වැඩ තහනමකට ලක්ව සිටින පොලිස්පති දේශබන්දු තෙන්නකෝන්ට මහතාට එළැඹෙන 19වැනිදා ප.ව. 2ට ධුරයේ බලය අනිසි ලෙස යොදා ගැනීම සම්බන්ධයෙන් විමර්ශනය කිරීම සඳහා පත්කර ඇති විශේෂ කමිටුව පරීක්ෂණ කමිටුව හමුවේ පෙනී සිටින ලෙස දන්වා තිබේ.
‘පොලිස්පති දේශබන්දු තෙන්නකෝන් මහතා විසින් සිදුකර ඇතැයි කියන විෂමාචාර සහ ධුරයේ බලතල බරපතළ අන්දමින් අනිසි ලෙස යොදාගැනීම සම්බන්ධයෙන් විමර්ශනය කර වාර්තා කිරීමට පත්කළ පරීක්ෂණ කමිටුව’ විසින් මෙම දැනුම්දීම සිදුකර තිබුණි.
දේශබන්දු තෙන්නකෝන් මහතා කමිටුව හමුවට කැඳවන පළමු අවස්ථාව වන්නේ මෙයවේ.
දේශබන්දු තෙන්නකෝන් මහතා ධුරයේ බලය අනිසි ලෙස යොදා ගැනීම සම්බන්ධයෙන් විමර්ශනය කිරීම සඳහා පත්කර ඇති විශේෂ කමිටුව ශ්‍රේෂ්ඨාධිකරණ විනිසුරු පී.පී. සූරසේන මහතාගේ සභාපතීත්වයෙන් සහ විනිසුරු ඩබ්ලිව්.එම්.එන්.පී. ඉද්දවල සහ ජාතික පොලිස් කොමිෂන් සභාවේ සභාපති ඊ.ඩබ්ලිව්.එම්. ලලිත් ඒකනායක යන මහත්වරුන්ගෙන් සමන්විතය.
මෙම කමිටුව පළමු වතාවට අප්‍රේල් 23 වැනිදා පාර්ලිමේන්තු සංකීර්ණයේදී රැස්වූ අතර ඉන්පසුව පරීක්ෂණ කමිටුව අවස්ථා කිහිපයකදී පාර්ලිමේන්තු සංකීර්ණයේදී රැස්වූ අතර කමිටුවේ සහාය සඳහා විශේෂ පොලිස් කණ්ඩායමක් ද පත් කෙරුණි.
2002 අංක 05 දරන නිලධරයන් ඉවත් කිරීමේ (කාර්යපටිපාටිය) පනතෙහි 5 වගන්තිය සමඟ කියවිය යුතු 3 (ඈ) සහ 3 (ඉ) වගන්තිප්‍රකාරව සහ එකී පනතෙහි 5 වන වගන්තිය ප්‍රකාරව දේශබන්දු තෙන්නකෝන් මහතා ධුරයෙන් ඉවත් කිරීම සඳහා පරීක්ෂණ කමිටුවක් පත් කළ යුතු බවට වූ යෝජනාවක් පාර්ලිමේන්තුවේදී සම්මත විය.
ආණ්ඩුවේ මන්ත්‍රීවරුන් පිරිසක් පසුගිය මාර්තු 25 වන දින මෙම යෝජනාව කථානායක ජගත් වික්‍රමරත්න මහතාට භාර දෙනු ලැබීය.
