ශ්රී ලංකා නිදහස් පක්ෂයේ වැඩබලන සභාපතිවරයා ලෙස තමන් පත් කිරීම වළක්වාලමින් කොළඹ දිසා අධිකරණය විසින් නිකුත් කළ වාරණ නියෝගය හෝ ඒ සම්බන්ධ කිසිදු දැනුම්දීමක් හෝ ලේඛනයක් තමන්ට මෙතෙක් ලැබී නොමැති අතර එම නියෝගය පිළිබඳ මාධ්ය මගින් තමා දැනගත් බව අධිකරණ ඇමැති විජයදාස රාජපක්ෂ මහතා සිය නීතිඥවරයා මඟින් ඊයේ (29) අභියාචනාධිකරණයට දන්වා සිටියේය. අදාළ වාරණ නියෝගය විසුරුවා හරින ලෙස ඉල්ලා ගොනුකර ඇති ප්රතිශෝධන පෙත්සමක් අභියාචනාධිකරණ විනිසුරු ඩී.එන්. සමරකෝන් මහතා හමුවේ කැඳවූ අවස්ථාවේ දී පෙත්සම්කාර අධිකරණ ඇමැති විජයදාස රාජපක්ෂ මහතා වෙනුවෙන් පෙනී සිටි ජනාධිපති නීතිඥ ආචාර්ය රොමේෂ් ද සිල්වා මහතා මේ බව සඳහන් කළේය.
එහි දී ජනාධිපති නීතිඥවරයා සඳහන් කළේ සිය සේවා දායකයා වෙත
කිසිදු ලේඛනයක් ලබාදීමෙන් තොරව මෙන්ම කිසිදු දැනුම් දීමකින් තොරව කොළඹ දිසාධිකරණය මගින් අදාළ වාරණ නියෝගය ලබා ගැනීමට දුමින්ද දිසානායක, ලසන්ත අලගියවන්න සහ මහින්ද අමරවීර කටයුතු කර ඇති බව ය.
අදාළ වාරණ නියෝගය ලබාගත් බව සිය සේවා දායකයා දැනුම් දැනුම්වත් වී ඇත්තේ මාධ්ය මගින් බව ද අදාළ වාරණ නියෝගය පිටපතක් ලබා ගත්තේ මාධ්ය හරහා බව ද ජනාධිපති නීතිඥවරයා තවදුරටත් සඳහන් කළේය.
එහි දී දිසා අධිකරණයට අදාළ නඩුව ගොනු කළ දුමින්ද දිසනායක, ලසන්ත අලගියවන්න, මහින්ද අමරවීර යන මහත්වරු වෙනුවෙන් අධිකරණය හමුවේ පෙනී සිටි ජනාධිපති නීතිඥ චන්දක ජයසුන්දර මහතා සඳහන් කළේ අදාළ පෙත්සම සහ වාරණ නියෝගය සම්බන්ධයෙන් වන ලියකියවිලි විජයදාස රාජපක්ෂ මහතාගේ නීතිඥවරයාට ලබා දීමට කටයුතු කරන බවය.
කෙසේ වුවද අදාළ වාරණ නියෝගයට එරෙහිව අභියාචනාධිකරණයට ගොනු කර ඇති මෙම ප්රතිශෝධන පෙත්සම සම්බන්ධයෙන් කිසිදු ලේඛනයක් තමන්ට ලැබී නොමැති බව ජනාධිපති නීතිඥවරයා සඳහන් කළේය. තත්ත්වය එසේ වුවත් මෙම පෙත්සම මුල් අවස්ථාවේදීම නිෂ්ප්රභ කරන ලෙස තමන් අභියාචනාධිකරණයෙන් ඉල්ලා සිටින බව ඒ මහතා සඳහන් කළේය. මෙම පෙත්සමට අදාළව වගඋත්තරකරුවන්ට නොතීසි නිකුත් කිරීම සහ අතුරු තහනම් නියෝගයක් නිකුත් කිරීම සම්බන්ධයෙන් තමා විරෝධය පළ කරන බව ද ජනාධිපති නීතිඥවරයා සඳහන් කළේය.
එහිදී ඔහු සඳහන් කළේ දිසා අධිකරණය විසින් දෙන ලද මෙම වාරණ නියෝගයට එරෙහිව නියෝගයක් ලබා ගැනීමට නම් එම අධිකරණයටම ඉල්ලීමක් කළ යුතු බවය. එහෙත් මේ වන තෙක් කිසිදු පාර්ශ්වයකින් එවැනි ඉල්ලීමක් ඉදිරිපත් වී නොමැති බව ද ඒ මහතා පෙන්වා දුන්නේය.
එවැනි ඉල්ලීමක් ඉදිරිපත් වී එය ප්රතික්ෂේප වූ අවස්ථාවක ඊට එරෙහිව අභියාචනාධිකරණයට පැමිණීමේ අවස්ථාව ඇති නමුත් එම අධිකරණයට ඉල්ලීමක් නොකර මුල් අවස්ථාවේදීම අභියාචනාධිකරණය ට පැමිණීමට නීත්යනුකූල බලයක් නොමැති බව ද ඔහු සඳහන් කළේය.
එසේම එවැනි පෙත්සමක් විභාගයට ගැනීමට අභියාචනාධිකරණයට බලයක් නොමැති බව ද ජනාධිපති නීතිඥවරයා සඳහන් කළේය. කෙසේ වුවද මෙහි දී විනිසුරු ඩී.එන්. සමරකෝන් මහතා පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥවරයාගෙන් ප්රශ්න කර සිටියේ මෙම ප්රතිශෝධන පෙත්සම සම්බන්ධයෙන් වගඋත්තරකාර පාර්ශ්වයන්ට දැනුම් දීමක් කර තිබේද යන්නය.
එහිදී ජනාධිපති නීතිඥවරයා කියා සිටියේ අදාළ නොතීසි දන්වා යැවූ බවය. කෙසේ වුවද එවැනි කිසිදු නොතීසියක් හෝ ලියවිල්ලක් තමන්ට නොලැබුණු බව වගඋත්තරකරුවන් වෙනුවෙන් පෙනී සිටි නීතිඥවරු අධිකරණයට කරුණු ඉදිරිපත් කළහ. කරුණු සලකා බැලූ විනිසුරුවරයා මෙම පෙත්සම සම්බන්ධයෙන් සෙසු පාර්ශ්වයන්ට නිසි ලෙස නොතීසි දන්වා යැවීමෙන් අනතුරුව කරුණු විමසීමට තීරණය කළේය. ඒ අනුව මැයි මස දෙවැනි දා නැවත පෙත්සම කැඳවීමට තීරණය කෙරිණි.
නෙල්කා මැදගෙදර