සංවිධානාත්මක ලෙස සිදු කෙරෙන රක්වාන බාර් වත්ත ප්‍රදේශයේ කසිප්පු ජාවාරම නවත්වන ලෙස ඉල්ලමින් ප්‍රදේශවාසීන් පිරිසක් දෙණියාය- රත්නපුර ප්‍රධාන මාර්ගය රක්වාන බාර් වත්ත ප්‍රදේශයෙන් හරස් කරමින් උද්ඝෝෂණයක නිරත වූහ.
උද්ඝෝෂණය ගැන සොයා බැලීමට පැමිණි රත්නපුර පොලිස් අධිකාරි කපිල ප්‍රේමදාස මහතා හමුවේ ගම්වාසීන් සඳහන් කළේ මෙම කසිප්පු ජාවාරම මැඬලීමට පොලීසියට දැනුම් දුන්නද පොලීසිය නිසි මැදිහත්වීමක් නොකළ බවයි.
ඊයේ (14) පෙරවරු 7.00 සිට පැය තුනක කාලයක් පැවති උද්ඝෝෂණයේ දී ගම්වාසීන් සඳහන් කළේ ප්‍රදේශයේ නීති විරෝධි කසිප්පු ජාවාරම නවත්වන ලෙසයි.
පෙරේදා වයස අවුරුදු 14ක ළමයෙකුට කසිප්පු පානය කිරීමට දීමේ සිද්ධියක් ද සිදුව ඇතැයි ගම්වාසීහු සඳහන් කළහ. එම ළමයා යොදවා පොල් කඩාගෙන මුදල් වෙනුවට කසිප්පු දී ඇතැයි ගම්වාසීන් සඳහන් කළේය.
ප්‍රදේශයේ කසිප්පු ජාවාරම්කරුවන් මේ වන විටත් පොලිස් විශේෂ කාර්ය බළකාය විසින් අත්අඩංගුවට ගෙන ඇතැයි පොලීසිය පවසයි. ඉදිරියට ප්‍රදේශයේ කසිප්පු ජාවරම සිදුවුවහොත් ඒ ගැන තමාට හෝ සහකාර පොලිස් අධිකාරිවරයාට දැනුම් දෙන ලෙසද රත්නපුර පොලිස් අධිකාරිවරයා ගම්වාසීන්ට පැවසීය. නීතිය අතට ගෙන ක්‍රියා නොකරන ලෙස පොලිස් අධිකාරිවරයා ගම්වාසීන්ට දැනුම් දුන්නේය.
