ලාල් කාන්ත මහත්තයා සමාජවාදය අතහැරීම ගැන සතුටු වන බවත් දැන් අනුර සහ ටිල්වින් මහත්වරුන්ගේ වාරය බවත් එක්සත් ජනරජ පෙරමුණේ නායක, පාර්ලිමේන්තු මන්ත්රී පාඨලී චම්පික රණවක මහතා පැවැසීය.
එම පක්ෂයේ මාධ්ය හමුවකට එක්වෙමින් ඒ මහතා මේ බව සඳහන් කළේය.
සමගි ජන බලවේගය සහ ජාතික ජන බලවේගය ආර්ථික විවාදය දෙපැත්තට ඇද ඇද නොඉඳ එහි නායකයන් හා ආර්ථික කණ්ඩායම් අතර විවාදය සිදු කරන්නැයි ඉල්ලා සිටින බව ද හෙතෙම කීවේය.
කම්කරු දිනය දේශපාලන පක්ෂයක් විදිහට සමරන්න ඕන යැයි නොහිතන බවත් කම්කරු දිනය කළ යුත්තේ වෘත්තිය සමිති සහ කම්කරුවන්ම එකතුවී බවත් ඒ මහතා කියා සිටියේය.
මන්ත්රීවරයා වැඩිදුරටත් මෙසේද පැවැසීය.
සෙනඟ පැත්තෙන් ගත්තොත් ජාතික ජන බලවේගය තමයි පිළිවෙළයි, සෙනඟයි දෙකම. ඒක පුදුමෙකුත් නැහැ. ජනතා විමුක්ති පෙරමුණ ඔවුන්ට එක මන්ත්රී ධුරයක්වත් නැතුවත්, එක්දාස් නමසිය හැත්තෑ ගණන්වල විශේෂයෙන්ම හැටපහ, හැත්තෑව අතරෙත් ඒ වගේම විශේෂයෙන්ම හැත්තෑ හතෙන් පස්සෙත් ඊට පස්සේ ජවිපෙ තහනම් කරාට පස්සේ ඒගොල්ලන්ගේ වෘත්තීය සමිති හැටියටත් එහෙම පවත්වලා තියෙනවා.
යූටියුබ් එහෙක එහෙම අදහසක් එන විදිහට කියලා තියෙනවා මාත් දැක්කා. මටත් ඒ ගැන කවුරු හෝ එවලා මමත් ඒක බැලුවා…. ලාල්කාන්ත, ලාල්කාන්ත සහෝදරයා කොම්රේඩ් ලාල්කාන්ත, ලාල්කාන්ත මහත්තයා වීම ගැන අපිට හරි සතුටුයි. අපිත් ඕක තමයි නිරන්තරයෙන්ම කිව්වේ ජනතා විමුක්ති පෙරමුණට ඔය පැරණි මාක්ස්වාදී හැව අත්හරින්න කියලා. සමහරු මං දැක්කා ඒ අයගේ පෙළපාළිවල කාල්මාක්ස්, එංගල්ස්, ලෙනින් නැති එක ගැන. රතු මැයි රැලිය නැති එක ගැන ප්රශ්න කරලා තිබුණා. අපි දකින්නේ ඒක ප්රගතියක් පැත්තට ගත්ත පියවරක් හැටියට. මොකද කාල්මාර්ක්ස් එංගල්ස්ලා ඒවා දර්ශනයක් හැටියට හැදෑරුවට කමක් නැහැ. නමුත් ඒවා ප්රායෝගිකව මහ පොළොවේ ක්රියාත්මක කරන්න පුළුවන් දේවල් නෙමෙයි. සමාජවාදය අවසන් වගේ එහෙමත්. දැන් කොහෙවත් පැරණි සමාජවාදය නැහැ. ඒ වගේ යථාර්ථය පිළි අරගෙන මම හිතන්නේ ජනතා විමුක්ති පෙරමුණේ ඔය තියෙන වෙබ් අඩවියෙනුත් ඔය තමන් මාක්ස්වාදී පක්ෂයක් කියන එක අත්හැරලා ඔය දෑකැත්තයි, මිටියයි අයින් කරලා, මොකද පරිගණක යුගයේ චිප් යුගය. ඉතින් ඒකට සරිලන විදිහේ පක්ෂයක් බවට පරිවර්තනය වෙනවා නම් ගොඩක් ලොකු විශ්වාසයක් ඇති වෙයි. එහෙම නැතුව යටින් එකක් තියාගෙන උඩින් තව එකක් කියන කියන ප්රමාණයට සැකය, බිය වර්ධනය වීම තමයි වෙන්නේ. ලාල්කාන්ත මහත්මයා එහෙම එකක් කියලා තියෙනවා නම්, අපි ඉතාම සතුටුයි දැන් අනුර දිසානායක මහත්තයාගෙත්, ටිල්වින් සිල්වා මහත්තයාගේත් වාරය.
නුවන් කොඩිකාර