මාර්ග අනතුරු සම්බන්ධයෙන් නව වන්දි ක්‍රමයක් හඳුන්වා දීමටත් මාර්ග ආරක්ෂාව සම්බන්ධයෙන් ඉදිරියේදී විවිධ අණ පනත් ගෙන ඒමටත් කටයුතු කරන බව ප්‍රවාහන මහාමාර්ග වරාය හා ගුවන් සේවා ඇමැති බිමල් රත්නායක මහතා පැවැසීය.
මාර්ග ආරක්ෂාව පිළිබඳව ක්‍රියාමාර්ග 50ට වැඩිය මේ වනවිටත් ගෙන තිබෙනවා ඒවා ක්‍රියාත්මක කිරීමට කඩිනමින් කටයුතු කරනවා. ලංගම බස් රථවලට සීට් බෙල්ට් සවි කිරීමට මුදල් වෙන් කර තිබෙනවා.
මොඩිෆිකේෂන් සම්බ්නධයෙන් ගැසට්ටුවක් නිකුත් කරනවා යැයි කී ඒ මහතා මේ තීන්දු තීරණ කොත්මලේ ගැරඬිඇල්ල අනතුරින් පසුව ගත් ඒවා නොවන බවත් ඉන් පෙර ගත් තීරණ බවත් කීවේය.
දුර ගමන් සේවා බස් රථ ධාවනයට පෙර පූර්ව පරීක්ෂාවක් සිදු කිරීම, බස් රථය ධාවනය කරන රියැදුරු නිරීක්ෂණයට නව තාක්ෂණය යොදා ගැනීම, දුර සේවා බස් රථ ආපන ශාලාවල රියැදුරුට විවේක ගැනීමට හැකි වන සේ තත්ත්වයෙන් උසස් ලෙස සකස් කිරීම.
විද්‍යාත්මක අනතුරු වාර්තාකරණයට අවශ්‍ය පසුබිම පරිදි සකස් කිරීම, මාර්ගවල හඳුනාගත් අනාරක්ෂිත ස්ථානවල ආරක්ෂිත වැටවල් ඉදිකිරීම, අනාරක්ෂිත දුම්රිය මාර්ග 440ක දුම්රිය ගේට්ටු සවි කරිම කඩිනමින් සිදු කරන බව ද අමාත්‍යවරයා කියා සිටියේය.
කොත්මලේ, ගැරඬිඇල්ල ප්‍රදේශයේදී පසුගියදා සිදුවූ බස් රථ අනතුර සම්බන්ධයෙන් අවසන් වාර්තාව රස පරීක්ෂකවරයාගේ වාර්තාව සහ මෝටර් වාහන පරීක්ෂකවරයාගේ වාර්තා ලැබුණු සැනින් නිකුත් කරන බව ද හෙතෙම පැවැසීය.
මිය ගිය එක් අයකු වෙනුවෙන් රුපියල් ලක්ෂ 10ක මුදලක් ලබාදෙන බවත් එම මුදල් මේ වන විට ප්‍රාදේශීය ලේකම් කාර්යාල වෙත ලබාදී ඇති බව ද ඔහු කීය. එම මුදල් මියගිය අයගේ පවුලේ සාමාජිකයන් වෙත භාර දෙනු ඇති බව කියා ඇමැතිවරයා කියා සිටියේය.
අනතුර සිදුවූ අවස්ථාවේ ජනතාව දැක්වූ සහෝදරත්වයට සහ අනතුරින් තුවාල ලබා සිටි එහෙත් ඊට වඩා තුවාල ලැබූ අය වෙන්වෙන් කටයුතු කරමින් එම බස් රථයේ ගමන් ගත් පිරිස දැක් වූ වීරත්වයට තම ස්තූතිය පුද කරන බව ද ඇමැතිවරයා කීය.
කොත්මලේ රෝහල් කාර්ය මණ්ඩලය සිදු කළ සේවාවට ප්‍රශංසා කරන බව ද ඇමැතිවරයා පැවසුවේය.
අනතුරුට බස් රථය පත් වූ ස්ථානයේ මාර්ගයේ කිසිදු අනාරක්ෂිත බවත් නැති බවත් ඊට අදාළ වාර්තාව මාර්ග සංවර්ධන අධිකාරියෙන් ලැබී ඇති බවත් ඇමැතිවරයා මෙහිදී කියා සිටියේය. අනෙකුත් වාර්තා ඉදිරියේදී ලැබීමට නියමිත බවත් කීවේය.
ඒ මහතා මේ බව කියා සිටියේ ප්‍රවාහන අමාත්‍යාංශයේ දී ඊයේ (13) පැවැති මාධ්‍ය හමුවකට එක් වෙමිණි.
එහිදි අමාත්‍යවරයා මෙසේද කියා සිටියේය.
