හිටපු ජනපති ගෝඨාභය රාජපක්ෂ පාලන සමයේදී ඉඩම් ප්‍රතිසංස්කරණ කොමිෂන් සභාවෙන් රුපියල් මිලියන හත්සියයක වියදමින් කාබනික පොහොර ව්‍යාපෘතියක් ආරම්භ කිරීමට 2021දී ඇමැති මණ්ඩල පත්‍රිකාවක් යොමු කළත් ඒ සඳහා කිසිදු ශක්‍යතා අධ්‍යයනයක් සිදු කර නොමැති බව පොදු ව්‍යාපාර පිළිබඳ පාර්ලිමේන්තු කාරක සභාවේදී අනාවරණය වී ඇත.
මේ ඇමැති මණ්ඩල පත්‍රිකාව සකස් කිරීමට ඉඩම් ප්‍රතිසංස්කරණ කොමිෂන් සභාවේ නිලධාරීන් මැදිහත්වීමක් සිදු කර නොමැති බව එම කොමිෂන් සභාවේ නිලධාරීන් පොදු ව්‍යාපාර පිළිබඳ කාරක සභාව හමුවේ ප්‍රකාශ කර තිබේ.
ඉඩම් ප්‍රතිසංස්කරණ කොමිෂන් සභාවේ 2022 සහ 2023 වර්ෂ සඳහා වූ විගණකාධිපති වාර්තා සහ වර්තමාන කාර්යසාධනය පරීක්ෂා කිරීමට පොදු ව්‍යාපාර පිළිබඳ කාරක සභාව (කෝප්) එහි සභාපති, පාර්ලිමේන්තු මන්ත්‍රී, වෛද්‍ය නිශාන්ත සමරවීර මහතාගේ සභාපතීත්වයෙන් පසුගියදා පාර්ලිමේන්තු සංකීර්ණයේදී රැස්වූ අවස්ථාවේදී මේ බව අනාවරණය වී ඇත.
මේ ව්‍යාපෘතිය සඳහා රුපියල් මිලියන 700ක් ඇමැති මණ්ඩල පත්‍රිකාවකින් අනුමත කරගෙන තිබුණත් ඉඩම් ප්‍රතිසංස්කරණ කොමිෂන් සභාවෙන් ඒ සඳහා රුපියල් මිලියන 350ක් නිදහස් කර තිබූ බව කාරක සභාවේ සභාපති, පාර්ලිමේන්තු මන්ත්‍රී නිශාන්ත සමරවීර මහතා පැවැසීය. එයින් රුපියල් මිලියන 302ක් වියදම් කර තිබූ බවත්, ආදායම් ලෙස ව්‍යාපෘතියෙන් රුපියල් මිලියන 22ක් පමණක් ලැබී තිබූ බවත් වැඩිදුරටත් කරුණු දක්වමින් කාරක සභාවේ සභාපතිවරයා සඳහන් කළේය.
මෙහිදී කාරක සභාව හමුවේ කරුණු දක්වමින් ඉඩම් ප්‍රතිසංස්කරණ කොමිෂන් සභාවේ නීති හා මුදල් අධ්‍යක්ෂවරු මේ කාබනික පොහොර ව්‍යාපෘතිය සඳහා මුදල් ලබාදීම කොමිෂන් සභා පනතට පටහැණි බවට ලිඛිතව නිරීක්ෂණ දී තිබූ බව පැවසූහ.
කෙසේ වෙතත් අමාත්‍යාංශ මට්ටමින් තමන් වෙත ලැබෙන නියෝග ප්‍රතික්ෂේප කිරීමට නොහැකි බැවින් මුදල් නිදහස් කිරීමට කටයුතු කළ බව ඉඩම් ප්‍රතිසංස්කරණ කොමිෂන් සභාවේ මුදල් අධ්‍යක්ෂවරයා මෙහිදී සඳහන් කර ඇත. මේ කාබනික පොහොර ව්‍යාපෘතියට මුදල් අනුමත කිරීම කොමිෂන් සභා පනතට පටහැණි බවට නිරීක්ෂණ ලබාදීම හේතුවෙන් තමන්ට පීඩා සිදු කළ බව කොමිෂන් සභාවේ නීති අධ්‍යක්ෂවරයා කෝප් කමිටුවට පැවසුවේය.
දිවයිනේ ස්ථාන 35ක මේ කාබනික පොහොර නිෂ්පාදනය ආරම්හ කිරීම සඳහා මෙලෙස මුදල් දී තිබුණත් මේ වනවිට ස්ථාන පහක ඒ සඳහා ඉදිකළ ගොඩනැඟිලි කිසිදු ප්‍රයෝජනයක් නොගෙන පවතින බව ද කාරක සභාවේදී අනාවරණය විය.
මෙහිදී අදහස් දැක්වූ කාරක සභා සභාපතිවරයා මේ අසාර්ථක වූ කාබනික පොහොර ව්‍යාපෘතියෙන් මූල්‍ය වංචාවක් සිදුව තිබේ ද නැද්ද යන්න පිළිබඳ පරීක්ෂණ පැවැත්වීම සම්බන්ධව අල්ලස් හෝ දුෂණ චෝදනා විමර්ශන කොමිෂන් සභාවට සහ අදාළ නීතිමය කටයුතු සඳහා අදාළ ආයතන වෙත පැමිණිලි කරන බව සඳහන් කළේය. කෙසේ වෙතත් මේ සම්බන්ධයෙන් කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය පරීක්ෂණයක් මේ වනවිට ආරම්භ කර ඇති බව ද එම අමාත්‍යංශයේ ලේකම්වරයා වැඩිදුරටත් පැවසුවේය.
මේ අතර කළමනාකරණ සේවා දෙපාර්තමේන්තුවේ අනුමැතියකින් තොරව ආවරණ අනුමැතියට යටත්ව යැයි සඳහන් කරමින් සේවකයන් සඳහා ස්ථිර නව පත්වීම් ලබා දීම පිළිබඳව ද කාරක සභාවේදී දීර්ඝ ලෙස සාකච්ඡා කෙරිණි.
මේ කාරක සභා රැස්වීම සඳහා පාර්ලිමේන්තු මන්ත්‍රීවරුන් වන නලින් බණ්ඩාර ජයමහ, චමින්ද වි‍ජේසිරි, නීතිඥ සමන්මලී ගුණසිංහ, සුදත් බලගල්ල, වෛද්‍ය එස්. ශ්‍රී බවානන්දරාජා, ජගත් මනුවර්ණ, සුනිල් රාජපක්ෂ, ධර්මප්‍රිය විජේසිංහ, අසිත නිරෝෂණ එගොඩ විතාන, තිළිණ සමරකෝන්, චන්දිම හෙට්ටිආරච්චි, දිනේෂ් හේමන්ත , ලක්මාලි හේමචන්ද්‍ර මහත්ම මහත්මීහු සහභාගි වූහ.
