ඉකුත් වෙසක් පොහෝදා (12) බණ්ඩාරවෙල සිට දියතලාව දක්වා ප්‍රධාන මාර්ගයට අවිධිමත් ලෙස කසළ බැහැර කරමින් බස් රථයකින් ගමන් කරමින් සිටි සංචාරකයින් පිරිසකට මතක හිටින දඬුවමක් ලබාදීමට හපුතලේ සෞඛ්‍ය වෛද්‍ය නිලධාරී කාර්යාලයේ මහජන සෞඛ්‍ය පරික්ෂකවරු කටයුතු කළහ.
ඇල්ල හපුතලේ ප්‍රදේශ සංචාරක කලාපයක් ලෙස ප්‍රවර්ධනය වීමත් සමඟ එම ප්‍රදේශවලට වැඩි වැඩියෙන් පැමිණෙන දේශීය සංචාරකයින් විසින් පරිසරයට ඝණ අපද්‍රව්‍ය අවිධිමත්ව බැහැරලීම මඟින් විශාල පරිසර හානියක් සිදු වෙමින් පවතින අතර මෙම තත්ත්වය යම් තරමකට හෝ පාලනය කිරීමේ අරමුණින් හපුතලේ සෞඛ්‍ය වෛද්‍ය නිලධාරී කාර්යාලයේ මහජන සෞඛ්‍ය පරික්ෂකවරුන් විසින් සති අන්තයේ සහ දීර්ඝ නිවාඩු දිනවල ඒ සම්බන්ධයෙන් විශේෂ වැටලීම් ක්‍රියාත්මක කර ඇත. ඒ අනුව ඉකුත් වෙසක් පොහෝදා මඩකලපුව අක්කරෙයිපත්තු ප්‍රදේශයේ සිට පැමිණ නුවරඑළිය බලා බස් රථයකින් ගමන් කරමින් සිටි සංචාරකයින් පිරිසක් බස් රථයේ ගමන් කරන අතරතුර හිස් අයිස් පැකට් ඇතුළු කසළ බස් රියෙන් පිටතට විසිකරමින් යන අයුරු දුටු එම නිලධාරීන් අදාළ බස් රථය පසුපස හඹා ගොස් දියතලාව පොලිස් ස්ථානය අසලදී බසය නවතාගෙන ඇත. පසුව බසයේ සිටි වැඩිහිටි පිරිසගේ එකඟතාවය පරිදි බස් රථය නැවත හරවා බණ්ඩාරවෙල දක්වා යවා මාර්ගයට ඔවුන් විසින් බැහැර කරන ලද පොලිතින්, අයිස් පැකට් ඇතුළු කසළ නැවත එකතු කරවා මහජන සෞඛ්‍ය පරික්ෂකවරුන් වෙත භාරදීමෙන් අනතුරුව එම වරද පිළිබඳව දැනුම්වත් කර ඔවුනට දැඩිව අවවාද කර එම පිරිස පිටත්කරනු ලැබීය.
හපුතලේ පරිපාලන මහජන සෞඛ්‍ය පරීක්ෂක ජීවන කපුකොටුව, දියතලාව මහජන සෞඛ්‍ය පරීක්ෂක රොහාන් සමරවීර, කහගොල්ල මහජන සෞඛ්‍ය පරීක්ෂක නලීන් පීරිස්, කදුරුගමුව මහජන සෞඛ්‍ය පරීක්ෂක ගාමිණී රත්නසිරි යන නිලධාරීන් හා සරත්, ඉන්දික යන මහත්වරුන් ඇතුළු පිරිසක් වැටලීමට එක්ව සිටියහ.
