පස්වැනි ජෝර්ජ් රජු විසින් සන්නස් පත්‍රයකින් තෑගි ලෙස ලබාදී තිබූ ඉඩමකට ව්‍යාජ ඔප්පුවක් සකසා අයිතිය ලබාගැනීමට උත්සාහ කළැයි කුරුණෑගල කොට්ඨාස පොලිස් වංචා විමර්ශන අංශය මඟින් අත්අඩංගුවට ගත් ව්‍යාපාරික කාන්තාවක් රුපියල් ලක්ෂ පහ බැගින්වූ ශරීර ඇප දෙකක් මත මුදා හැරීමට කුරුණෑගල අතිරේක මහේස්ත්‍රාත් තිළිණ කෞශල්‍ය මහතා ඊයේ (14) නියම කළේය.
මෙලෙස ඇප මත මුදා හැරුණේ පොල්ගහවෙල, වත්තේගෙදර ප්‍රදේශයේ පදිංචි හැත්තෑදෙහැවිරිදි කාන්තාවකි.
කුරුණෑගල වඳුරාගල පදිංචිව සිට දැනට මියගොස් ඇති රාජගුරු මුදියන්සේලාගේ කිරිබණ්ඩා යන අයට 1926 වසරේදී පස්වැනි ජෝර්ජ් රජු විසින් සන්නස් පත්‍රයකින් ප්‍රදානය කරන ලද ඉඩමකට ව්‍යාජ ඔප්පුවක් සකස්කර ඇති බව පොලීසිය සඳහන් කරයි.
කුරුණෑගල හංහමුණව ප්‍රදේශයේ ඇති හිරියල්පොල වත්ත යන අක්කර නවයහමාරක් පමණ විශාල මෙම ඉඩමෙන් නොබෙදූ කොටසකට කූට ලේඛන සකස් කොට තෑගි ඔප්පුවක් මඟින් චුදිත කාන්තාවගේ දියණියකට 2015 වර්ෂයේදී පවරා දී ඇති බව කුරුණෑගල කොට්ඨාස වංචා විමර්ශන ඒකකය විසින් කරන ලද පොලිස් විමර්ශනවලින් අනාවරණය කරගෙන තිබේ.
ඉඩමේ හිමිකරු මිය යෑමෙන් පසු ඔහුගේ එකම දියණිය වන අමරා පද්මිණි හුණුකුඹුර යන අයට පිය උරුමයෙන් හිමිව තිබූ එම ඉඩම ඇය තම පුතකුට 2013 වසරේ තෑගි ඔප්පුවකින් පවරා දී ඇත. එම කාන්තාව මේ වනවිට 92 වියෙහි පසුවන්නීය.
එසේ මවගෙන් තෑගි ඔප්පුවකින් නීත්‍යනුකූලව ලබාදී තිබූ එම ඉඩම ඔහු වැල්ලව මකුල්වැව පදිංචි අයකුට 2022 වසරේදී විකුණා ඇත.
ඒ අනුව එම ඉඩමේ වර්තමාන නීත්‍යනුකූල හිමිකරු ඉඩමට යනවිට කූටලේඛන සකසා ඉඩම අත්පත් කරගැනීමට කටයුතු කරමින් සිටි කාන්තාව හා අයගේ සැමියා ඉඩමේ අයිතිය සම්බන්ධයෙන් බාධා කිරීම හේතුවෙන් එහි නීත්‍යනුකූල හිමිකරු ඒ පිළිබඳව කුරුණෑගල කොට්ඨාස වංචා විමර්ශන ඒකකය වෙත පැමිණිලි කර ඇත.
ඒ අනුව කරන ලද දීර්ඝ විමර්ශනයකින් අනතුරුව අදාළ ඉඩමේ හිමිකාරීත්වය වංචනිකව ලබාගැනීමට කටයුතු කර ඇති බවට අනාවරණය වීම හේතුවෙන් ව්‍යාපාරික කාන්තාවට එරෙහිව කූට ලේඛන සැකසීම ඇතුළු චෝදනා 3ක් යටතේ නඩු පැවරීමට පොලීසිය කටයුතු කර ඇත.
කුරුණෑගල කොට්ඨාස භාර ජෙෂ්ඨ පොලිස් අධිකාරී චන්දන හේරත්ගේ උපදෙස් මත කුරුණෑගල කොට්ඨාස වංචා විමර්ශන ඒකකයේ ස්ථානාධිපති පොලිස් පරීක්ෂක සමන් විජේබණ්ඩාරගේ මූලිකත්වයෙන් පොලිස් පරීක්ෂක රත්නායකගේ මෙහෙයවීමෙන් පැමිණිල්ල අධිකරණයට ඉදිරිපත් කළහ.
