දිගු කලක සිට මහා පරිමාණ කසළ තේ ගබඩා දෙකක් පවත්වාගෙන ගිය පුද්ගලයන් දෙදෙනකු එම කසළ තේ කිලෝග්‍රෑම් 27,367ක් සමඟ ගම්පොළ විශේෂ කාර්ය බළකා නිලධාරීන් පිරිසක් විසින් පෙරේදා (25) දවුලගල පොලිස් වසමේදී අත්අඩංගුවට ගෙන තිබේ.
පොලිස් විශේෂ කාර්ය බළකායේ නිලධාරීන් පිරිසකට ලද තොරතුරක් මත දවුලගල පොලිස් වසමේ කැටකුඹුර, ලීමගහකොටුව ස්ථානයේ හා ගම්පොළ නවකුරුඳුවත්ත පොලිස් වසමේ ලැන්ටන් හිල් ප්‍රදේශයේදී වැටලීමක් සිදු කර ඇත. එහිදී භාවිතයට නුසුදුසු බවට සැක කෙරෙන කසළ තේ කිලෝග්‍රෑම් 27,367ක් ගබඩා කරගෙන සිටි ලීමගහකොටුව, උලපනේ ප්‍රදේශයේ පදිංචි අවුරුදු 38 සහ 60 වයස්වල පසු වන දෙදෙනකු අත්අඩංගුවට ගෙන වැඩිදුර විමර්ශන කටයුතු සඳහා දවුලගල සහ නවකුරුඳුවත්ත පොලිස් ස්ථාන වෙත භාර දී ඇති බව පොලිස් විශේෂ කාර්ය බළකාය පවසයි.
සිලෝන් ටී නමින් ජාත්‍යන්තරයේ ප්‍රසිද්ධ ශ්‍රී ලංකාවෙ තේවලට ඇති ඉල්ලුම පහත හෙළීමට මේ කසළ තේ මගින් සිදු වන හානිය අතිමහත්ය. මේ සම්බන්ධයෙන් දැඩි විමසිල්ලෙන් සිටින විශේෂ කාර්ය බළකාය නිරන්තරයෙන් මේ කසළ තේ ජාවාරම්කරුවන් සම්බන්ධව විමසිලිමත්ව සිටිමින් ඔවුන් අත්අඩංගුවට ගැනීමට කටයුතු කරයි. මේ වන විට විශේෂ කාර්ය බළකාය මෙවැනි වැටලීම් බොහෝ ප්‍රමාණයක් සිදු කර ශ්‍රී ලංකාවෙ ප්‍රධාන විදෙස් විනිමය ගෙන එන තේ කර්මාන්තය සුරැකීමට ඍජු දායකත්වයක් දක්වා ඇත.
පොලිස් විශේෂ කාර්ය බළකාය ගම්පොළ කඳවුරේ නිලධාරීන්ට ලද තොරතුරකට අනුව පොලිස් විශේෂ කාර්ය බළකාය අණදෙන නිලධාරි ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ නියෝග හා උපදෙස් පරිදි ජ්‍යෙෂ්ඨ පොලිස් අධිකාරී කේ.ඒන්.එන්. ප්‍රනාන්දු මහතා මහතාගේ අධික්ෂණයෙන්, සහකාර පොලිස් අධිකාරි අබේරත්න මහතාගේ මෙහෙයවීමෙන් විශේෂ කාර්ය බළකාය ගම්පොළ කඳවුරේ පොලිස් පරික්ෂක කේ.ඩී.ජී.පී. වික්‍රමරත්න ඇතුළු නිලධාරීන් කණ්ඩායමක් විසින් මේ වැටලීම කර තිබේ.
