ප්‍රමිතියෙන් තොර කාබනික පොහොර නැවක් මෙරටට ආනයනය කිරීම සම්බන්ධයෙන් තමන්ව අල්ලස් කොමිසම මඟින් අත්අඩංගුවට ගැනීමට පෙර අපේක්ෂිත ඇපයක් මත මුදාහරින ලෙස ඉල්ලා හිටපු කෘෂිකර්ම ඇමැති මහින්දානන්ද අලුත්ගමගේ මහතා ඉදිරිපත් කළ ඇප අයදුම්පත ලබන 19 වැනිදා සලකා බැලීමට කොළඹ ප්‍රධාන මහේස්ත්‍රාත් තනුජා ලක්මාලි මහත්මිය ඊයේ (14) නියම කළාය.
රජයට අමෙරිකානු ඩොලර් මිලියන හයයි දශම බිංදුවයි නවයක (6.09) පාඩුවක් සිදු කරමින් මීට වසර හතරකට පෙර (2021) චීනයේ සමාගමකින් මෙරටට ගෙන්වන ලද ප්‍රමිතියට අනුකූල නොවන කාබනික පොහොර තොගයකට අදාළව අත්හිටුවා තිබූ ණයවර ලිපි විවෘත කිරීමට අදාළ විමර්ශනය සම්බන්ධයෙන් කරුණු දැක්වීමට අල්ලස් කොමිසමට නොතීසි නිකුත් කරන ලෙසට ද මහේස්ත්‍රාත්වරිය නියෝග කළාය. සිද්ධියට අදාළව තමා අත්අඩංගුවට නොගන්නා ලෙස ඉල්ලා හිටපු කෘෂිකර්ම ඇමැති මහින්දානන්ද අලුත්ගමගේ මහතා ඊයේ අපේක්ෂිත ඇප ඉල්ලුමක් කොළඹ ප්‍රධාන මහේස්ත්‍රාත්වරිය හමුවේ ගොනු කර තිබිණි. ඒ අනුව ඊයේ පැමිණිල්ල කැඳවූ අවස්ථාවේ මහින්දානන්ද අලුත්ගමගේ මහතා වෙනුවෙන් පෙනී සිටි නීතිඥවරුන් පවසා සිටියේ, මෙම අපේක්ෂිත ඇපය සම්බන්ධයෙන් කරුණු දැක්වීමට ජනාධිපති නීතිඥ කාලිංග ඉන්දතිස්ස මහතා බලාපොරොත්තුවෙන් සිටින බවයි.
ඒ අනුව ඒ සඳහා සිකුරාදා දින ලබා දෙන ලෙස නීතිඥවරු අධිකරණයෙන් ඉල්ලා සිටියහ. ඊට පිළිතුරු දෙමින් මහේස්ත්‍රාත්වරිය පැවසුවේ හෙට සහ සිකුරාදා දින කැඳවීමට දින නියමව ඇති නඩු බොහොමයක් ඇති බවත් එම නිසා මෙම නඩුව සම්බන්ධයෙන් එළැඹෙන සඳුදා දින අධිකරණය හමුවේ කරුණු දක්වන ලෙසයි. ඒ අනුව පෙත්සම සම්බන්ධයෙන් කරුණු දැක්වීමට එදිනට දින නියම කළ මහේස්ත්‍රාත්වරිය මෙම ඉල්ලීම සම්බන්ධයෙන් කරුණු දක්වන ලෙස දන්වා අල්ලස් කොමිසමට නොතීසි නිකුත් කළාය.
