අක්කර භාගයක මිරිස් වගාවෙන් මාස නවයක් තුළදී රුපියල් මිලියන 12ක ආදායමක් ඉපැයූ අනුරාධපුර තිරප්පනේ පුලියන්කුලම ග්රාමයේ තරුණ ගොවි මහතකු වු බන්දුල මුණසිංහ මහතා සහ අක්කරයක කොමඩු වගාවෙන් මාස දෙකකින් රුපියල් මිලියන 4ක ආදායමක් ඉපැයූ ගල්කුලම ප්රදේශයේ පදිංචි බුද්ධික සුදර්ශන තරුණ ගොවි මහතා ඊයේ (18) පස්වරුවේ ජනාධිපති කාර්යාලයේදී ජනාධිපති රනිල් වික්රමසිංහ මහතා හමුවිය.
සිය අස්වැන්නෙන් කොටසක් රැගෙන මෙලෙස ජනාධිපතිවරයා හමුවූ මෙම තරුණ ගොවි මහතුන් තමන්ට සරුසාර අස්වැන්නක් ලබා ගැනීමට මඟ පෙන්වමින් රජයේ කෘෂිකර්ම නවීකරණ වැඩසටහන ක්රියාත්මක කිරීම පිළිබඳ ජනාධිපතිවරයා වෙත සිය ස්තූතිය පිරිනැමීය.
බන්දුල මුණසිංහ මහතා කෘෂිකර්ම අමාත්යාංශයේ කෘෂි නවීකරණ ව්යාපෘතිය හඳුන්වා දී තිබෙන අධි ඝනත්ව වගා ක්රමය භාවිතා කරමින් අක්කර භාගයක මෙම මිරිස් වගාව සිදු කර තිබේ.
සාම්ප්රදායික ක්රමය යටතේ අක්කර භාගයක වගා කළ හැකි මිරිස් පැළ ප්රමාණය පැළ 6000ක් පමණ වුවත් මෙම අධි ඝනත්ව වගා ක්රමය යටතේ වගා කළ හැකි මිරිස් පැළ ප්රමාණය 13,000ක් දක්වා ඉහළ ගොස් ඇත. එම නිසා ලබාගත හැකි අස්වැන්න කිහිප ගුණයකින් ඉහළ නැංවීමට මෙම නව ක්රමය යටතේ හැකි වූ බව ඒ මහතා සඳහන් කළේය.
අනුරාධපුර තිරප්පනය ප්රාදේශීය ලේකම් කොට්ඨාසයේ ගල්කුලම ප්රදේශයේ පදිංචි බුද්ධික සුදර්ශන ගොවි මහතා 39 හැවිරිදි දෙදරු පියෙකි.
නවීන තාක්ෂණය යොදා ගනිමින් අක්කරයක සිදු කළ කොමඩු වගාවෙන් ඉහළ අස්වැන්නක් ලබා ගැනීමට හැකි වූ බවත් කොමඩු කිලෝ එකක් රුපියල් එකසිය අසූවක පමණ මුදලකට අලෙවි කිරීමෙන් තමන්ට මෙම ඉහළ ආදායම ලබා ගැනීමට හැකි වූ බවත් ඒ මහතා මහතා සඳහන් කෙළේය.
රට තුළ කෘෂිකර්මාන්තයේ විප්ලවීය පරිවර්තනයක් ඇති කිරීමට ආණ්ඩුව ගෙන යන වැඩපිළිවෙළේදී මෙවන් තරුණ ගොවි මහතුන් මහඟු ආදර්ශයක් බව පෙන්වා දුන් ජනාධිපතිවරයා ඔවුන්ගේ මෙහෙවර අගයමින් සිහිවටන තිළිණ ද පිළිගැන්වීය.
කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා ද මෙම අවස්ථාවට එක්ව සිටියේය.