ගංජා මිලිග්රෑම් 990ක් මුදලට විකිණීමේ සහ ගංජා මිලිග්රෑම් 1,600ක් සන්තකයේ තබා ගැනීමේ සිද්ධියක් සම්බන්ධයෙන් අධිකරණය හමුවේ චෝදනා ලබා සිටි විත්තිකරුවකු එකී චෝදනාවට අධිකරණය හමුවේ වරද පිළිගත්තද ඔහු අදාළ නඩුවෙන් නිදහස් කර මුදා හරින ලෙස අනුරාධපුර අතිරේක මහෙස්ත්රාත් කංචනා නර්ථනා අභිමානී සෙනවිරත්න මෙනවිය නියෝග කළාය.
මෙලෙස නිදහස් කර මුදා හැරියේ අනුරාධපුර අතිරේක මහේස්ත්රාත් අධිකරණය හමුවේ පැවැති ඒ/ඩී/2/111/2024 අංක දරන නඩුවේ සැකකරු වන පරසන්ගස්වැව පලුගොල්ලෑව පදිංචිකරුවකු වන ආනන්ද ආරියදාස නමැත්තෙකි. මෙම සැකකරු ගංජා මිලිග්රෑම් 990ක් මුදලට විකුණමින් සිටියදී සහ තවත් ගංජා මිලිග්රෑම් 1,600ක් සන්තකයේ තබාගෙන සිටියදී අත්අඩංගුවට ගනු ලැබූවේ පරසන්ගස්වැව පොලිසිය මගිනි. පසුව අධිකරණ නියෝග මත දින තුනක් සැකකරු රඳවා තබා ගෙන ප්රශ්න කළ අතර, එකී ප්රශ්න කිරීමෙන් අනතුරුව සැකකරු අධිකරණයට ඉදිරිපත් කර තිබේ. එලෙස සැකකරු අධිකරණයට ඉදිරිපත් කළ මුල් අවස්ථාවේදීම තමන් වරද පිළිගන්නා බව සැකකරු ජ්යෙෂ්ඨ නීතිඥ රංජිත් රාජකරුණා මහතා මඟින් අධිකරණයට දැනුම් දුන්නේය. පසුව සැකකරු වරද පිළිගන්නා බව අධිකරණයට දැනුම් දීම සැලකිලල්ට ගත් අනුරාධපුර අතිරේක මහේස්ත්රාත්වරිය පරසන්ගස්වැව පොලිසියේ ස්ථානාධිපති ප්රධාන පොලිස් පරික්ෂක අනවර්දීන් මහතාට නියෝග කළේ සැකකරුට දඬුවම් නියම කිරීම සඳහා පොලිස්පතිවරයා විසින් නිකුත් කරනු ලැබ ඇති චක්රලේඛය ප්රකාරව ඔහුට එරෙහිව චෝදනා පත්රයක් ගොනු කරන ලෙසයි.
අතිරේක මහෙස්ත්රාත්වරියගේ එකී නියෝගයට අනුව පරසන්ගස්වැව පොලිසියේ ස්ථානාධිපතිවරයා සැකකරුට එරෙහිව චෝදනා පත්රයක් ගොනු කිරීම පැහැර හැර අධිකරණයට වැඩිදුර වාර්තා ඉදිරිපත් කරමින් කරුණු කීය. එය සැලකිල්ලට ගත් අතිරේක මහෙස්ත්රාත්වරිය පොලිස් ස්ථානාධිපතිවරයා ඉදිරිපත් කළ වැඩිදුර වාර්තාව ප්රතික්ෂේප කරමින් සැකකරු ඔහුට එරෙහිව පැවැති නඩුවෙන් නිදහස් කර මුදා හැරීමට නියෝග කළාය.
පැමිණිල්ල වෙනුවෙන් පරසන්ගස්වැව පොලිසියේ ස්ථානාධිති ප්රධාන පොලිස් පරීක්ෂක අනවර්දීන් මහතා සමඟ එම පොලිසියේ නිලධාරීන් පෙනී සිටි අතර, සැකකරු වෙනුවෙන් ජ්යෙෂ්ඨ නීතිඥ රංජිත් රාජකරුණා මහතා ඇතුළු නීතිඥ පිරිසක් පෙනී සිටියහ.
අනුරාධපුර - උපාලි ආනන්ද