රජයට අයවිය යුතු වැට් බදු සහ ආදායම් බදු වසර තුනක් (2017, 2019, 2020) නොගෙවා රජයට රුපියල් කෝටි හතකට ආසන්න මුදලක් පැහැර හැර අධිකරණය මඟහැර සිටියදී වරෙන්තු නිකුත් කර තිබූ ග්‍රීන් ලංකා සමාගමේ අධ්‍යක්ෂකවරියක් ඇපමත මුදාහැරීමට කොළඹ අතිරේක මහේස්ත්‍රාත් බණ්ඩාර ඉලංගසිංහ මහතා ඊයේ (14) නියෝග කළේය.
වසර ගණනාවක් වරෙන්තු මත අධිකරණය මඟහැරීමෙන් සිටි අධ්‍යක්ෂකවරිය පොලීසිය මඟින් මහත් පරිශ්‍රමයක් දරා අත්අඩංගුවට ගනු ලැබුවේ විශ්‍රාමික ප්‍රභූවරයකුගේ නිවසේ සිටියදී පසුගිය සිකුරාදා රාත්‍රියේ බව දේශීය ආදායම් දෙපාර්තමේන්තුව වෙනුවෙන් පෙනී සිටි නීතිඥ දිනේෂ් පෙරේරා මහතා සඳහන් කළේය.
මෙම සැකකාරිය සෙනසුරාදා කොටුව අධිකරණයට ඉදිරිපත් කිරීමෙන් අනතුරුව ඊයේ දින තෙක් රක්ෂිත බන්ධනාගාරගත කර තිබූ බව ද නීතිඥ දිනේෂ් පෙරේරා මහතා සඳහන් කළේය. මෙම සමාගම් සමූහයේ අධ්‍යක්ෂකවරුන්ට එරෙහිව වැට් ආදායම් බදු සහ එන්.බී.ටී. හිඟ බදු මුදල් අයකර ගැනීමට 2017/19/20 වර්ෂවලදී ආදායම් බදු දෙපාර්තමේන්තුව විසින් කොළඹ අතිරේක මහේස්ත්‍රාත් අධිකරණය ඉදිරියේ මෙම නඩුව පවරා පවරා තිබුණි.
