ණය ප්‍රතිව්‍යුහගත කිරීම පිළිබඳ අවබෝධතා ගිවිසුම (MOU) අත්සන් කිරීමෙන් පසු පවතින ‘යෙන් ණය ව්‍යාපෘති’ හෙවත් ජපන් රජයේ ණය ආධාර මත මෙරට ක්‍රියාත්මක වන ව්‍යාපෘති කඩිනමින් යළි ආරම්භ කරමින් ශ්‍රී ලංකාවේ සංවර්ධනයට තවදුරටත් සහාය දැක්වීම ජපානයේ අභිප්‍රාය බව ජපාන විදේශ කටයුතු අමාත්‍ය යෝකෝ කමිකාවා මහත්මිය ප්‍රකාශ කළාය.
ශ්‍රී ලංකාවේ විදේශ කටයුතු අමාත්‍ය අලි සබ්රි මහතා සමඟ අද (04) පස්වරුවේ ඒකාබද්ධ මාධ්‍ය හමුවක් අමතමින් කමිකාවා මහත්මිය, ජාතික සංහිඳියාව සඳහා ශ්‍රී ලංකාව ගෙන යන ප්‍රයත්නයන්ට අඛණ්ඩව සහාය දැක්වීමට ජපානයේ අභිප්‍රාය ප්‍රකාශ කළාය.
මේ අතර, ශ්‍රී ලංකාවේ ආර්ථිකය සාමාන්‍යකරණය කිරීම සඳහා ශ්‍රී ලංකාව දැනට සිදු කරමින් සිටින විවිධ ප්‍රතිසංස්කරණ සියල්ල අත්‍යවශ්‍ය බව ඇය පැවසුවාය.
නිදහස් සහ විවෘත ඉන්දු – පැසිෆික් කලාපයක් උදෙසා ශ්‍රී ලංකාවට සාමුද්‍රික ක්ෂේත්‍රයේ සහාය ලබාදීමටද ජපානය සූදානම් බව ජපාන විදේශ කටයුතු අමාත්‍යවරිය කියා සිටියාය.
ඒ සඳහා ‘සෝනාර්’ තාක්ෂණයෙන් සන්නද්ධ යාත්‍රාවක් ශ්‍රී ලංකාවට ලබාදෙන බවද ඇය සඳහන් කළාය.
හැකි ඉක්මනින් ශ්‍රී ලංකාව ආර්ථික සංවර්ධනය සඳහා නැවත යථා තත්ත්වයට පත් කර ඉන්දියන් සාගරයේ කේන්ද්‍රස්ථානය ලෙස තවදුරටත් ප්‍රගතියක් අත්කර ගනු ඇතැයි ජපානය බලාපොරොත්තු වන බව ඇය පැවසුවාය.
මෙරට නිල ණය හිමියන්ගේ කමිටුවේ සම සභාපති ලෙස කටයුතු කරමින් ජපානය ශ්‍රී ලංකාවට ලබාදෙන සහාය පිළිබඳව විදේශ කටයුතු අමාත්‍ය අලි සබ්රි මහතා මෙහිදී ජපාන විදේශ කටයුතු අමාත්‍යවරියට ස්තුතිය පළ කළේය.
