පාස්කු දින ත්‍රස්ත ප්‍රහාරයට සම්බන්ධ බවට ලැබුණු පැමිණිලි මත අත්අඩංගුවට ගෙන රඳවා තබා ගැනීම සහ හිරිහැරයට පත් කිරීම වෙනුවෙන් හොරොව්පොතාන ප්‍රදේශයේ පුද්ගලයන් තිදෙනෙකුගෙන් හොරොව්පොතාන පොලිස්ථානාධිපතිවරයා ඇතුළු පොලිස් නිලධාරීන් පස්දෙනකු සිංහල ක්‍රමයට ඔවුන්ට ආචාර කර විවෘත අධිකරණයේ දී ඊයේ (01) සමාව ලබා ගත්හ.
මෙකී සිද්ධිය සම්බන්ධයෙන් එම පුද්ගලයන්ගෙන්ද නැවත ප්‍රශ්න කිරීමට කටයුතු නොකරන බවට නීතිපතිවරයා අධිකරණය හමුවේ එකඟතාවය පළ කළේය.
තමන් නීති විරෝධී ලෙස අත්අඩංගුවට ගෙන මාස හයකට වැඩි කාලයක් රඳවා තබා ගැනීම මඟින් සහ මානසික සහ ශාරීරික හිරිහැරයට පත් කිරීම මඟින් මූලික අයිතිවාසිකම් උල්ලංඝනය කර ඇති බවට වෙන් වෙන් වශයෙන් ගොනුකර තිබූ මූලික අයිතිවාසිකම් පෙත්සම් කැඳවූ අවස්ථාවේ දී මෙම එකඟතාවය පළ කරන ලදි.
එස් තුරේයි රාජා, කුමුදුනී වික්‍රමසිංහ සහ අචල වෙංගප්පුලි යන ශ්‍රේෂ්ඨාධිකරණ විනිසුරු මඬුල්ල හමුවේ මෙම පෙත්සම් කැඳවන ලදි.
එහි දී අධිකරණය හමුවේ මෙම පෙත්සම්කරුවන් වන සෙනූල් ආබ්දීන් ඉර්ෆාන්, සෙනුල්ආබ්දීන් කලීෆාතුල්ලා සහ නූර්ගේ සකරියා යන අය පෞද්ගලිකවම පෙනී සිටියහ.
පෙත්සම් මඟින් වගඋත්තරකරුවන් ලෙස නම්කර සිටි එවකට හොරොව්පොතාන පොලිස් ස්ථානාධිපති රොෂාන් සංජීව, එම පොලිසියේ පොලිස් සැරයන් ප්‍රේමරත්න, සැරයන් සිසිර, පොලිස් කොස්තාපල් ජයතිලක සහ කැබිතිගොල්ලෑව පොලිස් ස්ථානාධිපතිවරයා එහි දී විවෘත අධිකරණයේ දී වෙන් වෙන්ව පෙත්සම්කාර පුද්ගලයන්ට ආචාර කර සමාව ලබා ගත්හ.
එහි දී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් මාධව තෙන්නකෝන් මහතා සඳහන් කර සිටියේ මෙම පෙත්සම්කරුවන්ට එරෙහිව ත්‍රස්තවාදය වැළැක්වීම පනත යටතේ හොරොව්පොතාන මහේස්ත්‍රාත් අධිකරණයේ නඩු පවරා තිබූ බවය.
එම නඩුවලින් 2022 වසරේ දී ඔවුන් සම්පූර්ණයෙන්ම නිදොස් කොට නිදහස් කළ බව බව ද ඒ මහතා සඳහන් කළේය.
මෙහි දී පෙත්සම්කරුවන් වෙනුවෙන් පෙනී සිටි නීතිඥවරිය සඳහන් කර සිටියේ මෙම අධිකරණය මඟින් නිදහස් කර හැරියද අවට පිරිස් සහ ආරක්ෂක අංශ විසින් මොවුන් තවමත් සැකකරුවන් ලෙස සලකමින් කටයුතු කරන බවය.
