පොලොන්නරුව සිරිපුර ප්‍රදේශයේ පොහොර ගබඩාවක් පවත්වාගෙන යමින් නයිට්‍රජන් අඩු ප්‍රමාණයක් ඇති මිල අඩු පොහොර, නයිට්‍රජන් වැඩි පොහොර ලෙස නැවත අසුරා වැඩි මිලට අලෙවි කිරීමේ මහා පරිමාණ ජාවාරමක් හෙළි කරගත් පොලොන්නරුව කොට්ඨාස අපරාධ විමර්ශන කාර්යාංශයේ නිලධාරීන් මෙම ජාවාරමට සම්බන්ධ සැකකරුවන් දෙළොස් දෙනකු ඊයේ (14) අත්අඩංගුවට ගෙන ඇත.
පොලොන්නරුව සිරිපුර ප්‍රදේශයේ පොහොර ගබඩාවක් පවත්වාගෙන යමින් මෙම ජාවාරම කාලයක් තිස්සේ කරගෙන ගොස් ඇති බව විමර්ශනවලින් පෙනී ගොස් තිබේ.
සැකකරුවන් සමඟ එසේ මිල වෙනස් කළ පොහොර මිටි දහදාහකට ආසන්න ප්‍රමාණයක් මෙන්ම පොහොර පටවා තිබූ ලොරි හතරක් සහ තවත් උපකරණ තොගයක් ද අත්අඩංගුවට ගත් බව පොලීසිය කියයි.
නයිට්‍රජන් සියයට විසි එකක් පවතින පොහොර ඉතා අඩු මිලට ගෙනැවිත්, සියයට හතළිස් හයක් නයිට්‍රජන් පවතින බවට ව්‍යාජ ලෙස සකසා ඒවා පොහොර බෑග්වලට ඇසුරුම් කර ගොවීන්ට වැඩි මිලට අලෙවි කිරීම මෙම මධ්‍යස්ථානය තුළ සිදු කර ඇතැයි ද පොලීසිය පවසයි.
මෙම ජාවාරම් සිදු කරන ප්‍රධාන සැකකරු ප්‍රදේශයෙන් පලා ගොස් ඇති අතර, එම පොහොර මිශ්‍ර කරමින් සිටි සේවකයන් එකොළොස් දෙනකු ද මෙම වැටලීමේදී අත්අඩංගුවට ගත් බව පොලීසිය කියයි. ඒ අතර මෙම ස්ථානයේ කළමනාකරු ද සිටි අතර ඔහු ඇඹිලිපිටියේ පදිංචිකරුවෙකි.
පොහොර ඇසුරුම් කරමින් සිටි සේවකයන් එකොළොස් දෙනාම මඩකලපුව සන්ධිවේලි ප්‍රදේශයේ පදිංචිකරුවන් බව ද පොලීසිය පවසයි.
වැඩි මිල සටහන් කරන ලද හිස් පොහොර මලු දෙදහසකට ආසන්න සංඛ්‍යාවක් සහ පොහොර බෑග් මහන මැෂින්, වැඩි මිල සටහන් කරන යන්ත්‍ර සූත්‍ර කිහිපයක් ද අත්අඩංගුවට ගත් බව පොලීසිය සඳහන් කරයි.
මෙම ජාවාරම කරගෙන ගිය ප්‍රධාන සැකකරු පෞද්ගලික පොහොර සමාගමකින් නයිට්‍රජන් අඩු ප්‍රමාණයක් ඇති කිලෝ පනහේ පොහොර මිටියක් රුපියල් 5000ක් වැනි මිලකට ගන්නා බව අනාවරණය වී තිබේ. නයිට්‍රජන් ප්‍රමාණය වැඩි අගයක් දක්වන මලුවල මෙම පොහොර ඇසුරුම් කර අරලගංවිල, සිරිපුර, වැලිකන්ද ඇතුළු පොලොන්නරු දිස්ත්‍රික්කය පුරා ගොවීන්ට සහ අලෙවි නියෝජිතයන්ට බෙදාහැර ඇති බවට හෙළිව ඇතැයි ද පොලීසිය කියයි. එම පොහොර අලෙවි කර ඇත්තේ නයිට්‍රජන් අඩු පොහොර මිටියක මිලට වඩා දෙතුන්ගුණයක් වැඩි මිලට බව සඳහන්ය.
