පොලිස් මත්ද්‍රව්‍ය නාශක කාර්යාංශයේ නිලධාරීන් විසින් මාලිගාවත්ත ප්‍රදේශයේ පදිංචි නදින් බාසික් නමැත්තා අත්අඩංගුවට ගැනීම වළක්වමින් නිකුත් කර තිබූ අතුරු තහනම් නියෝගයක් ලබන මැයි මස 29 වැනිදා තෙක් බලපවත්වන පරිදි දීර්ඝ කිරීමට අභියාචනාධිකරණය ඊයේ (29) තීරණය කළේය.
මත්ද්‍රව්‍ය කාර්යාංශයේ නිලධාරීන් පිරිසක් විසින් අත්තනෝමතික සහ අසාධාරණ ලෙස තමන්ව අත්අඩංගුවට ගැනීමේ සූදානමක් ඇති බැවින් එය වළක්වන ලෙස ඉල්ලා නදීන් බාසික් නමැත්තා ඉදිරිපත් කළ රිට් පෙත්සමක් කැඳවූ අවස්ථාවේදී මෙම අතුරු තහනම් නියෝගය දීර්ඝ කරන ලදි.
අභියාචනාධිකරණ විනිසුරු ඩී.එම්. සමරකෝන් මහතා හමුවේ මෙම පෙත්සම කැඳවන ලදි.
එහිදී නීතිපතිවරයා වෙනුවෙන් පෙනී සිටි රජයේ නීතිඥවරිය මෙම පෙත්සම සම්බන්ධයෙන් විරෝධතා ගොනු කිරීම සඳහා අවසර ලබා දෙන ලෙස ඉල්ලා සිටියාය.
ඒ අනුව අදාළ විරෝධතා ගොනු කිරීම සඳහා කල් ලබා දීමට විනිසුරුවරයා තීරණය කළේය.
පෙත්සම්කරු සිය පෙත්සමෙහි සඳහන් කර ඇත්තේ තමන් මහමඟ ගමන් කරමින් සිටියදී සිවිල් ඇඳුමින් සැරසී යතුරුපැදිවලින් පැමිණි පිරිසක් විසින් තමන් අත්අඩංගුවට ගැනීමට සූදානම් වූ බවය. එම අවස්ථාවේදී තමා පලා ගිය බව පෙත්සම්කරු විසින් සඳහන් කර ඇත. අනතුරුව මත්ද්‍රව්‍ය නාශක කාර්යාංශයේ නිලධාරීන් විසින් මාලිගාකන්ද අධිකරණයට කරුණු වාර්තා කිරීමෙන් අනතුරුව තමන් අත්අඩංගුවට ගැනීමට සූදානම් වන බවට තොරතුරු ලැබී ඇති බව පෙත්සම්කරු කියයි.
ඒ සම්බන්ධයෙන් පෙත්සම්කරු වෙනුවෙන් පෙනී සිටි ජ්‍යෙෂ්ඨ නීතිඥ අශෝක වීරසූරිය මහතා ඉදිරිපත් කළ කරුණු සලකා බැලීමෙන් අනතුරුව පෙත්සම්කරු අත්අඩංගුවට ගැනීම වළක්වමින් අතුරු තහනම් නියෝගයක් අභියාචනාධිකරණය විසින් මීට පෙර නිකුත් කරන ලදි.
පොලිස්පතිවරයා, මත්ද්‍රව්‍ය නාශක කාර්යාංශයේ නිලධාරීන් පිරිසක් සහ නීතිපති මෙහි වගඋත්තරකරුවෝ වෙති.
නෙල්කා මැදගෙදර
