දියේ ගිලීමෙන් පෙරේදා (13) දින පමණක් පුද්ගලයන් දසදෙනකු මියගොස් ඇති බව පොලීසිය පවසයි. විනෝද චාරිකාවක් පැමිණි වයස අවුරුදු 27ක් වූ මාතලේ පදිංචිකරුවෙක් හලාවත දැදුරුඔය මංකඩේ දිය නෑමට යෑමේදී මියගොස් ඇත.
මීගමුව වෙරළ තීරයේ දිය නෑමට ගිය වයස අවුරුදු 18ක කලගෙඩිහේන ප්‍රදේශයේ පදිංචිකරුවෙක් මිය ගොස් ඇති බව පොලීසිය පවසයි.
පුත්තලම විල්ලුව වැවේ දිය නෑමට ගිය පුද්ගලයකු ද දියේ ගිලී අතුරුදහන්ව ඇත. වෙන්නප්පුව නයිනමඩම වෙල්ලමංකරය ප්‍රදේශයේ දිය නාමින් සිටි පුද්ගලයන් සිවු දෙනකු දියේ ගිලි මිය ගොස් තිබේ. ඔවුන් බගවන්තලාවේ සිට රැකියා සඳහා වෙන්නප්පුවට පැමිණ සිටි පිරිසකි.
පොල්ගහවෙල දෙනගමුව ප්‍රදේශයේ පිරිවෙනක අධ්‍යාපනය ලබමින් සිටි යාය, පදවිය ප්‍රදේශයේ පදිංචි 9 හැවිරිදි දරුවෙක් එම පිරිවෙනේම ළිඳකට වැටී මියගොස් ඇති බව පොල්ගහවෙල පොලීසිය පවසයි.
ගල්ගමුව පාළුකඩවල වැවේ දිය නෑමට ගිය තරුණියන් දෙදෙනකු දියේ ගිලී මියගොස් තිබේ. මෙලෙස මියගොස් ඇත්තේ වයස අවුරුදු 12ක් වූ මීරිගම, දසයපව්ව ප්‍රදේශයේ සහ වයස අවුරුදු 17ක් වූ රත්නපුර ගොළුවාවිල ප්‍රදේශයේ පදිංචි තරුණියන් දෙදෙනකු බව ගල්ගමුව පොලීසිය පවසයි.
