මහරගම නගර මධ්‍යයේ ඇති බෝගසේ අත්තක් පෙරේදා (28) රාත්‍රි 7ට පමණ වර්ෂාවත් සමඟ ඇතිවූ සුළං තත්ත්වය හමුවේ හදිසියේ කඩා වැටීමෙන් මාර්ගයේ ගමන් ගත් කාන්තාවක සහ පුද්ගලයකු තුවාල ලබා කළුබෝවිල ශික්ෂණ රෝහලට ඇතුළත් කළ බව මහරගම පොලිසිය පවසයි.
අනතුරින් මෝටර් රථයකට ත්‍රිරෝද රථ දෙකකට හා යතුරුපැදියකට හානි සිදුව ඇති බව පොලිසිය කියයි. අනතුර සිදුවන අවස්ථාවේ දී අධික වර්ෂාව සහ සුළං තත්ත්වයක් පැවති අතර එම අවස්ථාවේ දී බෝගසෙහි හයිලෙවල් මාර්ගයේ දෙසට පිහිටා තිබූ අඩි 70ක් පමණ දිගින් යුත් අත්තක් මෙසේ කඩා වැටීමෙන් අනතුර සිදුව තිබූ බව පොලිසිය කියයි.
අනතුරත් සමඟ හයිලේවල් මාර්ගයේ වාහන ධාවනයට සම්පූර්ණයෙන්ම බාධා එල්ල වී තිබූ අතර පොලිසිය හා නගර සභාව එක්ව විනාඩි කිහිපයක් ඇතුළත මාර්ගය යථා තත්ත්වයට පත් කළ බව පොලිසිය පවසයි. රෝහල්ගත කළ දෙදෙනාගේ තත්ත්වය සාමාන්‍ය බව පොලිසිය පවසයි.
මෙම බෝගසෙහි අනතුරුදායක අතු කපා ඉවත් කර දෙන ලෙසත් අලුයම් කාලයේදී මෙම අනතුර සිදු වූයේ නම් ජීවිත හානි රැසක් සිදුවීමට ඉඩ තිබිණි. එබැවින් මේ පිළිබඳ අවධානය යොමු කොට කඩිනමින් අනතුරුදායක අතු කපා ඉවත් කර දෙන ලෙසට ජනතාව බලධාරීන්ගෙන් ඉල්ලා සිටි.
සිද්ධිය සම්බන්ධයෙන් මහරගම පොලිසියේ ස්ථානාධිපති ප්‍රධාන පොලිස් පරීක්ෂක චේලක රාජපක්ෂ මහතාගේ උපදෙස් මත ප්‍රධාන පොලිස් පරීක්ෂක නිශාන්ත අල්විස් මහතාගේ මෙහෙයවීමෙන් ඉදිරි පරීක්ෂණ පවත්වති.
කොට්ටාව - ප්‍රදීප් කුමාර