- සෙබළ බිරියත් බරපතළ තුවාල ලබා රෝහලේ
- සැකකාර සෙබළා පොලිසියට භාර වෙයි
ගයාන් කුමාර වීරසිංහ, සොරණාතොට සමූහ – සී. ගමගේ, උෟව වෙල්ලස්ස විශේෂ – ඩී.එස්. ගුණතිලක
යුද හමුදා සෙබළකු එල්ල කළ මෝල්ගස් ප්‍රහාරයකින් බරපතළ තුවාල ලැබූ පදියතලාව පොලිස් ස්ථානාධිපතිවරයා සහ යුද හමුදා සෙබළාගේ බිරිය බරපතළ තුවාල ලබා පෙරේදා (4) මහියංගණ සහ බදුල්ල ශික්ෂණ රෝහලට ඇතුළත් කළ බව පදියතලාව පොලිසිය පවසයි. මෙසේ තුවාල ලබා ඇත්තේ පදියතලාව පොලිසියේ පොලිස් ස්ථානාධිපති ලෙස කටයුතු කරමින් සිටි 52 හැවිරිදි බිබිල ප්‍රදේශයේ පදිංචි ප්‍රධාන පොලිස් පරීක්ෂකවරයකු යැයි පොලිසිය පැවැසීය. ඔහු දැනට බදුල්ල ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් පසුවෙන බවද පොලිසිය පැවැසීය.
යුද හමුදා සෙබළාගේ පහරදීමෙන් බරපතළ තුවාල ලැබූ පදියතලාව සරණගම ප්‍රදේශයේ පදිංචි 32 හැවිරිදි යුද හමුදා සෙබළාගේ බිරියද මහියංගණ රෝහලට ඇතුළත් කරනු ලැබිණැයි පොලිසිය පැවසීය.
මෙම පොලිස් ස්ථානාධිපතිවරයා කලක පටන් මෙම සැකකාර යුද හමුදා සෙබළාගේ බිරිය සමඟ අනියම් සබඳතාවක් පවත්වා ගෙන ගොස් ඇති බවත්, සැකකාර යුද හමුදා සෙබළා නිවෙසේ නොසිටි අවස්ථාවේ පොලිස් ස්ථානාධිපතිවරයා එම කාන්තාවගේ නිවෙසට ගොස් සිටියදී පෙරේදා (4) අලුයම එක්වරම හොර රහසේ නිවෙසට පැමිණ ඇති සැකකාර යුද හමුදා සෙබළා මෙසේ නිවෙසේ තිබූ මෝල්ගසින් පොලිස් ස්ථානාධිපතිවරයාටත්, සෙබළාගේ බිරියටත් පහරදී ඇතැයි පොලිසිය සඳහන් කළේය. මෙම සිද්ධියෙන් අනතුරුව සැකකාර යුද හමුදා සෙබළා මහියංගණ පොලිසියට ගොස් භාරවී ඇත. සැකකාර යුද හමුදා සෙබළා දියතලාව යුද හමුදා කඳවුරට අනියුක්තව සේවය කරන බවද පොලිසිය පැවැසීය. දැනට බදුල්ල ශික්ෂණ රෝහලේ දැඩි සත්කාර ඒකකයේ ප්‍රතිකාර ලබන ප්‍රධාන පොලිස් පරීක්ෂකවරයාගේ තත්ත්වය බරපතළ බවද රෝහල් ආරංචි මාර්ග පැවැසීය.
පොලිස් ස්ථානාධිපතිවරයා සම්බන්ධයෙන් විනය විමර්ශනයක් පැවැත්වීම සඳහා කටයුතු කරන බවත් ඔහුව එම ස්ථානයෙන් ඉවත්කිරීමට ජාතික පොලිස් කොමිෂන් සභාවට පොලිස්පති මඟින් දැනුම්දෙන බවත් උසස් පොලිස් නිලධාරියෙක් පැවැසීය. පදියතලාව පොලිසිය වැඩිදුර පරීක්ෂණ පවත්වයි.
