- මගේ ආරක්ෂකයන් සම්බන්ධ බව දැනගත්තේ පසුවයි
- හිටපු පාර්ලිමේන්තු මන්ත්රී හිරුණිකා ප්රේමචන්ද්ර මහාධිකරණයේදී කියයි
අපරාධය සිදුවූදා උදේ දොස්තර රාජිත සේනාරත්න සමඟ ඔහුගේ කාර්යාලයේ සාකච්ඡාවක නිරතව හිටියා. මේ සිදුවීමට මගේ කිසිම සම්බන්ධයක් නැහැ. සිද්ධියට මගේ ආරක්ෂකයන් සම්බන්ධ බව දැනගත්තේ පසුවයි. ඒ වෙලාවේ මම ඔවුන්ට හොඳටම දොස් කිව්වා. පොලිසියට ඔවුන් භාර දී අවශ්ය සහාය දුන්නා. ඒ අය නඩුවේ මුල් අවස්ථාවේදීම වරද පිළි ගත්තා. උසාවිය ඔවුන්ට අත්හිටුවූ සිර දඬුවම් හා දඩ මුදල් නියම කර තිබෙනවා යැයි හිටපු පාර්ලිමේන්තු මන්ත්රී හිරුණිකා ප්රේමචන්ද්ර මහත්මිය කොළඹ මහාධිකරණය ඉදිරියේ කියා සිටියාය.
මහාධිකරණ විනිසුරු අමල් රණරාජා මහතා ඉදිරියේ පසුගියදා (03) මෙම නඩුව විභාගයට ගත් අවස්ථාවේ විත්ති කූඩුවේ සිට ප්රකාශයක් කරමින් හිරුණිකා එරංජලී ප්රේමචන්ද්ර මහත්මිය තවදුරටත් මෙසේ කිව්වාය.
මම 2015 වසරේ දෙසැම්බර් 21 වැනිදා දොස්තර රාජිත සේනාරත්න මහතා හමුවෙන්න උදේ 9.00ට පමණ ඔහුගේ කාර්යාලයට ගියා. එහිදී අප දේශපාලන සාකච්ඡාවක් කළා. සාකච්ඡාව අවසන් කර දහවල් 12.00ට – 12.30ට පමණ කොළොන්නාවේ කාර්යාලයට ආවා. එදා මහජන දිනයක්. මිනිස්සු ඔවුන්ගෙ ප්රශ්න කියන්න, මගෙන් විසඳුම් ලබා ගන්න සෑහෙන පිරිසක් ඇවිත් හිටියා. සිද්ධිය වූ දවසේ මිනිස්සු 100ක් 150ක් පමණ මගේ කාර්යාලයේ හිටියා. මට වැඩ අධික දවසක්. මහජනයා හමුවීමෙන් පසු කොළඹ නගර සභාවේ තිබුණු උත්සවයකට යා යුතුව තිබුණා.
මම කලබලයෙන් කාර්යාලයට එන විට එහි සිටි පිරිස අතර මේ නඩුවේ සෙසු විත්තිකරුවන් වන මගේ රැකවළුන් ද සිටියා. එයට අමතරව අමිල ප්රියංග නමැති අය හා ඇන්තනි ද සිටියා. “මැඩම් මේ මිනිහා මගේ ගෑනි අරන් ගියා. එයා ආපහු ගෙනත් දෙන්න කියලා මේ මිනිහාට කියන්න” කියලා ඇන්තනි මගෙන් ඉල්ලීමක් කළා. මම දෙපැත්තෙන්ම කාරණය ඇහුවා. “මම චමිලාව බලෙන් අරගෙන ගියේ නැහැ. එයා කැමැත්තෙන්ම ආවා.” කියලා අමිල ප්රියංග කිව්වා. “මට පරක්කු වෙනවා, නගර සභාවේ උත්සවයකට යන්න තියෙනවා.” කියලා මම උත්සවයට ගියා.
පසුව දෙමටගොඩ පොලිසියෙන් රෙදි කඩයක වැඩ කළ තරුණයකු පැහැර ගැනීමේ සිදුවීමට මගේ ඩිපෙන්ඩර් රථය යොදාගෙන ඇති බව දැන්වූවා. මගෙන් අහන්නේ නැතිව මේ සිදුවීමට ඩිපෙන්ඩරය ගෙන යෑම ගැන ආරක්ෂකයන්ට දොස් කිව්වා. පොලිසියට අවශ්ය සහාය දුන්නා. උවමනා නම් කොළොන්නාව කාර්යාලයේ සීසීටීවී දර්ශන දෙන්න පුළුවන් කියලා කිව්වා යැයි විත්තිකාරිය කියා සිටියාය.
