වෙඩි වැදී මියගිය ගුවන් සෙබළාගේ නැන්දා කියයි
පොලිස් වෙඩිතැබීමෙන් මිය ගිහින් තිබෙන්නේ මගේ අයියාගේ දරුවා. පොඩි කාලේ ඉඳන් ඒ දරුවා හදාගත්තේ මමයි.එයා අපරාධයකට සම්බන්ධ වෙන කෙනෙක් නොවෙයි. ඔය මොරගහහේනේ වෙඩි තැබීම වුණු දවසේ මගේ දරුවා ඉඳලා තිබෙන්නේ වත්තල සුපිරි වෙළෙඳසලක එයා යාළුවෙලා ඉන්න ගෑනු ළමයත් එක්ක.එකොළහි ගාණකට වත්තල හිටපු ළමයෙක් ඒ වෙලාවටම මොරගහහේනේදී වෙඩි තියන්නේ කොහොමද. මේ විදිහට හොයන්නේ බලන්නේ නැතිව මේ කොල්ලෝ මරලා දාන එක නවත්තන්න. අපේ දරුවාට වුණු අසාධාරණයට හරි විමර්ශනයක් කර දෙන්නැයි බලධාරීන්ගෙන් ඉල්ලා සිටිනවාÓයැයි පාදුක්ක අංගමුව ප්රදේශයේදී පොලිස් වෙඩි පහරකින් මියගිය ගුවන් සෙබළාගේ නැන්දනියක වන මල්ලිකා රාජපක්ෂ මහත්මිය පැවසුවාය.
හොරණ මාලොස්ඇළ ප්රදේශයේදී ත්රී රෝද රථයක ගමන් ගත් පුද්ගලයන් දෙදෙනකුට වෙඩි තබා ඝාතනය කිරීමේ සිද්ධියේ ප්රධාන සැකකරු බවට පොලිසිය හඳුනාගත් ගුවන් හමුදා සෙබළකු වන රාජපක්ෂ පතිරගේ දිලන්ත ලක්මාල් රාජපක්ෂ යන සැකකරු පාදුක්ක අංගමුව ප්රදේශයේදී පොලිසියට වෙඩි ප්රහාරයක් එල්ල කිරීම හේතුවෙන් පොලිසිය ද ප්රතිප්රහාර එල්ල කිරීමේදී වෙඩි පහරකට ලක්ව බරපතළ තත්ත්වයෙන් පාදුක්ක ප්රාදේශීය රෝහලට ඇතුළත් කිරීමෙන් පසු ඊයේ (08) අලුයම මියගොස් තිබුණි.
ඒ සම්බන්ධයෙන් වූ මහේස්ත්රාත් පරීක්ෂණය අවිස්සාවේල්ල මහේස්ත්රාත් ජනක ප්රසන්න සමරසිංහ මහතා විසින් කළ අතර වැඩිදුර සාක්ෂි කැඳවීම මේ මස 25 වැනි දින අවිස්සාවේල්ල මහෙස්ත්රාත් අධිකරණය දී විභාග කිරීමට නියමිතය.
අදාළ වෙඩි තැබීම සම්බන්ධයෙන් ඝාතනයට ලක් වූ ගුවන් හමුදා කෝප්රල් දිලන්ත ලක්මාල් රාජපක්ෂ යන අයගේ නැන්දා වන මල්ලිකා රාජපක්ෂ මහත්මිය වැඩිදුරටත් මෙසේ ද කීවාය. මේ රටේ කවදද සාධාරණයක් ඉටු වුණේ. පොලිසියට මොනවා හරි දෙයක් ඔප්පු කරගන්න බැරි වුණාම අහිංසක දරුවෙක් බලෙන් අරන් ගිහින් වෙඩි තියලා මරලා දානවා. මගේ දරුවා මිනී මරන්න තියා සතෙකුටවත් ගලකින් ගහන දරුවෙක් නෙමෙයි. මේ රටේ යුක්තියක් තිබෙනවනම් කවුරුහරි කමක් නෑ ඉදිරිපත් වෙලා අර වත්තල සුපිරි වෙළෙඳසලේ ආරක්ෂිත කැමරා පරීක්ෂා කර අපට සාධාරණයක් ඉටු කරන්න.
අපි කියනවාට ඒ කැමරා ටික බලලා අපට සාධාරණයක් ඉටු කරන්න බැරි නම් මේ රටේ යුක්තියක් නෑ. හැමදාම කොතැන බැලුවත් අහිංසකයෙක් මරලා දානවා බල්ලො වගේ. පස්සේ තුවක්කුවක් විසි කරනවා.ඔය මගේ දරුවට වෙඩි තියපු තැන වැටිලා තිබුණු දුරකථනය එයාගේ එක නෙමෙයි. හෙල්මට් එක එයාගේ එක නෙමෙයි.ඒ සෙරෙප්පු එයාගේ නෙමෙයි. සෙරෙප්පුවල සයිස් වෙනස්. ඉතින් අපි කොහොමද මේ කියන ඒවා පිළිගන්නේ.
ගමේ අය කියනවා එතැන එක වෙඩි ශබ්දයයි ඇහුණේ කියලා. ඒ වුණාට මගේ දරුවාගේ ඇඟේ වෙඩි පහර පහක් තිබෙනවා. පොලිසිය වෙඩි පහක් තියලා මගේ දරුවත් වෙඩි තිබ්බානම් වෙඩි සද්ද කීයක් ඇහෙන්න ඕනෑද. මේ දරුවා මත්ද්රව්ය පාවිච්චි කරනවද නැද්ද කියා මේ ගමේ අයගෙන් අහන්න පුළුවන්. දැන් මට මගේ දරුවා නැතිවෙලා ඉවරයි.හැබැයි එයාට සාධාරණයක් ඉටු කරන්න ඕනෑ. ඒකයි මම පොලිස්පති ඇතුළු හැමෝගෙන්ම ඉල්ලන්නේයිද පැවසුවාය.
මීගොඩ බී.කේ. කත්රිආරච්චි