු ලවා පරීක්ෂා කර අධිකරණයට වාර්තාවක් සපයන ලෙස කොළඹ මහාධිකරණ විනිසුරු සුජීව නිශ්ශංක මහතා ත්‍රස්ත මර්දන කොට්ඨාසයේ අධ්‍යක්ෂවරයාට ඊයේ (14දා) නියෝග කළේය.
අර්ශස් රෝගය ඇතුළු රෝග කිහිපයකින් තමා පෙළෙන නමුත් බන්ධනාගාරය තුළදී ඒ සඳහා තමාට අවශ්‍ය වෛද්‍ය ප්‍රතිකාර නොලැබෙන බවට විත්ති කූඩුවේ සිට ප්‍රකාශයක් කළේය.
එම කරුණ කෙරෙහි අවධානය යොමු කළ අධිකරණය විත්තිකරුවකුට වෛද්‍ය ප්‍රතිකාර ලැබීමට අයිතියක් ඇති බව පවසමින් ඉහත නියෝගය කළේය.
අපරාධ පරීක්ෂණ දෙපාර්තමේන්තුව භාරයේ සිටියදී පලායෑමට කුමන්ත්‍රණය කිරීමේ චෝදනාවට හරක් කටා ඇතුළු විත්තිකරුවන් තිදෙනකුට මෙම නඩුව ගොනුකර තිබේ.
නඩුවේ 3 වැනි විත්තිකරු වන එල්ලංගොඩ මද්දුමගේ දිනේෂ් තරංග නමැත්තා ලබන 28දා දක්වා රක්ෂිත බන්ධනාගාරගත කිරීමට හා 2 වැනි විත්තිකාර හිටපු පොලිස් කොස්තාපල් මුනිපාලගේ රවිදු සංදීප ගුණසේකර නමැත්තාගේ රැඳවුම් නියෝගය ලබන 22දා අවසන් වීමට නියමිත බැවින් එදින අධිකරණයට ඉදිරිපත් කරන ලෙසද නියෝග කළේය.
එහිදී 2 වැනි විත්තිකරු වෙනුවෙන් පෙනීසිටි නීතිඥ ජාලිය සමරසිංහ මහතා කරුණු දක්වමින් සිය සේවාදායකයා මේ වනවිට වසර කිහිපයක් රැඳවුම් නියෝග අනුව රඳවා සිටින බවත් විත්තිකරුට එරෙහිව පවරා ඇති නඩුවට මුහුණදීමට දීර්ඝ කාලයක සිට බලාපොරොත්තුව සිටින බවත් කියා සිටියේය. එබැවින් මීළඟ නඩු දින ඔහු වෙනුවෙන් ඇප අයඳුමක් ඉදිරිපත් කිරීමට බලාපොරොත්තු වන බව ද කියා සිටියේය.
Òහරක් කටාÓ වෙනුවෙන් පෙනී සිටි ජනාධිපති නීතිඥ කපිල වෛද්‍යරත්න මහතා කරුණු දක්වමින් සිය සේවාදායකයා වෙනුවෙන් ද එදින ඇප අයදුමක් ඉදිරිපත් කිරීමට අදහස් කරන බව කියා සිටියේය.
රජයේ අධිනීතිඥ සචින්ත බණ්ඩාර මහතා නීතිපතිවරයා වෙනුවෙන් ඒ් සම්බන්ධයෙන් බලවත් ලෙස විරෝධය දැක්වූවේය.
නීතිපතිවරයා වෙනුවෙන් රජයේ අධිනීතිඥ සචින්ත බණ්ඩාර පැමිණිල්ල මෙහෙයවීය. සංජය ආරියදාස, අමිලා උදයාංගනී, බුද්ධික චන්ද්‍රසේකර, පුබුදු රන්දිම, නදිශ සුරංග යන නීතිඥවරු විත්තිය වෙනුවෙන් පෙනී සිටියහ.
නඩු විභාගය අවසන් වීමෙන් පසු පොලිස් විශේෂ කාර්ය බළකායේ දැඩි ආරක්ෂාව යටතේ විත්තිකරු තංගල්ල පැරණි බන්ධනාගාරයට රැගෙන ගියේය. ඒ යන අතර තුර විත්තිකරු එහි රැඳී සිටි මාධ්‍ය අමතමින් හිටපු මහජන ආරක්ෂක ඇමැතිවරයකු සහ පොලිස්පතිවරයකු තමන්ගෙන් රුපියල් කෝටි 30ක කප්පමක් ඉල්ලා සිටි බවත් එය ලබා නොදීම නිසා තමන්ට නඩු පවරා ඇති බවටත් අන්දෝලනාත්මක ප්‍රකාශයක් කළේය.