ඒ අවස්ථාවේ කොත්මලේ රෝහල කටයුතු කරේ ඒ කාලේ බෝම්බ පිපිරුණු විට ඇතිවූ තත්තවයක් වගෙයි. කොත්මලේ රෝහල් ඒ වගේ තත්තවයකට මීට කලින් මුහුණ දීලා නැහැ. ඉතාම ඉහළ මැදිහත්වීමත් කොත්මලේ රෝහල කරා. ඉන් පසු ගම්පොළ, නුවරඑළිය නාවලපිටිය, පේරාදෙනිය ළමා රෝහල, පේරාදෙනිය රෝහල සහ මහනුවර රෝහල් හය උපරිම කැපවීමෙන් කටයුතු කරා. අපි ඒ සෞඛ්‍ය කාර්ය මණ්ඩල වලට අගයන්න මේ අවස්ථාව යොදා ගන්නවා.
මෙම අනතුරින් තුවාල ලැබූ අය අතර කෙටි කාලිනව දිගු කාලිනව සුව වන පිරිසක් සිටිනවා. මේ අය අතරින් ආර්ථික වශයෙන් අසරණ වන පිරිසක් සිටිනවා. ඒ අයට ජනාධිපති අරමුදලින් සහාය වීමට කටයුතු කරාවි. තුවාල වූ අයට කඩිනමින් කටයුතු කරන්න බැහැ. ඒ අය පිළිබඳ වෛද්‍ය වාර්තා ගෙන කටයුතු කරනවා.
මේ බස් රථය ලංගම අයත් බස් රථයක් . එය සම්පූර්ණයෙන්ම රක්ෂණය කළ බස් රථයක් රක්ෂණය සමග ඔවුන් සාකච්ඡා කර තිබෙනවා. එය ප්‍රමාද වුවත් වන්දි ලබා දීමට කටයුතු කරාවී. ලංගම විසින් ලබා දෙන රුපියල් 25000 මුදලක් ලබා දෙනවා. එය ලබා දෙන්නේ මරණයට මිල ලෙස නෙමෙයි.
ලංගමය විසින් දෙන මුදලක්. ශ්‍රී ලංකා ක්‍රිකට් ආයතනය, ක්‍රිකට් කණ්ඩායම මේ දරුවන්ට දිගු කාලීනව උදව් කරන්න බලාපොරොත්තු වෙනවා. ඒ අය අපි සමග සාකච්චා කර තිබෙනවා. අවශ්‍ය සම්බන්ධිකරණ කටයුතු අපි සිදු කරනවා. තුවාල ලත් අය ඔවුන් රැක බලා ගැනීම සම්බන්ධයෙන් අපි කටයුතු කරනවා. රෝහල් වල යම් දෙයක් අවශ්‍ය වන්නේ නම් පැය කිහිපයක් තුළ ඒවා සපයා දීමට කටයුතු කර තිබෙනවා. අවශ්‍ය වෛද්‍ය උපකරණ පහසුකම් ලබා දීමට රජය සූදානමින් සිටින බව අපි දැනුම් දුන්නා.
අමාත්‍යාංශ පොලීසිය සහ ලංගම අනතුර සම්බන්ධයෙන් පරීක්ෂණ සිදු කරනවා. අනතුරු ලංකාවේ සිදු වූ විශාලතම මාර්ග අනතුරක් පිළිබඳ ඛේදවාචකයක්. මීට කලින් මෙපමණ ප්‍රමාණයක් මිය ගියේ යාංගල්මෝදර අනතුරින්. එහිදී නීති විරෝධීව බසය ධාවනය කිරීමක් බව අනාවරණය වූවා.
රියැදුරු මහතා සම්බ්නධයෙන් සහ බසයේ කාර්මික තත්වය මෙන්ම මාර්ගයේ තත්තවය සම්බන්ධයෙන් වාර්තා කැඳවා තිබෙනවා. ආයතන හතරකින් පමණ වාර්තා කැඳවා තිබෙනවා. බස් රථයේ ගමන් කළ මගීන්ගේ නිරීක්ෂණ මෙන්ම කොන්දොස්තර මහතා ලබා දෙන තොරතුරුත් අවසාන නිගමනයට බලපානවා.මේ පිළිබඳව සැබෑ තත්තවය ඉදිරිපත් කිරීමට හැකි වේවි.
විකෘති කරන ලද අදහස් ප්‍රකාශ කිරීමෙන් වළකින ලෙස ඉල්ලා සිටිනවා. මේ අනතුර ලංකාව කම්පනය කළ අනතුරක්. දිනපතා පහක් හයක් මිය යනවා අනතුරු වලින්. එක් වර සිදු වූ නිසයි මේ කම්පනය. මාර්ග ආරක්ෂාව මගී ආරක්ෂා පිළිබඳව ඉතාම ඉහළ මට්ටමකට යාමට අවශය අණ පනත් ගෙන එනවා.
ලංගම නියෝජ්‍ය සාමාන්‍යාධිකාරි චන්ද්‍රසිරි මහතා.
මේ බස් රථය කරගම ඩිපෝවට අයත් බස් රථයක්. කතරගම ඩිපෝවෙන් මෙම මාර්ගයේ බස් රථය ධාවනය වන්නේ දින 16යි. ඉතිරි දින තණමල්විල ඩිපෝවෙනුයි ධාවනය වන්නේ. බස් රථයේ රියදුරා ඉතාමත් හොඳින් රැකියාව කළ අයෙක්.
