පක්ෂයේ උගත් හා තරුණ පිරිස්වලට අවස්ථාව දෙනවා:
මට සභාපතිකම එපා:
ශ්රීලනිපය විනාශ කරලා ඉවරයි: – හිටපු ජනපතිනී
2015 වසරේදී මෛත්රීපාල සිරිසේන මහතා ජනාධිපති අපේක්ෂකයා ලෙස පත් කිරීමට ගත් ඓතිහාසික වරද නිවැරදි කිරීම මෙන්ම පක්ෂය නිවැරදි දිශානතිය වෙත ගෙනයෑම වෙනුවෙන් මෛත්රීපාල සිරිසේන මහතාට එරෙහිව තමන් අධිකරණයට ගිය බව හිටපු ජනාධිපතිනි චන්ද්රිකා බණ්ඩාරනායක කුමාරතුංග මහත්මිය ප්රකාශ කළාය. ශ්රී ලංකා නිදහස් පක්ෂය අද වනවිට මුළුමනින්ම විනාශ වී ඇති බවත් ඒ සඳහා හිටපු ජනාධිපතිවරුන් වන මහින්ද රාජපක්ෂ මහතා හා මෛත්රීපාල සිරිසේන මහතා වගකිව යුතු බව ද චන්ද්රිකා බණ්ඩාරනායක කුමාරතුංග මහත්මිය අවධාරණය කළාය.
එමෙන්ම ශ්රී ලංකා නිදහස් පක්ෂය නිවැරදි කර පක්ෂය ශක්තිමත් කිරීම වෙනුවෙන් දායක වීමට තීරණය කළ අතර පක්ෂයේ සභාපති ධුරය කිසිසේත් භාරනොගන්නා බවද බණ්ඩාරනායක මහත්මිය සඳහන් කළාය.
පක්ෂයේ උගත් හා තරුණ පිරිස්වලට ප්රධාන තනතුරු ලබා දෙමින් පක්ෂයට අවශ්ය නායකත්වය දෙන අතර පක්ෂය නිවැරදි හා ශක්තිමත් ලෙස ගොඩනැඟීම පහසු නොවන බව ද සඳහන් කළාය.
හිටපු ජනාධිපතිනි චන්ද්රිකා බණ්ඩාරනායක මහත්මිය මේ බව සඳහන් කළේ කොළඹ පදනම් ආයතනයේදී ඊයේ (29) පැවැති මාධ්ය සාකච්ඡාවකට සහභාගී වෙමිනි.
එහිදී වැඩිදුරටත් බණ්ඩාරනායක මහත්මිය මෙසේද සඳහන් කළාය. ශ්රී ලංකා නිදහස් පක්ෂය එක්සත් ජාතික පක්ෂයට හේත්තු කිරීමේ කිසිම අවශ්යතාවක් නෑ. ඒ වගේම මගේ පුත් විමුක්ති කුමාරතුංග දේශපාලනයට සම්බන්ධ නොවන අතර පවුල් දේශපාලනයට තමන් අතීතයේ සිටම දැඩිව විරුද්ධ බව ද ඇය සඳහන් කළාය.
පසුගිය දිනවල මාධ්ය ඔස්සේ මම සම්බන්ධ කර ගනිමින් විවිධ මාධ්ය වාර්තා පළවුණා. ඒවා සම්බන්ධයෙන් පැහැදිලි කිරීම මෙන්ම තවත් කරුණ ගණනාවක් සම්බන්ධයෙන් පැහැදිලි කිරීම සඳහා මේ මාධ්ය සාකච්ඡාව පවත්වන්න තීරණය කළා.
මුලින්ම ශ්රී ලංකා නිදහස් පක්ෂය සම්බන්ධයෙන් පැහැදිලි කළ යුතුයි. ශ්රී ලංකා නිදහස් පක්ෂය මේ වනවිට බින්දුවටම වැටිලා. ඇත්තටම වැටිලා නොවෙයි. ඒ තත්ත්වයට පක්ෂය පත් කළා. එලෙස පක්ෂය මේ තැනට පත් කළේ හිටපු ජනාධිපතිවරුන් වන මහින්ද රාජපක්ෂ හා මෛත්රීපාල සිරිසේන දෙදෙනා. මේ රටේ ප්රධාන දේශපාලන බලවේග තුනක් තිබුණා. ශ්රී ලංකා නිදහස් පක්ෂය, එක්සත් ජාතික පක්ෂය, ජනතා විමුක්ති පෙරමුණ. ශ්රී ලංකා නිදහස් පක්ෂය පටන් ගත්තෙම මැද මාවතක යන ගමනක් වෙනුවෙන්. සියලු බලවේග ඒකරාශි කර ගනිමින් ශ්රී ලංකා නිදහස් පක්ෂය ගමන් කළා. නමුත් අද වනවිට පක්ෂයට සිදු වී තිබෙන මේ තත්ත්වය සමඟ ශ්රී ලංකා නිදහස් පාක්ෂිකයා අන්ත අසරණ වෙලා. අද වෙනකොට පක්ෂය කොටස් හත අටකට කැඩිලා. ශ්රී ලංකා නිදහස් පක්ෂය කියන්නේ වසර හතළිහක විතර කාලයක් වරින් වර රට පාලනය කළ පක්ෂයක්. නමුත් අද වනවිට පක්ෂය මේ ආකාරයට විනාශ වී ගිහින්. පක්ෂය ගොඩගැනීම, ශක්තිමත් කිරීම හිතන තරම් පහසු නැහැ. අසීරු කාර්යයක්. පක්ෂයට ආදරය කරන, දක්ෂ, තරුණ සියලු පිරිස් සමඟ පක්ෂය ශක්තිමත් කිරීමේ වැඩපිළිවෙළ ආරම්භ කරනවා.