ඔවුන් සමඟ අමනාපයෙන් පසුවන ඇතැම් පුද්ගලයන් විසින් විවිධ අසත්‍ය පැමිණිලි ඔවුන්ට එරෙහිව සිදුකරන බව ද ඇය සඳහන් කළාය. එසේම තවදුරටත් ත්‍රස්තවාදීන් ලෙස සැලකීම නිසා මෙම පුද්ගලයන්ගේ දරුවන්ටද පවුල්වල සාමාජිකයන්ටද විශාල ලෙස හිරිහැරයන්ට සහ අපවාදයන්ට මුහුණපෑමට සිදුවී ඇති බවට ඇය සඳහන් කළාය.
එහි දී නියෝජ්‍ය සොලිස්ටර් ජනරාල්වරයා සඳහන් කළේ මෙකී කරුණු සම්බන්ධයෙන් තවදුරටත් පෙත්සම්කරුවන්ගෙන් ප්‍රශ්න කිරීමට කටයුතු නොකරන බවය. අනතුරුව කරුණු සලකා බැලූ විනිසුරු මඬුල්ල පෙත්සම් විභාගය අවසන් කිරීමට තීරණය කළේය.
මෙම අත්අඩංගුවට ගැනීමේ සිද්ධිය සම්බන්ධයෙන් මූලික අයිතිවාසිකම් පෙත්සම් දෙකක් ගොනුකර ඇති පෙත්සම්කරුවන් දෙදෙනකු ඒ සම්බන්ධයෙන් සමථයක් ඇතිකර ගැනීමට අකමැත්ත පළ කර ඇති බව නීතිඥවරිය සඳහන් කළාය.
මොහිදීන් බාවා නවුෆර් සහ ලෙබ්බෙ තම්බි ජෙස්මින් යන පෙත්සම්කරුවන් මෙම පෙත්සම් දිගටම පවත්වාගෙන යාමට අවශ්‍ය බවට උපදෙස් ලබා දී ඇති බව ඇය සඳහන් කළාය.
අදාළ අත්අඩංගුවට ගැනීමේ සිද්ධිය හේතුවෙන් රාජ්‍ය සේවකයන් වන ඔවුන්ගේ උසස් වීම් සහ වැටුප් වර්ධක සම්බන්ධයෙන් ගැටලුකාරී තත්ත්වයක් ඇතිවී ඇති බැවින් පෙත්සම් දිගටම පවත්වාගෙන යාමට ඔවුන් අදහස් කරන බව ද නීතිඥවරිය සඳහන් කළාය.
ඒ අනුව අදාළ පෙත්සම් සලකා බැලීම නොවැම්බර් මස 19 වැනිදා සිදු කිරීමට විනිසුරු මඬුල්ල තීරණය කළේය.
හොරොව්පොතාන පොලිසියේ හිටපු පොලිස් ස්ථානාධිපති රොෂාන් සංජීව එම පොලිසියේ නිලධාරීන් සහ කැබිතිගොල්ලෑව පොලිස්ථානාධිපතිවරයා, අපරාධ පරීක්ෂණ දෙපාර්තමේන්තු ස්ථානාධිපතිවරයා, පොලිස්පතිවරයා, නීතිපතිවරයා. ඇතුළු පිරිසක් මෙම පෙත්සම්වල වගඋත්තරකරුවන් ලෙස නම් කර සිටියහ.
පාස්කු ඉරුදින ත්‍රස්ත ප්‍රහාරයෙන් පසුව ලැබුණු පැමිණිලි කිහිපයක් මත මෙම පෙත්සම්කරුවන් අත්අඩංගුවට ගැනීමට පොලිසිය විසින් කටයුතු කර තිබුණි.
ඔවුන්ගේ බැංකු ගිණුම්වලට රුපියල් කෝටි 100කට ආසන්න මුදලක් ලැබුණු බවට මාධ්‍ය වාර්තා පළ වී තිබුණි.
