සිංගප්පූරු ජාතිකයකුට අයත් මෙරට පුද්ගලික ඇගලුම් සමාගමක රුපියල් ලක්ෂ පනස් හතරක් වටිනා කොටස් ඔහුට නොදන්වා විකුණු බව කියන සිද්ධියක් සම්බන්ධයෙන් විමර්ශනයක් ආරම්භ කළ බව අපරාධ පරීක්ෂණ දෙපාර්තමේන්තුවේ මූල්‍ය හා අපරාධ විමර්ශන කොට්ඨාසය කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ ඊයේ (29) කරුණු වාර්තා කළේය.
‘කෙවි යූවායින් යන්ග්“ නමැති මේ සිංගප්පූරු ජාතිකයා අදාළ ඇඟලුම් සමාගම පවත්වාගෙන යමින් සිට 2008 වසරේදී ඔහුගේ රටට ගොස් සිටියදී මේ කොටස් විකුණා ඇති බවට සමාගමේ කොටස් හිමි වයි. ආර්. ඩබ්ලිව් විජේගුණවර්ධන නමැත්තෙකු කළ පැමිණිල්ලකට අනුව මේ විමර්ශනය ආරම්භ කළ බව අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කළේය.
අදාළ සමාගමේ හිමිකරු ශ්‍රි ලංකාවේ නොමැති අවස්ථාවේදී රුපියල් 54,166,666ක් වටිනා කොටස් විකුණා වංචා කළ බවට කරන්නාගොඩ,වරකාගොඩ පදිංචි විජේගුණවර්ධන යන අය කළ පැමිණිල්ලට අදාළව අධිකරණයට කරුණු වාර්තා කරනු ලැබ තිබුණේ අපරාධ පරීක්ෂණ දෙපාර්තමේන්තුවේ මූල්‍ය හා අපරාධ විමර්ශන කොට්ඨාසයේ පොලිස් පරීක්ෂක අසේල මහතා විසිනි.
මේ පෞද්ගලික ඇඟලුම් සමාගම 2005 වසරේදී ආරම්භ කළ බවත් ඔහු 2008 වසරේදී සමාගම ප්‍රිතිව් සිරාජ් දොරේන් නමැත්තාට භාරදී ඔහුගේ රටට එනම් සිංගප්පූරුවට ගොස් ඇති බවත් පැමිණිලිකරු සිය පැමිණිල්ලේ සඳහන් කර ඇතැයි අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර තිබිණ.
මේ සමාගමේ කොටස්කරුවකු ලෙසින් ද සිටින තමාට මෙන්ම සිංගප්පූරු ජාතික හිමිකරුට නොදන්වා අදාළ සමාගම භාරදී ගිය තැනැත්තා සියලු කොටස් විකුණා ඇතැයි පැමිණිලිකරු සිය පැමිණිල්ලෙන් දක්වා ඇතැයි අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර ඇත.
ඒ අනුව මේ සිද්ධිය සම්බන්ධයෙන් විමර්ශන පවත්වා ප්‍රගතිය වාර්තා කරන තෙක් නඩුව බහා තබන ලෙසට අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය.
ඉදිරිපත් වූ කරුණු සැලකිල්ලට ගත් අධිකරණය සිද්ධිය සම්බන්ධයෙන් විමර්ශන පවත්වා අධිකරණයට කරුණු වාර්තා කරන ලෙස අපරාධ පරීක්ෂණ දෙපාර්තමේන්තුවට නියෝග කරමින් නඩුව බහා තැබීය.
නිමන්ති රණසිංහ