එක්සත් ජාතින්ගේ ආහාර හා කෘෂිකර්ම සංවිධානයේ (FAO) අධ්‍යක්ෂ ජනරාල්, ආචාර්ය චු දොන්යු (Dr QU Dongyu)මහතා, ආසියා සහ පැසිෆික් කලාපය සඳහා වන FAO කලාපීය සමුළුවේ 37 වැනි සැසිවාරයට සහභාගි වීම සඳහා තෙදින සංචාරයක් සඳහා ශ්‍රී ලංකාවට අද(18) පැමිණියේය.
රාජ්‍ය අමාත්යවරුන් සහ සාමාජික රටවල් 46 ක නියෝජිත කණ්ඩායම් ප්‍රධානීන් මෙම උත්සවය සඳහා කොළඹට රැස්ව සිටිති. ශ්‍රී ලංකාව APRC37 සත්කාරකත්වය දරයි.
ශ්‍රී ලංකාවේ කෘෂිකර්ම අමාත්‍යංශයේ ලේකම් ජනක ධර්මකීර්ති, ආසියා පැසිෆික් ප්‍රාදේශය සඳහා FAO නියෝජිත ජොන්ග්-ජින් කිම් (Jong-Jin Kim) සහ ශ්‍රී ලංකාව සඳහා වන FAO නියෝජිත විම්ලේන්ද්‍ර ශරන් (Vimlendra Sharan) විසින් අධ්‍යක්ෂ ජනරාල්වරයා ගුවන් තොටුපළේදී පිළිගනු ලැබීය.
අධ්‍යක්ෂ ජනරාල්වරයා රැඳී සිටින කාලය තුළ කෘෂිකාර්මික ස්ථාන නැරඹීමට ද නියමිත අතර, ශ්‍රී ලංකා ජනාධිපති, අගමැති ඇතුළු අමාත්යවරුන් සහ අනෙකුත් ආසියා පැසිෆික් රටවල අමාත්යවරුන් සමඟ ද්විපාර්ශ්වික සාකච්ඡා මාලාවක් පැවැත්වීමට නියමිතය.
ජනාධිපති රනිල් වික්රමසිංහ සහ අධ්‍යක්ෂ ජනරාල්වරයා විසින් ආසියා පැසිෆික් කලාපය පුරා සිටින නියෝජිතයින් සහභාගී වන සමුළුවේ අමාත්‍ය සැසිය පෙබරවාරි 20 අඟහරුවාදා ආරම්භ කිරීමට නියමිතයි.
