බොරැල්ල පොලිසිය තුළ දී සුළු පැමිණිලි අංශයේ ස්ථානාධිපතිවරයා ඇතුළු පොලිස් නිලධාරීන් තිදෙනකුට පහර දුන් එකම පවුලේ සහෝදරයෙක් සහ සහෝදරියක් අත්අඩංගුවට ගත් බව බොරැල්ල පොලිසිය කියයි. මෙලෙස අත්අඩංගුවට ගෙන ඇත්තේ රාජගිරිය ඔබේසේකරපුර අරුණෝදය මාවත පදිංචි වයස අවුරුදු 24 තැනැත්තියක් හා වයස අවුරුදු 31ක ඇයගේ සහෝදරයායි.
සැකකරු සහ සැකකාරියගේ පහර කෑමට ලක්වූ සුළු පැමිණිලි අංශයේ ස්ථානාධිපති ලෙස කටයුතු කරන පොලිස් පරීක්ෂක පියතුංග, පොලිස් සැරයන් 66707 හේරත් හා කාන්තා පොලිස් කොස්තාපල් 13372 ධනුෂ්කා යන නිලධාරීන් සහ නිලධාරිනියයි.
අත්අඩංගුවට ගත් සැකකාරිය මීට දින කීපයකට පෙර ඇයගේ මවට විරුද්ධව දමා තිබූ පැමිණිල්ලක් බොරැල්ල පොලිසියේ සුළු පැමිණිලි අංශය තුළ විභාග කරමින් සිටියදී සැකකාරිය විසින් ජංගම දුරකථනයෙන් පැමිණිල්ල විභාග කරන ආකාරය කටහඬ පටිගත කිරීම හේතුවෙන් එම අවස්ථාවේදී ඇයට අවවාද කර ජංගම දුරකථනය පොලිස් භාරයට ගෙන නඩු භාණ්ඩයක් ලෙස පොලිස් භාරයේ තබා තිබිණි. අනතුරුව එම දුරකථනය නිදහස් කර ගැනීම සඳහා සැකකාරිය පැමිණි අවස්ථාවේ දී කාන්තා පොලිස් කොස්තාපල් 13648 මල්ශිකා නිලධාරිනිය ඇයගෙන් ප්‍රකාශයක් සටහන් කර ගැනීමට යාමේදී ජංගම දුරකථනය පරික්ෂා කිරීමට අවශ්‍ය බවට සැකකාරිය පැවසීමෙන් අනතුරුව පොලිස් කොස්තාපල්වරිය ජංගම දුරකථනය ඇය වෙත පරීක්ෂා කිරීම සඳහා ලබා දී ඇත. එම අවස්ථාවේ දී සැකකාරිය ජංගම දුරකථනයත් රැගෙන පොලිස් ස්ථානයෙන් පලා යාමට උත්සාහ දැරීමේ දී 13372 ධනුෂ්කා නිලධාරිනිය විසින් එය වැළැක්වීමට යාමේ දී සැකකාරිය විසින් එම නිලධාරිනිගේ ගෙලට පහර දී ඇති අතර සුළු පැමිණිලි අංශයේ ස්ථානාධිපතිවරයා විසින් එය වැළැක්වීමට යාමේ දී ඔහුගේ පපු ප්‍රදේශයට සැකකාරිය සමඟ පැමිණි ඇයගේ සහෝදරයා විසින් පහර දී ඇතැයි පොලිසිය කියයි. එය දුටු පොලිස් සැරයන් 66707 හේරත් නිලධාරියා විසින් එය වැළැක්වීමට යාමේ දී ඔහුටද සැකකරු විසින් පහර දී ඇති බව පොලිස් විමර්ශනවල දී අනාවරණය වී ඇත.
අනතුරුව සෙසු පොලිස් නිලධාරීන් විසින් අවම බලය යොදා පොලිස් නිලධාරීන්ට පහර දී රාජකාරියට බාධා කිරීම සම්බන්ධයෙන් සැකකරු සහ සැකකාරිය අත්අඩංගුවට ගෙන ඇත.