වැඩි නයිට්‍රජන් ප්‍රමාණයක් තිබෙන බවට ව්‍යාජ සටහන් කරන ලද පොහොර ලබාගන්නා ගොවීන් එම පොහොර, වී වගාවට යෙදුවද ඔවුන් යොදා ඇත්තේ සියයට විසි එකක් පමණ පවතින නයිට්‍රජන් පොහොරය.
පොලොන්නරුව දිස්ත්‍රික්කයේ විශාල බිම් ප්‍රමාණයක වී වගාවට යල මහ දෙකන්නයේ බොහෝ ගොවීන් පිරිසක් කාලයක සිට යොදා ඇත්තේ මෙම ජාවාරම්කරුවාගෙන් ගත් පොහොර බවට හෙළිව ඇතැයි පොලීසිය කියයි. එම පොහොර යොදන ගොයම කහ පැහැගැන්වී අස්වැන්න අඩු වන බවත් මේ නිසා පොලොන්නරුවේ ගොවිබිම්වලින් අපේක්ෂිත වී ඇස්වැන්න කාලයක සිට නොලැබී ඇති බව පෙනී යන බවත් පොලීසිය සඳහන් කරයි.
මෙම මහා පරිමාණ ජාවාරම සිදු කිරීම සඳහා ප්‍රධාන සැකකරු සමඟ තවත් බලවත් කිහිපදෙනකු සම්බන්ධ වී ඇති බවට සැක කරන බව පොලොන්නරුව කොට්ඨාස අපරාධ විමර්ශන අංශය සඳහන් කරයි.
මෙම පොහොර ගබඩාව පරීක්ෂා කිරීමට නිවාස සංවර්ධන නියෝජ්‍ය අමාත්‍ය, ටී.බී. සරත් මහතා ඇතුළු කණ්ඩායමක් ද පැමිණ තිබිණි. එහිදී ගබඩාව ආසන්නයේ ගෙවතු දෙකක සඟවා තිබූ වාහන තුනක් ඇතුළුව තවත් ලේබල් ගැසූ විවිධ වර්ගයේ පොහොර මලු විශාල ප්‍රමාණයක් සොයා ගැනීමට හැකි වූ බව පොලොන්නරුව කොට්ඨාස විමර්ශන අංශය සඳහන් කරයි.
පොලොන්නරුව ජ්‍යෙෂ්ඨ පොලිස් අධිකාරී නිශාන් ද සිල්වා මහතාගේ උපදෙස් මත, වැලිකන්ද ප්‍රදේශය භාර සහකාර පොලිස් අධිකාරි එම්.එස්.එම්. ජරූල් මහතාගේ මැදිහත්වීමෙන්, පොලොන්නරුව කොට්ඨාස විමර්ශන අංශයේ ස්ථානාධිපති ප්‍රධාන පොලිස් පරීක්ෂක ජේ.පී.ආර්.කේ. ජාගොඩගේ මහතාගේ සහ පොලිස් පරීක්ෂක ඒ.ටී. බණ්ඩාර යන මහත්වරුන්ගේ මෙහෙයවීමෙන් පොලිස් සැරයන්වරුන් වන (42229) රංග, (61580) චමින්ද, (71995) චන්ද්‍රසේන, පොලිස් කොස්තාපල්වරුන් වන (82748) සඳකැළුම්, (34968) නිශ්ශංක, (88883) ලක්ෂාන් යන නිලධාරීහු මෙම වැටලීමට එක් වූහ.