අද වෙද්දී තිබෙන තවත් ගැටලුවක් තමයි අවංක, දක්ෂ, උගත් දේශපාලකයන් හිඟයි. අවංක, දක්ෂ පිරිස් නැහැ. අවංක දක්ෂ සුළු පිරිසක් තමයි පාර්ලිමේන්තුව මෙන්ම ප්රාදේශීය දේශපාලනයේ සිටින්නේ. අතිබහුතරය බලයට එන්නෙම හම්බ කිරීම වෙනුවෙන්. මේ ක්රමය වෙනස් කළ යුතුයි. වෙන කිසිම වෘත්තියක නිරත වෙන්න බැරි බහුතරයක් තමයි අද දේශපාලනයට එන්නේ. මේ තත්ත්වය බලාගෙන ඉන්න බැරිම තැන තමයි තරුණ පිරිස් අරගලය පටන් ගත්තේ. අරගලයේ නිරත වූ පිරිසක් මාවත් මුණ ගැහුණා.ඒ අය මගෙත් එක්ක සාකච්ඡා කළා. අරගලයේ නිරත වූ අති බහුතරය එකතු වුණේ මේ ක්රමය වෙනස් කිරීමටයි. ඒ වගේම අරගලයේ නිරත වූ සෑම දෙනකුම පාහේ උගත්, බුද්ධිමත් අය. මේ පිරිස අතර නීතිඥවරු, ඉංජිනේරුවන්, ආදි පිරිස් පවා හිටියා.
පසුගිය වකවානුවේ මෛත්රීපාල සිරිසේන මහතා විසින් පක්ෂය නිවැරදි ලෙස ගෙන ගියා නම් පක්ෂය ශක්තිමත් කිරීමට තිබුණා. නමුත් ඔහු පක්ෂය විනාශ කළා. ඒ වගේම 2015 වසරේදී මෛත්රීපාල සිරිසේන මහතා ජනාධිපති අපේක්ෂකයා බවට පත් කර කළේ ඓතිහාසික වරදක්. එය නිවැරදි කිරීම වෙනුවෙනුයි මම අධිකරණයට ගියේ. ශ්රී ලංකා නිදහස් පක්ෂය ශක්තිමත් කළ යුතුයි. ඒ වගේම එය මාසයකින් දෙකකින් කරන්න බැරිවෙයි. කාලයක් ගතවෙයි. නමුත් අපි සියලු දෙනා එකතු වෙලා එය ඉටු කරනවා. ඒ වගේම ශ්රී ලංකා නිදහස් පක්ෂයේ සභාපති ධුරය භාර ගැනීමේ කිසිම අරමුණක් මට නැහැ. පක්ෂයේ සිටින තරුණ, දක්ෂ පිරිස්වලට අවස්ථාව දෙමින් පක්ෂය ශක්තිමත් කිරීමයි මගේ අරමුණ. ඒ වගේම ශ්රී ලංකා නිදහස් පක්ෂය එක්සත් ජාතික පක්ෂයට විකිණීමේ කිසිම අරමුණක්ද මට නැහැ. මම ඉපදුණෙත්, මියයන්නෙත් ශ්රී ලංකා නිදහස් පාක්ෂිකයෙක් විදියටයි. ශ්රී ලංකා නිදහස් පක්ෂය ගොඩගන්න පුළුවන්නම් ඒ වෙනුවෙන් කළ හැකි සියල්ල කරමින් ඒ සඳහා සහාය දෙනවා.
ඒ වගේම මගේ පුතා කිසිම අවස්ථාවක දේශපාලනයට ගේන්නේ නැහැ. මම පවුල් දේශපාලනයට විරුද්ධයි. මම දේශපාලනයට ආවෙත් මගේ සහෝදරයා වෙනත් පක්ෂයකට ගියාම සහ මගේ මව දේශපාලනයෙන් සමුගත්තට පසුවයි. අපට දේශපාලන අරමුණු නැහැ. පක්ෂය නිවැරදි ලෙස සහ ශක්තිමත් ලෙස ගොඩනැඟීම එකම අපේක්ෂාවයි.
ශ්රී ලංකා නිදහස් පක්ෂය නිවැරදි මඟට යොමු කරමින්, පක්ෂය ශක්තිමත් කරනවා. ඒ වගේම වැරදි කරපු අයට අපෙන් අවස්ථාවක් ලැබෙන්නේ නැහැ. පක්ෂයේ ප්රධාන තනතුර නොගෙන පක්ෂයට ලබාදිය හැකි සියලු උපදෙස් දෙමින් සහාය ලබා දෙනවා. පක්ෂයේ වැඩ කරන්න පුළුවන් තරුණ පිරිස්වලට අවස්ථාව ලබා දෙනවායිද පැවසුවාය.
ස්වර්ණා විජේකෝන්