මහියංගණ – බදුල්ල ප්‍රධාන මාර්ගයේ ධාවනය වෙමින් තිබූ ත්රිරෝද රථයක් පෙරේදා (13) සවස 5.30ට පමණ අරාව පොලිස් බලප්‍රදේශයට අයත් කුරුවිතැන්න දඹගහපිටිය මංසන්ධියෙදී හදිසි ගින්නක් හටගෙන එම ත්රිරෝද රථය සම්පූර්ණයෙන්ම ගිනිගෙන විනාශ වී ඇතැයි අරාව පොලීසියේ පවසයි.
මෙම ත්රිරෝද රථයේ තරුණයන් දෙදෙනකු සහ තරුණියන් දෙදෙනෙක් ගමන්කර ඇති අතර ඔවුන් බිබිල ප්‍රදේශයේ සිට මීගහකිවුල ප්‍රදේශයේ මිතුරෙකුගේ නි‍ෙවසට යමින් සිටියදි දඹගහපිටිට මංසන්ධියේ දී ත්රිරෝද රථය නවත්වා දඹගහපිටිය ත්රිරෝද රථ ගාලේ ත්රිරෝද රථ රියැදුරෙකුගෙන් මාර්ගය විමසා ඇති අතර එහිදී ත්රිරෝද රථගාලේ සිටි රියැදුරා විසින් මෙම ත්රිරෝද රථය ගිනිගන්නා බව දැක අරාව පොලීසියට දැනුම්දී ඇති අතර අරාව පොලීසියේ හා දඹගමපිටිය ත්රිරෝද රථ රියැදුරන් සහ ප්‍රදේශවාසීන් එක්ව ගින්න නිවා දැමීමට කටයුතු කර ඇති බව පොලීසිය පවසයි. ගින්නෙන් ත්රිරෝද රථයේ ගමන් කළ කිසිවෙකුටත් අනතුරක් සිදුවී නොමැති අතර ගමන් කළ පිරිසගේ බඩු බහිරාදිය ඇතුළු දෑ සමඟ ත්රිරෝද රථය සම්පූර්ණයෙන් විනාශ වී ඇතැයි අරාව පොලීසිය පවසයි.
ගින්නට හේතුව රථයේ හටගත් කාර්මික දෝෂයක් වන්නට ඇතැයි පොලීසිය සැකකරයි.
