ශ්‍රී ලංකාවෙන් පැන ගොස් ඩුබායිහි පදිංචිව සිටින විශේෂ ගණයේ සංවිධානාත්මක අපරාධ කල්ලි නායකයකු වන කවිෂ්ක මදුශාන් නොහොත් චතු මල්ලි නමැත්තාගේ මෙහෙයවීම යටතේ බොරැල්ල, ලෙස්ලි රණගල මාවත ප්‍රදේශයේ පිහිටි නි‍ෙවසක් තුළ මහා පරිමාණයෙන් ලැබෙන හෙරොයින් මත්ද්‍රව්‍ය කොටස්කර බෙදා හරින බවට ලද රහසිගත තොරතුරක් මත වැටලීමක් සිදුකර එකම පවුලේ පියා සහ පුතු වන වනාතමුල්ලේ මාළු සමන්ත සහ චෝලේ නමැත්තා ඩයිඇස්ටයිල් මෝෆින් හෙවත් හෙරෝයි ග්‍රෑම් 50 මිලිග්‍රෑම් 630ක ප්‍රමාණයක් සමඟ අත්අඩංගුවට ගත් බව කොළඹ අපරාධ කොට්ඨාසයේ නිලධාරීන් පවසයි.
අත්අඩංගුවට ගත් හෙරොයින් මත්ද්‍රව්‍ය තොගයේ වටිනාකම රුපියල් ලක්ෂ පහළොවකට පමණ ආසන්න බවත් ඩුබායි රටේ සිට විවිධ අන්තර්ජාල තාක්ෂණික ක්‍රම ඔස්සේ මත්ද්‍රව්‍ය ජාවාරමේ නියැළෙන විවිධ පුද්ගලයන් හරහා කොළඹ සහ කොළඹට තදාසන්න ප්‍රදේශ තුළ බෙදාහැරීම සඳහා ලබා දෙනු ලබන හෙරොයින් මත්ද්‍රව්‍ය කොටස් කර කුඩා පැකට් ලෙස සකස් කර බෙදාහැරීමේ කටයුතු අත්අඩංගුවට පත් පියා සහ පුත්‍රයා විසින් සිදුකර ඇති බවද සිදුකළ මූලික විමර්ශනවලදී අනාවරණය වූ බවත් පොලිසිය පවසයි.
පොලිසියේ උකුසු ඇසට වැලි ගසා සුජීව සමන් කුමාර නොහොත් (54) හැවිරිදි මාළු සමන්ත නමැත්තා සහ ඔහුගේ පුත්‍රයා වන හර්ෂ දුෂාන්ත 
නොහොත් (33) හැවිරිදි චෝලේ නමැත්තා ඉතා දීර්ඝ කාලයක් තිස්සේ මෙම ජාවාරම සිදු කරගෙන ගොස් ඇති බවට සිදුකළ ප්‍රශ්න කිරීම්වලදී තොරතුරු අනාවරණය වූ බවද පොලිසිය පවසයි.
අත්අඩංගුවට පත් සැකකරුවන් දෙදෙනා බොරැල්ල පොලිස් වසමේ ලෙස්ලි රණගල මාවත ප්‍රදේශයේ ස්ථිර පදිංචිකරුවන් බවත් පොලිසිය වැඩිදුරටත් සඳහන් කළේය.
අත්අඩංගුවට ගත් සැකකාර පියා සහ පුත්‍රයා (27) වන දින මාලිගාකන්ද මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
සිද්ධිය සම්බන්ධයෙන් වැඩිදුර පරීක්ෂණ කොළඹ අපරාධ කොට්ඨාසයේ අධ්‍යක්ෂ සහකාර පොලිස් අධිකාරී නෙවිල් ද සිල්වා මහතාගේ සෘජු අධීක්ෂණය මත කොළඹ අපරාධ කොට්ඨාසයේ ස්ථානාධිපති ප්‍රධාන පොලිස් පරීක්ෂක ඇනස්ලම් ද සිල්වා මහතාගේ උපදෙස් සහ මෙහෙයවීම මත කොළඹ අපරාධ කොට්ඨාසයේ බස්නාහිර පළාත් දූෂණ මර්දන අංශයේ ස්ථානාධිපති උප පොලිස් පරීක්ෂක රාජපක්ෂ මහතා ඇතුළු නිලධාරීන් විසින් සිදු කරනු ලබයි.
සමීර අබේසිංහ - නුගේගොඩ සමූහ බණ්ඩාරගම - බිමල් ජයසිංහ