රජයේ විධායක නිලධාරීන්ගේ ඒකාබද්ධ කමිටුව නියෝජනය කරන වෘත්තීය සමිති 18ක ප්‍රධානත්වයෙන් අප්‍රේල් 2 සහ 3 දිනවල වෘත්තීය ක්‍රියාමාර්ග ගන්නා බවට දක්වමින් ඊයේ (29) නිකුත් කර ඇති අරුම පුදුම ලිපියක් ගැන තොරතුරු වාර්තා වේ.
ඒ අනුව අසනීප නිවාඩු වාර්තා කරමින් දෙදිනක් සේවයෙන් බැහැරවීමට විධායක නිලධාරීන්ගේ ඒකාබද්ධ කමිටුව තීරණය කර ඇති බවත් මේ සම්බන්ධව ලිඛිත දැනුම්දීමක් ජනාධිපති ලේකම්වරයා වෙත සිදුකර තිබෙන බවත් දැනගන්නට ඇත.
මේ බව ජනාධිපති අතිරේක ලේකම්වරයකු විසින් තහවුරු කර සිටි අතර එහි දී ඔහු සඳහන් කර සිටියේ, ” රාජ්‍ය අංශයේ වෘත්තිකයන් වර්තමානයේ මුහුණ දී ඇති ගැටලු සඳහා විසඳුම් ලබාදීමට රජය අපොහොසත්ත්වීම” යන ශීර්ෂයෙන් යුතුව 2024 අප්‍රේල් මස 29 වනදා නිකුත් කළ ලිපියක් රජයේ විධායක නිලධාරීන්ගේ ඒකාබද්ධ කමිටුව විසින් ජනාධිපති ලේකම්වරයා වෙත යොමුකර ඇති බවය.
වැටුප් විෂමතා ඉවත් කිරීම, වසර 8ක් තිස්සේ වැටුප් වැඩිවීමක් සිදුකර නොතිබීම, රාජ්‍ය සේවයේ විධායක නිලධාරීන් අතර උසස්වීම් ක්‍රමවේදයක් සැකසීම ඇතුළු කොන්දේසි 4ක් පදනම් කරගෙන අදාළ ලිපිය යොමුකර තිබෙන බව ද ඔහු සඳහන් කළේය. මෙම ඉල්ලීම් ලබාගැනීම සඳහා 2024-04-02 සහ 03 යන දෙදින අසනීප නිවාඩු වාර්තා කර සේවයෙන් බැහැර වන අතර තවදුරටත් තම ඉල්ලීම් ලබාදීම සම්බන්ධව නොසැලකිලිමත් වුවහොත් ඉදිරියේ දැඩි වෘත්තීය ක්‍රියාමාර්ග ගැනීමට යොමුවන බව ද එහි සඳහන් බවත් ඔහු පැවැසීය.
2024 අප්‍රේල් 2 වනදා සහ 3 වනදා අසනීප නිවාඩු දමා වෘත්තීය ක්‍රියාමාර්ග ගැනීම 2024 අප්‍රේල් මස 29 වනදා යොමුකරන ලිපියක් මඟින් දැනුවත් කිරීම ගැටලු සහගත බවත් රජයේ විධායක නිලධාරීන්ගේ ඒකාබද්ධ කමිටුව නියෝජනය කරන බව කියන රජයේ විධායක නිලධාරීන්ගේ වෘත්තීය සමිති 18ක කිසිවකු මේ සම්බන්ධව සංවේදී නොවූ බවක් පෙන්නුම් කෙරෙන බව ද ඔහු වැඩිදුරටත් සඳහන් කර සිටියේය.
ලංකා ඉතිහාසයේ දරුණුතම ආර්ථික අර්බුදයට මුහණදී ඉතාමත්ම දුෂ්කර තත්ත්වයක් යටතේ යළි ස්ථාවරභාවයකට පත්වෙමින් ඇති පසුබිමක මේ ආකාරයේ තර්ජනාත්මක වෘත්තීය කොන්දේසි ඉදිරිපත් කිරීම සාධාරණ නොවන බව තම පෞද්ගලික අදහස වන බව ද ඔහු සඳහන් කළේය.
ඒ සම්බන්ධව වැඩිදුරටත් අදහස් දැක්වූ ජනාධිපති අතිරේක ලේකම්වරයා මෙසේද පැවැසීය.
” ආර්ථික අර්බුදය අවස්ථාවේ මේ රටේ මිලියන 22ක ජනතාව, පොදුවේ දුෂ්කරතාවලට මුහුණ පෑවා. පෞද්ගලික අංශයේ වැටුප් කප්පාදු පවා සිදුවුණා. නමුත් රාජ්‍ය අංශයේ එවැන්නක් සිදුවුණේ නෑ. අනෙක් අතට රාජ්‍ය අංශයේ සාමාන්‍ය සේවකයන්ට වඩා ඉහළ වැටුපක්, ඉහළ වරප්‍රසාද ප්‍රමාණයක් විධායක නිලධාරීන් භුක්ති විඳිනවා. අනෙක් පසින් රාජ්‍ය අංශයේ වියදම් පාලනය කිරීමටත් සිදුව තිබෙනවා. මේ ඉදිරිපත් කර ඇති යෝජනා කිසිවක් හදිසියේ ක්‍රියාත්මක කළ නොහැකියි. ඒ නිසා මේ මොහොතේ රට ගොඩනඟන පොදු වැඩපිළිවෙළ සාර්ථක කර ගැනීම තුළ ප්‍රශ්න විසඳා ගැනීම මිස වෘත්තීය ක්‍රියාමාර්ග වෙත යොමුවීම මානුෂීය නොවන බව මගේ පෞද්ගලික අදහසයි. අපි පිළිගන්න ඕන විධායක නිලධාරීන්ට වඩා දුෂ්කරතාවන්ට මුහුණදී සිටින විශාල ප්‍රමාණයක් සිටින බව. ආර්ථික වශයෙන් අනාරක්ෂිත ජනතාවට වැඩි අවධානයක් දිය යුතුයි. අපි නිදහස් අධ්‍යාපනයෙන් නොමිලේ අධ්‍යාපනය ලබා, රජයේ ඉහළ තනතුරු ලැබූවන්, රටට අමාරුම මොහොතේ තමන් කරන දේ හරිද වැරදිද කියලා හෘද සාක්ෂියෙන් විමසිය යුතුයි. මේක මගේ පෞද්ගලික මතයයි. මම විශ්වාස කරනවා රජයේ විධායක නිලධාරීන් බහුතරය මගේ අදහස අනුමත කරයි කියලා.
