මහනුවර සුමංගල සහ කටුගස්තොට ශ්‍රී රාහුල දෙවිදුහල් අතර 27 වැනි වරට පැවැත්වෙන කඳුරට රන් මහා සටන වාර්ෂික මහා ක්‍රිකට් තරගය අද (16) සහ හෙට (17) පල්ලෙකැලේ ජත්‍යන්තර ක්‍රිකට් ක්‍රිඩාංගණයේදී පැවැත්වෙයි.
මෙවර සුමංගල විදුහල් කණ්ඩායම මොවිදු බාලසූරිය විසින් ද රාහුල විදුහල් කණ්ඩායම තවිෂ සෙනාල් ජයසූරිය විසින් ද මෙහෙයවනු ලබති.
දෙවිදුහල් අතර මෙතෙක් පවත්වා තිබෙන මහා ක්‍රිකට් තරග 27න් තරග 5ක් ජය ගැනීමට සුමංගල විදුහල සමත්ව තිබේ. රාහුල විදුහල මෙවර තරගයට පිවිසෙන්නේ මංගල ජයග්‍රහණය ලබා ගැනීමේ අපේක්ෂාවෙනි. සුමංගල විදුහල මෙවර තරග 14කට මුහුණදී පූර්ණ ජයග්‍රහණ 7ක් වාර්තා කර තිබේ. රාහුල විදුහල මේ තරගවාරයේදී මුහුණදුන් තරග 8න් තුනක් ජයග්‍රහණය කිරීමට සමත්ව ඇත.
සුමංගල විදුහල වෙනුවෙන් නායක මොවිදු බාලසූරිය ලකුණු 450ක් සමඟ කඩුලු 75ක් බිඳ දමා තිබේ. සවිඳු විසල් කඩුලු 82ක් බිඳ දමමින් පන්දුවෙන් දස්කම් දක්වා ඇත. ශ්‍රී රාහුල විදුහලේ නායක තවිෂ සෙනාල් ජයසූරිය තුන් ඉරියව් දස්කම් දක්වමින් පිත්තෙන් ලකුණු 510 ක් රැස්කර කඩුලු 48ක් බිඳ දමා තිබේ.
