මාවිල්ආරු සොරොව්ව වසා දමමින් කොටි ත්‍රස්තවාදීන් ආරම්භ කළ අමානුෂීය යුද්ධය ජය ගැනීමට සමත්වූ 16 වැනි වසර සමරමින් මියගිය රණවිරුවන්, ආබාධිත රණවිරුවන් සිහිපත් කරමින් රණවිරුවන්ට උපහාර දැක්වීමේ උත්සවයක් ඊයේ (18) උදෑසන මාවිල්ලාරූ සොරොව්ව අසලදී ප්‍රදේශවාසීන්ගේ සහභාගිත්වයෙන් පැවැත්විණි.
කුරිරු ත්‍රස්තවාදීන්ගේ අවසන් ඉලක්කය බවට පත්වූ මාවිල්ලාරු සොරොව්ව වසා දැමීමත් සමඟම ගොවිබිම් සියල්ලට ලබාදෙන ජලය නොමැතිවීම නිසා කම්පාවට පත්වූ මහා සංඝරත්නය එක්ව පවත්වන ලද උපවාසය සමගම ආරම්භ කළ මානුෂීය මෙහෙයුම දරුණු ත්‍රස්තවාදීන් අන්ත පරාජයකට පත්කිරීම දක්වා රට වෙනුවෙන් යුද වැදුණු රණවිරුවෝ සමත් වූහ. එහිදී මියගිය රණවිරුවන් වෙනුවෙන් පැන් වඩා පින් අනුමෝදන් කරමින්, ආබාධිත රණවිරුවන්ට සුවය ප්‍රාර්ථනා කරමින් යුද්ධය මෙහෙයවූ සියලුම දෙනාට නීරෝගි සුවය පැතීම සිදුවිය. නීළපොළ, දෙහිවත්ත, කල්ලාර් දහම්පාසල් සිසු සිසුවියන්ගේ සහභාගිත්වය ඇතිව සිදුකළ මෙම වැඩසටහන කාල්ලාර් ශ්‍රී බෝධිරාජාරාමාධිපති ගනේගොඩ ධම්මකිත්ති හිමියන් ඇතුළු මහා සංඝරත්නය එක්ව සංවිධානය කර තිබිණි.
කන්තලේ සමූහ – සුමිත්‍රා කුමාරිහාමි
