රජය ගැසට් පත්‍රයක් මඟින් ප්‍රකාශයට පත් කර ඇති මිහින්තලේ රක්ෂිතය නමින් හඳුන්වන ප්‍රදේශයේ අක්කර 18ක පමණ භූමියක් ව්‍යාපාරිකයකු විසින් බලහත්කාරයෙන් අල්ලා ගෙන එකී භූමිය සඳහා ව්‍යාජ බලපත්‍ර හතරක් සකස් කිරීමේ සිද්ධිය සම්බන්ධයෙන් අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරි තිළිණ හේවාපතිරණ මහතාගේ නියෝග මත අනුරාධපුර විශේෂ අපරාධ විමර්ශන අංශය මඟින් විශේෂ කඩිනම් විමර්ශනයක් ආරම්භ කොට තිබේ.
මෙම විමර්ශනය ආරම්භ කර ඇත්තේ ව්‍යාජ බව කියන අදාළ ඉඩම් බලපත්‍ර සම්බන්ධයෙන් අනුරාධපුර විශේෂ අපරාධ විමර්ශන අංශයට
පැමිණිලි කරන ලෙසට අනුරාධපුර අතිරේක මහෙස්ත්‍රාත් කංචනා නර්ථනා අභිමානි සෙනවිරත්න මෙනවිය අනුරාධපුර අඩවි වන නිලධාරි සුමිත් සුවාරිස් මහතාට ලබා දුන් නියෝගයකට අනුව අඩවි වන නිලධාරි සුමිත් සුවාරිස් මහතා අනුරාධපුර විශේෂ අපරාධ විමර්ශන අංශයට කළ පැමිණිල්ලකට අදාළවය.
ඒ අනුව වන සංරක්ෂණ දෙපාර්තමේන්තුවේ අනුරාධපුර අඩවි වන නිලධාරි සුමිත් සුවාරිස් මහතා සිය පැමිණිල්ල මඟින් අනුරාධපුර විශේෂ අපරාධ විමර්ශන අංශයට දැනුම් දී ඇත්තේ රජය ගැසට් පත්‍රයක් මඟින් ප්‍රකාශයට පත් කර ඇති මිහින්තලේ රක්ෂිතය නමින් හඳුන්වන ප්‍රදේශයේ අක්කර 18ක පමණ භූමියක් ඔලුපොතගේ සුමින්ද සේනාධීර නමැති ව්‍යාපාරිකයකු විසින් බලහත්කාරයෙන් නීති විරෝධීව අල්ලා ගෙන ඉන් අක්කර 6ක් ගිනි තබා විනාශ කර ඇති බවයි.
එකී අක්කර 18ක භූමිය සහිත ඉඩම සඳහා මිහින්තලේ ප්‍රාදේශීය ලේකම්වරයා විසින් නිකුත් කළ බව කියන බලපත්‍ර හතරක් අදාළ ව්‍යාපාරිකයා විසින් ඉදිරිපත් කරන ලද බව ද පොලිසියට පවසා ඇති අඩවි වන නිලධාරිවරයා එම බලපත්‍රවල නිත්‍යානුකූලභාවය පිළිබඳව වන සංරක්ෂණ අධ්‍යක්ෂ ජනරාල්වරයා මිහින්තලේ ප්‍රාදේශීය ලේකම්වරයාගෙන් ලිඛිතව විමසීමක් කළ බව ද පවසා ඇත. ව්‍යාපාරිකයා විසින් ඉදිරිපත් කරන ලද අදාළ බලපත්‍ර සම්බන්ධයෙන් කිසිඳු සටහනක් හෝ ලේඛනයක් තම ප්‍රාදේශීය ලේකම් කාර්යාලය සතුව නොමැති බව මිහින්තලේ ප්‍රාදේශීය ලේකම්වරයා විසින් වන සංරක්ෂණ අධ්‍යක්ෂ ජනරාල්වරයාට ලිඛතව දන්වා ඇති බව ද අඩවි වන නිලධාරිවරයා පොලිසියට ප්‍රකාශ කොට තිබේ.
ප්‍රශ්නගත මෙම බලපත්‍ර හතර අතරින් එක් බලපත්‍රයකට අනුරාධපුර හිටපු මහ දිසාපති ටී. කේ. දසනායක මහතාගේ බව කියන අත්සනක් තබා ඇති බවත් එහෙත් එකී අත්සන ද හිටපු මහ දිසාපති ටී.කේ. දසනායක මහතාගේ නොවන බවට මිහින්තලේ ප්‍රාදේශීය ලේකම්වරයා විසින් වන සංරක්ෂණ අධ්‍යක්ෂ ජනරාල්වරයාට ලිඛිතව දන්වා ඇති බව ද අඩවි වන නිලධාරිවරයා ස්වකීය පැමිණිල්ල මගින් තවදුරටත් පොලිසියට පවසා ඇත. ඒ අනුව මෙම ඉඩම් බලපත්‍ර හතරම කූඨ ලෙස සකසන ලද ව්‍යාජ ඒවා බවට සැක කරන්නේ යැයි ද? පොලිසියට පවසා ඇති අඩවි වන නිලධාරි සුමිත් සුවාරිස් මහතා මේ සම්බන්ධයෙන් විශේෂ විමර්ශනයක් කර අධිකරණ ක්‍රියාමාර්ග ගන්නා ලෙසට ඉල්ලීමක් කර තිබේ.
අදාළ ව්‍යාපාරිකයා නීතිවිරෝධීව අත්පත් කර ගෙන ඇති භූමිය රක්ෂිතයක් බවට රජය ප්‍රකාශයට පත් කර ඇති ගැසට් පත්‍රය සහ ව්‍යාපාරිකයා විසින් ඉදිරිපත් කර ඇති ව්‍යාජ බව කියන ඉඩම් බලපත්‍ර සහ එම ඉඩම් බලපත්‍රවල නිත්‍යානුකූලභාවය පිළිබඳව වන සංරක්ෂණ අධ්‍යක්ෂ ජනරාල්වරයා විසින් මිහින්තලේ ප්‍රදේශීය ලේකම්වරයාගෙන් ලිඛිතව විමසීම් කරන ලද ලිපිය සහ එකී ඉඩම් බලපත්‍ර සම්බන්ධයෙන් මිහින්තලේ ප්‍රාදේශීය ලේකම් කාර්යාලය සතුව කිසිඳු සටහනක් හෝ ලේඛනයක් නොමැති බවට මිහින්තලේ ප්‍රාදේශීය ලේකම්වරයා විසින් ලිඛිතව දන්වා ඇති ලිපිය ද විමර්ශන කටයුතු සඳහා අඩවි වන නිලධාරිවරයා විසින් පොලිසියට ලබා දී තිබීම විශේෂත්වයකි.
අනුරාධපුර - උපාලි ආනන්ද