“සුදු මහත්තයා සා.පෙළ විභාගේ ප්‍රැක්ටිකල් එක කරලා අයේ එනවා කියලා ගියේ. රෑ 11.30ට විතර බස් එකට නැග්ගේ. පාන්දර 4ට විතර කෝල් එකක් ගත්තා. නුවරට කිට්ටුවෙලා ඉන්නේ කියලා කිව්වා. ඊට පස්සේ කෝල් ගත්තට ෆෝන් එක වැඩ කළේ නෑ. උදේ වෙනකොට ආරංචියක් ආවා කතරගම ඉඳලා කුරුණෑගල ගිය බස් එක පෙරළිලා කියලා. අපිට හිතුණා පුතාටත් කරදරයක්වත් වෙලාද දන්නෙ නෑ කියලා. ඒ ගමන අපි වෑන් එකක් අරගෙන නුවර ගියා” යැයි නුවරඑළිය ගම්පොළ ප්‍රධාන මාර්ගයේ ගැර‍ඬිඇල්ල ප්‍රදේශයේ බස් අනතුරින් මරණයට පත්වූ අශේන් මෙනුක කෞෂාන් පාසල් සිසුවාගේ ලොකු අම්මා හැඬූ කඳුළින් කීවාය. තෙලුල්ල ජනපදය ඇතිලිවැව ලිපිනයේ පදිංචි අශේන් මෙනුක කෞෂාන් කුඩා කල සිට හැදී වැඩී ඇත්තේ ඔහුගේ අත්තම්මා හා සීයා ඇතුළු පවුලේ ඥාතීන් සමඟිනි. තෙලුල්ල ජනපද විද්‍යාලයෙන් මූලික අධ්‍යාපනය හැදෑරූ ඔහු සාමාන්‍ය ෙපළ හැදෑරීම සඳහා ඇතුළත් වී ඇත්තේ නුවර පාසලකටය. ඔහුගේ මව නුවර ප්‍රදේශයේ රැකියාවක් කරන අතර අශේන්, ඇය සමඟ බෝඩිමක ජීවත් වෙමින් සාමාන්‍ය පෙළ විභාගයේ පළමු කඩඉම නිමා කළේ ඉකුත් අප්‍රේල් මාසයේදීය. විභාගය නිමා වුවත් එහි ප්‍රායෝගික කොටස කරන්නට තිබුණේ ඉකුත් 11 වැනිදාය. ඒ සඳහා අශේන් නුවර එන්නට මෙම බස් රථයට ගොඩවී තිබුණේ රාත්‍රී 11.30ට පමණය. ඒ වැල්ලවාය – තණමල්විල මාර්ගයේ තෙලුල්ල ජනපදයෙනි. සිය පුත්‍ර‍යා සම්බන්ධයෙන් ඔහුගේ ලොකු අම්මා වන එස්. ඒ. අනුලාවතී මහත්මිය මෙසේ ද කියා සිටියාය.
“අපේ සුදු මහත්තයා හරියටම හතරහමාරට විතර කෝල් එකක් අරගෙන කිව්වා. ‘දැන්නම් නුවරට කිට්ටුයි වගේ කොහෙද කියලා කියන්න දන්නේනම් නෑ. බස් එකේ සෙනඟ ගොඩයි. නුවරින් බැහැලා කෝල් එකක් ගන්නම්” කියලා කිව්වා.
ඊට පස්සේ පුතාගේ ෆෝන් එක වැඩ කළේ නෑ. අපි කෝල් ගත්තා, ගත්තා ෆෝන් එක ඕෆ් වෙලා තිබුණේ. ඒ වෙනකොට පාන්දර හයට හතට ඇති වටින් ගොඩින් ආරංචි වුණා. බස් එකක් පෙරළිලා කියලා. අපි එච්චර හිතුවෙ නෑ. පස්සේ කතරගමින් කුරුණෑගල ඊයේ රෑ ගියපු බස් එක කියලා දැනගත්තා. පුතා ඒ බස් එකේනේ නැග්ගුවේ කියලා ඉතිං අපිත් කලබල වෙලා හනික අපේ දෙන්නෙක් බයිසිකලේ උදේම නුවරට ගියා. ඊට පස්සේ තව හත්අටදෙ‍ෙනක් වාහනයක් කතාකර ගෙන පිටත් වුණා. අපි ඉස්පිරිතාලෙට ගියා. ඒ යනකොට පුතා නැති වෙලා. පුතා ඉපදුන කාලේ ඉඳලා හැදුනේ වැඩුණේ අපි එක්ක. එයාගේ තාත්තා දාලා ගියාට පස්සේ අම්මා පුතාව ජීවත් කරවන්න ලොකු මහන්සියක් ගත්තා. රට රස්සාවකට පවා ගියා. අවුරුදු 14ක්ම ඉගෙන ගත්තේ ගමේ ඉස්කෝලේ. ඊට පස්සේ සාමාන්‍ය පෙළ ලියන්න නුවර ඉස්කෝලෙකට දාලා ඉගැන්නුවා. එයා ඒ පැත්තේම ඇඟලුම් කර්මාන්ත ශාලාවක වැඩට ගියේ. දෙන්නා එක්ක බෝඩිමක හිටියේ. සාමාන්‍ය පෙළ විභාගේ ලිව්වට පස්සේ පුතා වැල්ලවායේ තෙලුල්ලේ අපේ මහගෙදර ආවා. මාසයකටත් වැඩිය හිටියේ මෙහේ තමයි. ඒ ඇවිත් ඊයේ තමයි ප්‍රැක්ටිකල්වලට යන්න කියලා ගියේ. ඒ යනකොටත් අපිට වැඳලා ආයේ එන්න වෙයිද දන්නේ නෑ අම්මා එවයිද දන්නේ නෑ කියලා ගියේ.”
කුඩා කල සිට හැදුණු වැඩුණු තෙලුල ජනපදයට අශේන්ගේ නිසල සිරුර රැගෙන එන බවක් ඔහුගේ මව දැනගෙන සිටියේ නැත. ඈ තවමත් බලාගෙන සිටින්නේ තම පුතු ප්‍රායෝගික පරීක්ෂණයට මුහුණදෙන්නට නුවර එනතුරුය.
