තරුණ කෘෂි ව්‍යවසායකත්ව ගම්මානවල පවුල් සඳහා ලබා දී ඇති ප්‍රතිලාභ අවභාවිත මෙන්ම නිසි ලෙස ප්‍රයෝජනයට නොගත් අය පිළිබඳ වහාම විමර්ශනයක් සිදු කරන ලෙස කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා අමාත්‍යාංශ නිලධාරීන්ට උපදෙස් දී ඇත.
ඇතැම් ගම්මානවල ප්‍රතිලාභීන් තමන්ට ලබා දුන් ප්‍රතිලාභ වෙනත් පාර්ශ්වලට අලෙවි කර ඇති බවටත් ලබා දුන් උපකරණ මෙන්ම පැළ හා බීජ නිසි ලෙස ප්‍රයෝජනයට නොගෙන විනාශ වෙන්නට ඉඩ හැර ඇති බවටත් තොරතුරු කෘෂිකර්ම හා වැවිලි කර්මාන්ත අමාත්‍යාංශයට වාර්තා වී තිබිණි. මේ සම්බන්ධයෙන් අවධානය යොමු කළ ඇමැති අමරවීර මහතා මේ ප්‍රතිලාභ නිසි ලෙස යොදා නොගන්නා පුද්ගලයන් හා පවුල්වලට මින්පසු කිසිදු ප්‍රතිලාභයක් ලබා නොදෙන ලෙසත් මේ පිළිබඳ විමර්ශනයක් කරන ලෙසත් දැනුම් දී තිබේ. තරුණ කෘෂි ව්‍යවසායකත්ව ගම්මාන වැඩපිළිවෙළ යටතේ දැනට හම්බන්තොට, වවුනියාව, මොනරාගල. ගාල්ල හා කුරුණෑගල මෙන්ම අනුරාධපුර දිස්ත්‍රික්ක කිහිපයක ගම්මාන 11ක් තරුණ කෘෂි ව්‍යවසායකත්ව ගම්මාන ලෙස සංවර්ධනය කිරීම ආරම්භ කර තිබේ. විශේෂයෙන් තරුණ ප්‍රජාව කෘෂිකර්මාන්තය සඳහා ආකර්ෂණය කර ගැනීම සඳහා ඔවුන්ට නව කෘෂි තාක්ෂණය හඳුන්වා දීම මෙන්ම නව බීජ වර්ග, අස්වනු අලෙවි කර ගැනීම සඳහා වෙළෙඳපොළ හඳුන්වා දීම ආදි කටයුතු රැසක් ක්‍රියාත්මක කර ඇත. එමෙන්ම මෙම සෑම කෘෂි ව්‍යවසායකත්ව ගම්මානයකම පිහිටි වැව් පද්ධතියම ප්‍රතිසංස්කරණය කරනු ලබන අතර ගොවිපළවලට ජලය ලබා ගැනීම සඳහා වාරි පහසුකම්ද ස්ථාපිත කිරීමට පියවර ගෙන ඇත. මීට අමතරව ආරක්ෂිත ගෘහ තුළ වගා කිරීම, විසිරි ජල තාක්ෂණික උපකරණ, බින්දු ජල තාක්ෂණික උපකරණ මෙන්ම දුරස්ථ පාලනය මඟින් ක්‍රියාත්මක කළ හැකි ආරක්ෂිත ගෘහ හඳුන්වා දීම ද මෙම වැඩපිළිවෙළ යටතේ මෙම ගම්මාන 11 තරුණ ප්‍රජාවට ලබා දී ඇත.
