ජාතික රෝහලක දැකිය හැකි බොහෝ ලක්ෂණ මෙන්ම පෞද්ගලික රෝහලක දැකිය හැකි ආකර්ෂණීය ලක්ෂණ ගණනාවක් නිර්මාණය කර ඇති ඉමදූව දිසා රෝහල මූලික රෝහලක් බවට පත්කිරීමට අවශ්‍ය කටයුතු කරන බව ධීවර, ජලජ සහ සාගර සම්පත් අමාත්‍ය රත්න ගමගේ මහතා පැවසීය.
අමාත්‍යවරයා මෙම අදහස් පළ කරනු ලැබුවේ ගාල්ල දිස්ත්‍රික්ක‌යේ ආදර්ශමත් රෝහලක් ලෙස නම්කර ඇති දිස්ත්‍රික් රෝහලේ සංවර්ධන කටයුතු පිළිබඳ නිරීක්ෂණ චාරිකාවකට එක් වෙමිනි. එහිදී වැඩිදුරටත් අදහස් දැක්වූ අමාත්‍ය රත්න ගමගේ මහතා මෙසේ අදහස් දැක්වීය.
“ මෙම රෝහලේ අඩුපාඩුකම් ඉදිරි සති දෙක තුළ සපුරාලීමට අවශ්‍ය කටයුතු කරනවා. මෙවැනි රෝහලක් අපේ රටේ රෝහල් පද්ධතියට ආදර්ශයක්. ඉන් බොහෝ දේ ලබා ගත හැකියි. මෙම රෝහල කිලෝමීටර් 16ක වපසරියක් ආවරණය වෙනවා. අධිවේගී මාර්ගයේ පිවිසුම් දෙකකට මායිම්ව පිහිටා ඇති මෙම රෝහලේ හදිසි අනතුරු ඒකකයක් ආරම්භ කිරීම ඉතා වැදගත් වෙනවා. ප්‍රධාන වෛද්‍ය නිලධාරිතුමන්ගේ කැපවීම හා පෞද්ගලික දානපතින්ගේ දායකත්වය ඉතාම වැදගත්. මේ වන විට කෝටි 7කට ආසන්න මුදලක් පෞද්ගලික දානපතියන්ගෙන් ලබාගෙන මෙහි සංවර්ධන කටයුතු කර තිබෙනවා. මෙම රෝහලට ආදරය කරන පිරිසක් ඉන්නවා. සුව මිතුරු කමිටුව එහි මූලිකත්වය ගෙන තිබෙනවා.
මේ වෛද්‍යවරයා මාරුකර තිබෙන ආරංචියත් සමඟ විශාල පිරිසක් මා හමුවෙන්නට ආවා. මේ වගේ රෝහලක් සැබැවින්ම රටක නියදියක්. රජයක් ලෙස අප මේ සඳහා උදව් කළ යුතුයි. අපේ රටේ වෛද්‍යවරුන් ස්ථානමාරු කරන්නේ රටේ යහපතටයි. චක්‍රලේඛන හදා තියෙන්නේ වඩාත් රාජ්‍ය සේවය හොද වෙන්නයි. මෙහි තිබෙන කණ්ඩායම් හැඟීම ඉතාම හොඳයි. සාධාරණ ඉල්ලීමක් ඇවිත් තියෙන්නේ. පසුගිය රජය මඟින් ද මීට මැදිහත්ව කටයුතු කර තිබෙනවා. සෞඛ්‍ය අංශයේ විශාලතම මුදලක් මෙවර අය වැයෙන් වෙන්කර තිබෙනවා. සුව මිතුරු කමිටුව හා දිස්ත්‍රික් වෛද්‍ය නිලධාරිවරයාගේ කැපවීම අගය කරන බවද අමාත්‍යවරයා මෙහිදී පෙන්වා දුන්නේය.”
“සෞඛ්‍ය අමාත්‍යතුමන්ගේත්, නියෝජ්‍ය අමාත්‍යතුමන්ගේ ඇතුළු බොහෝ දෙනෙකුගේ අවධානයට මෙම රෝහල පත්ව තිබෙනවා. මෙම රෝහල ඇගයීමට ලක්වීම අගය කරන බව දිස්ත්‍රික් වෛද්‍ය නිලධාරි තරංග ප්‍රසාද් මහතා පවසා සිටියේය.”
