කොටිකාවත්ත දෙල්ගහවත්ත පාරේ ඉසුරු උයන නිවාස සංකීර්ණයේ නිවෙසකට රාත්‍රි කාලයේදී ඇතුළු වී ඇති සොරෙක් එහි තිබූ භාණ්ඩ රැසක් සොරාගෙන ගොස් තිබේ.
හෙයා ඩ්‍රයර් එකක්, වාහන සේදීමේ යන්ත්‍රයක්, ගෑස් සිලින්ඩරයක් සහ ආරක්ෂාවට සවිකර තිබූ CCTV කැමරාවක් ද ගලවා ගෙන ගොස් ඇත.
නි‍ෙවසේ හිමිකරු මේ පිළිබඳව වැල්ලම්පිටිය පොලිසිය වෙත පැමිණිලි කිරීමෙන් පසු අපරාධ විමර්ශන අංශයේ ස්ථානාධිපති පොලිස් පරීක්ෂක ඉසුරු ශාමික මහතා විසින් පරීක්ෂණ සිදුකොට සැකකරුවෙකු අත්අඩංගුවට ගෙන තිබේ.
ඔහුගෙන් වැඩිදුරටත් සිදු කරන ලද ප්‍රශ්න කිරීම්වලදී ඔහු විසින්ම පසුගිය පෙබරවාරි මාසයේදී ද එම නි‍ෙවස කොල්ලකා ඇති බව හෙළි වී තිබේ.
සොරා ගන්නා ලද වාහන සේදීමට ගන්නා යන්ත්‍රය මාතර වලස්මුල්ල ප්‍රදේශයේ පුද්ගලයෙකුහට විකුණා තිබියදී සොයා ගෙන තිබේ. අනෙකුත් භාණ්ඩ ද මෙලෙස විවිධ පුද්ගලයන්හට විකුණා තිබියදී සොයා ගැනීමට හැකි වී ඇත.
මෙම සැකකරුට සොරාගෙන තිබූ භාණ්ඩ විකිණීම සඳහා උදවු කළ තැනැත්තෙකු ද අත්අඩංගුවට ගෙන තිබේ.
නිවෙස කොල්ලකෑ බව කියන සැකකරු අත්අඩංගුවට පත් වන අවස්ථාවේ ඔහු සන්තකයේ තිබී හෙරොයින් ග්‍රෑම් 2යි මිලිග්‍රෑම් 200ක් ද පොලිස් භාරයට ගෙන තිබේ.
සැකකරුවන් දෙදෙනාම ඊයේ (05) අධිකරණය වෙත ඉදිරිපත් කිරීමට පියවර ගෙන තිබුණි.
මුල්ලේරියාව - සිරිසේන ගමගේ