රුපියල් ලක්ෂ 8ක මුදලකට වාලම්පුරි 2ක් අලෙවි කිරීමට පුත්තලම පාලවිය ප්‍රදේශයට පැමිණි සැකකරුවකු පුත්තලම කොට්ඨාස අපරාධ විමර්ශන අංශයේ නිලධාරීන් විසින් පෙරේදා (4) සවස අත්අඩංගුවට ගෙන තිබේ.
මෙසේ අත්අඩංගුවට ගෙන ඇත්තේ වරාකාපොළ බුලත්කොහුපිටිය ප්‍රදේශයේ පදිංචි 22 හැවිරිදි තරුණයෙකි. පුත්තලම නියෝජ්‍ය පොලිස්පති නාලක සිල්වා මහතාට ලැබුණු පෞද්ගලික තොරතුරු මත මේ වැටලීම සිදු කර ඇත. අජීව බෙල්ලකු බලපත්‍රයක් නැතිව සන්තකයේ තබාගැනීමේ වරදට අදාළ සැකකරු අත්අඩංගුවට ගෙන තිබූ අතර, ප්‍රශ්න කිරීමේදී මේ සැකකරු පවසා ඇත්තේ තම මවුපියන් විසින් වසර ගණනාවකට පෙර කොළඹ ප්‍රදේශයේදී මිල දී ගෙන නිවෙසේ තබා තිබුණු බවයි. කෙසේ වෙතත් වාලම්පුරිය සමඟ අත්අඩංගුවට ගැනුණු සැකකරු ඊයේ (5) පුත්තලම අධිකරණයට ඉදිරිපත් කිරීමට නියමිතව තිබිණි.
පුත්තලම කොට්ඨාස අපරාධ විමර්ශ අංශයේ ස්ථානාධිපති (ප්‍ර.පො.ප) එච්.ආර්.ඒ. චන්ද්‍රසිරිලාල් මහතා සමඟ (පො.කො) 68611 නිශාන්ත, 83736 ජයසුන්දර, 87157 සමීර, 80171 බාලසූරිය (පො.කො. රියැදුරු) යන නිලධාරීන් වැටලීමට එක්ව තිබිණි.
පුත්තලම අතිරේක - හිරාන් ප්‍රියංකර ජයසිංහ