2015 දෙසැම්බර් 21 වැනිදා හෝ ඊට ආසන්න දිනෙක දෙමටගොඩ රෙදිපිළි වෙළෙඳසළක සේවය කළ අමිල ප්රියංකර අමරසිංහ නමැති තරුණයා පැහැරගෙන ගොස් අතින් පහරදී තුවාල කිරීම හා එයට අනුබල දීමේ චෝදනාව යටතේ හිරුණිකා ප්රේමචන්ද්ර මහත්මිය ඇතුළු විත්තිකරුවන් 9 දෙනකුට එරෙහිව චෝදනා ගොනු කර ඇත. නීතිපතිවරයා විසින් විත්තිකරුවන්ට එරෙහිව 2016 වසරේ ජූලි 25 වැනිදා අධිචෝදනා 24ක් යටතේ නඩු පවරා තිබේ.
අධිචෝදනා පත්ර කියවා භාර දුන් අවස්ථාවේ හිරුණිකා එරංජලී ප්රේමචන්ද්ර මහත්මිය ඇතුළු විත්තිකරුවන් තමන්ට එරෙහිව නඟා ඇති සියලු චෝදනාවන්ට නිවැරදිකරුවන් ලෙස උත්තර ද බඳින ලදි. පසුව සෙසු විත්තිකරුවන් ඔවුන්ට එරෙහිව නඟා තිබුණු චෝදනාවන්ට 2017 වසරේ නොවැම්බර් 06 වැනිදා වරද පිළි ගන්නා ලදි. ඉන්පසු 9 වැනි විත්තිකාරියට විරුද්ධව පමණක් නඩු විභාගය ක්රියාත්මක වේ. දණ්ඩ නීති සංග්රහයේ 113 (අ), 102 වගන්ති සමඟ කියවිය යුතු 356 වගන්තිය යටතේ සහ 140 වැනි වගන්තිය යටතේ වගඋත්තරකරුවන්ට එරෙහිව නඩු පවරා තිබේ.
නඩුව විභාගයේදී විශ්රාමික සහකාර පොලිස් අධිකාරී චන්ද්රතිලක, සහකාර පොලිස් අධිකාරී නෙවිල් සිල්වා, ප්රධාන පොලිස් පරීක්ෂක නිමල් ප්රේමතිලක යන මහත්වරු සහ කොළඹ හිටපු සහකාර අධිකරණ වෛද්ය නිලධාරී ඩී.අයි.සී. රත්නායක මහත්මිය සාක්ෂි දීම කළහ. මෙයට අමතරව දෙමටගොඩ “ලකී ප්ලාසා” වෙළෙඳ සංකීර්ණයේ හිමිකරුවකු වන කලීල් මොහොමඩ් සෆ්රි යන අය ද පැමිණිල්ල වෙනුවෙන් සාක්ෂි දෙන ලදි. විත්තිය ඔවුන්ගෙන් දීර්ඝ ලෙස හරස් ප්රශ්න විමසීමට ලක් කළේය. සිද්ධියට අදාළ මුල් පැමිණිල්ල කළ “ලකී ප්ලාසා” වෙළෙඳ සංකීර්ණයේ සමහිමිකරු වන ඒ.සී.එම්. මන්සූර් මේ වන විට මිය ගොස් ඇත.
විත්තිය වෙනුවෙන් හිරුණිකා ප්රේමචන්ද්ර මහත්මිය පමණක් සාක්ෂි දෙන ලදි. දෙපාර්ශ්වයේ සාක්ෂි මේ වන විට ඉදිරිපත් අවසන්ව ඇති බැවින් ඉදිරි නඩු දිනයේ දේශන ඉදිරිපත් කිරීමට නියමිතය. ඉන්පසු තීන්දුව සඳහා දින නියම කිරීම සිදුවේ. නියෝජ්ය සොලිසිටර් ජෙනරාල් ජනක බණ්ඩාර මහතා පැමිණිල්ල වෙනුවෙන්ද නීතිඥ අශාන් ප්රනාන්දු විත්තිය වෙනුවෙන් පෙනී සිටියේය.
චන්දන ජයවීර