සේවකයකු වශයෙන් සිටි පරිගණක ක්‍රියාකරුවකුගේ යටිබඩ ප්‍රදේශයට පා පහරක් එල්ල කර බරපතළ ලෙස පහරදීමක් සම්බන්ධයෙන් අත්අඩංගුවට ගැනීමට සොයමින් සිටි ආන්දෝලනාත්මක පහේ ශිෂ්‍යත්ව පන්ති ගුරුවරිය අධිකරණයට ඊයේ භාර වීමෙන් අනතුරුව රුපියල් ලක්ෂ දහය බැගින් වූ ශරීර ඇප දෙකක් මත මුදා හැරීමට මීගමුව අතිරේක මහේස්ත්‍රාත් දර්ශිමා ප්‍රේමරත්න මහත්මිය නියෝග කළාය.
මෙලෙස ඇප මත මුදා හැරියේ ශිෂ්‍යත්ව උපකාරක පන්ති ගුරුවරියක වන හයේෂිකා ප්‍රනාන්දු හෙවත් ‘ටීචර් අම්මා’ නමැත්තියයි.
ඊයේ (14) දහවල් 12.00ට පමණ නඩුව ආරම්භ වූ අවස්ථාවේදී පැමිණිල්ල වෙනුවෙන් අධිකරණයට කරුණු ඉදිරිපත් කළ කටාන පොලීසිය සඳහන් කළේ මෙම සිද්ධියේ ප්‍රධාන සැකකාරිය මෙතෙක් සොයා ගැනීමට නොහැකිව ඇති අතර ඇය පදිංචි නිවෙස අත්හැර පලාගොස් ඇති බවයි.
නඩුව ආරම්භ වී විනාඩි විස්සක් පමණ ගත වන විට සැකකාරිය සුදු සාරියකින් සැරසී මුව ආවරණයක් ද පැලඳ අධිකරණ ශාලාවට ඇතුළු වූවාය. එහිදී සැකකාරිය වෙනුවෙන් අධිකරණයේ පෙනීසිටි ජනාධිපති නීතිඥ අනුජ ප්‍රේමරත්න මහතා විසින් ඇයව අධිකරණයට ඉදිරිපත් කළේය. එහිදී ඇය විත්තිකුඩුවට නැග්ගාය.
ජනාධිපති නීතිඥ අනුජ ප්‍රේමරත්න මහතා ඇය වෙනුවෙන් ඇප ඉල්ලා සිටි අතර ඇගේ සැමියා සහ කළමනාකරු වෙනුවෙන් ජනාධිපති නීතිඥ කාලිංග ඉන්දතිස්ස මහතා ඇප ඉල්ලා සිටියේය.
සැකකරුවන් වෙනුවෙන් අධිකරණයේ පෙනී සිටි ජනාධිපති නීතිඥවරු කියා සිටියේ මෙම නඩුව සමථ මණ්ඩලයට ඉදිරිපත් කළ යුතු නඩුවක් වන බවය.
එහිදී මෙම සිද්ධියට ආධාර අනුබල දීම සහ සිද්ධිය වීඩියෝගත කර එම සාක්ෂි සැඟවීම සම්බන්ධයෙන් ගුරුවරියගේ ආයතනයේ සේවය කරන ඩිලාන්, මලීෂ යන පුද්ගලයන් දෙදෙනකුද සැකකරුවන් ලෙස නම් කර අධිකරණයට ඉදිරිපත් කළේය.
එහිදී ජනාධිපති නීතිඥවරු දෙදෙනා ඇතුළුව නීතිඥ මණ්ඩලයක් එම සැකකරුවන් පස්දෙනා වෙනුවෙන් දීර්ඝව කරුණු දක්වමින් ඇප ඉල්ලා සිටියේය.
ඉදිරිපත් වූ සියලු කරුණු සලකා බැලූ අතිරේක මහේස්ත්‍රාත්වරිය සැකකරුවන් පස්දෙනා ලක්ෂ දහය බැගින් වූ ශරීර ඇප දෙකක් මත මුදාහැරීමට නියෝග කළාය.
ඒ, අනුව මෙලෙස ඇප නියම වූයේ හයේශිකා ප්‍රනාන්දු, සැමියා චානක විශ්වජිත්, කළමනාකරු ප්‍රනිත් සුරෙන්ද්‍ර, ඩිලාන්, මලිෂ යන අයටය.
