ප්‍රංශයේ පැරිස් නුවරදී ලබන ජූලි මාසයේදී පැවැත්වෙන ඔලිම්පික් උලෙළට ඍජු සුදුසුකම් ලබාගත් 20 හැවිරිදි බැඩ්මින්ටන් ක්‍රීඩක විරේන් නෙත්තසිංහ ඔලිම්පික් උලෙළ නියෝජනය කරන ලොව ළාබාලතම බැඩ්මින්ටන් ක්‍රීඩකයා බවට ඉතිහාසගත වෙයි.
ක්‍රීඩා අමාත්‍යාංශය වැය කළ රුපියල් ලක්ෂ 82ක වියදමින් දින 41ක් පුරා රටවල් 11කදී එක දිගට තරගාවලි නියෝජනය කළ විරේන් මේ තරග වාරය තුළදී ලකුණු 24,050ක් රැස් කර රටවල් 208කින් පැරිස් ඔලිම්පික් ක්‍රීඩා උලෙළට සුදුසුකම් ලබාගත් 32 වැනි ක්‍රීඩකයා බවට පත්විය.
වසර 2021දී ජාත්‍යන්තර බැඩ්මින්ටන් තරග නියෝජනය කරද්දී ලෝක ශ්‍රේණිගත කිරීමේ 887 වැනි ස්ථානයේ සිටි විරේන් මේ වන විට එම ලෝක නාමාවලියේ 72 වැනි ස්ථානය දක්වා වේගයෙන් ඉහළට පැමිණ සිටියි. ඔලිම්පික් නීති රෙගුලාසි අනුව එක් රටකින්, එක් ඉසව්වකට සහභාගි වීමට වරම් හිමිවන්නේ ක්‍රීඩකයන් දෙදෙනකුට පමණක් වන අතර එළැඹෙන පැරිස් ඔලිම්පික් උලෙළේදී ශ්‍රී ලංකා ධජය යටතේ ඔහු පිරිමි ඒකල අංශයෙන් තරග බිමට පිවිසේ.
ඔලිම්පික් සුදුසුකම් ලබා ගැනීමෙන් අනතුරුව ක්‍රීඩා අමාත්‍යංශ ඩන්කන් වයිට් ශ්‍රවණාගාරයේ පැවති මාධ්‍ය හමුවේදී විරේන් නෙත්තසිංහ පැවසුවේ ශ්‍රී ලංකාව වෙනුවෙන් පදක්කමක් ජයග්‍රහණය සඳහා සිය උපරිමය සිදු කරන බවය.
ශ්‍රී ලංකා බැඩ්මින්ටන් සංගමයේ සභාපති රොහාන් ද සිල්වා මහතා පැවසුවේ බැඩ්මින්ටන් ක්‍රීඩා පිටි 20ක් සහිත ගෘහස්ථ ක්‍රීඩාංගණයක් ඇත්නම් ශ්‍රී ලංකාවට ඔලිම්පික් ජය ගැනීම අපහසු නොවනු ඇති බවය. “අපට රජයෙන් නිරවුල් ඉඩමක් දෙනවා නම් තව තවත් දක්ෂයන් බිහි කරන්න හැකියාව තිබෙනවා. අපට අවශ්‍ය හොඳ ජාත්‍යන්තර පුහුණුකරුවෙක් හා ගෘහස්ථ ක්‍රීඩාංගණයක් පමණයි” සිල්වා මහතා පැවසීය.
ක්‍රීඩා අධ්‍යක්ෂ ජනරාල් මහාචාර්ය (රියර් අද්මිරාල්) ෂෙමාල් ප්‍රනාන්දු මහතා විරේන්ට සුබාශිංසන එක් කළ අතර, ඔලිම්පික් උලෙළ දක්වා විදෙස්ගතවී පුහුණුවීමට අවශ්‍ය සහයෝගය ලබාදීමට සූදානම් බව ද පැවසීය. ක්‍රීඩා ඇමැති හරීන් ප්‍රනාන්දු මහතාගේ ආශීර්වාදය මේ වෙනුවෙන් ලබාදුන් බවත් ක්‍රීඩා අධ්‍යක්ෂ ජනරාල්වරයා සඳහන් කළේය.
2012 වසරේදී නිලූක කරුණාරත්න පරිසාධන මට්ටම පසු කර ඍජු ලෙස ඔලිම්පික් වරම් දිනාගත් අතර ඉන් අනතුරුව එවැනි දස්කමක් කළ ශ්‍රී ලංකා බැඩ්මින්ටන් ක්‍රීඩකයා විරේන් නෙත්තසිංහ පමණි.
ප්‍රින්ස් ගුණසේකර
