මෙම දිනවල පවතින අධික වියළි කාලගුණික තත්ත්වයත් සමඟ වික්ටෝරියා ජලාශයෙන් පමණක් දෛනිකව ජලය ලීටර් මිලියන 6.5 ක් වාෂ්ප වන බව ජලාශයේ කාර්යභාර ඉංජිනේරු වසන්ත ඇහැලපිටිය මහතා පවසයි. වර්ග කිලෝ මීටර් 24 ක භූමි ප්‍රමාණයක පැතිරී තිබෙන ජලාශයේ මුහුණතට ඇද වැටෙන අධික හිරු රශ්මිය හේතුවෙන් මතුපිට පෘෂ්ඨයේ මිලි මීටර් 4.5ක ඝනත්වයෙන් යුත් කොටසක් දිනපතා වාෂ්ප වන බවත් ඒ මහතා කීය.
මේ වනවිට ජලාශය සම්පූර්ණ ධාරිතාවෙන් 80 % ක් පමණ ජලයෙන් පිරී පවතින බව ද ඒ මහතා පැවසුවේය.
ජලාශයේ උපරිම ජල මට්ටම මුහුදු මට්ටමේ සිට මීටර් 438.4ක් වන අතර මේ වනවිට 432.59ක උසකට ජලය පිරී ඇතැයි ද ජල විදුලිය නිෂ්පාදනය සඳහා ඝන මීටර් මිලියන 4.143ක ජල ප්‍රමාණයක් පසුගිය 17 දින මුදාහැර ගිගාවොට් පැය 1.691ක විදුලි උත්පාදනයක් සිදුකළ බවත් ඇහැලපිටිය මහතා කීය. විදුලි නිෂ්පාදනය හා ගොවිතැන් කටයුතු සඳහා ජලය මුදා හැරීම සම්බන්ධයෙන් ජල ලේකම් කාර්යාලය මඟින් සතිපතා රැස්ව තීරණය කරනු ලබයි.
