හෝටලයක් සම්බන්ධයෙන් බුත්තල පොලිස් ස්ථානයට කර ඇති පැමිණිලි ගැන නිසි විමර්ශන සිදු නොකරන බව හා පක්ෂග්‍රාහීව පොලිසිය කටයුතු කරන බව සඳහන් කරමින් මඩොල්සිම පොලිසියේ සේවයේ නිරත ප්‍රධාන පොලිස් පරීක්ෂකවරයෙක් තම නිවෙස ඉදිරිපිට අට්ටාලයක් ඉදිකර පවුලේ සාමාජිකයන්ද සමඟ පෙරේදා (04) සිට උපවාසයක් ආරම්භ කර තිබේ.
මෙසේ උපවාසයක් ආරම්භ කර ඇත්තේ මඩොල්සිම පොලිසියට අනුයුක්තව සේවය කරන විශ්‍රාම යෑමට පූර්ව නිවාඩු ලබා සිටින ප්‍රධාන පොලිස් පරික්ෂක එම්.එල්.ඩී.රංජින් මහතා සහ ඔහුගේ මව හා බිරියයි. බුත්තල 11 කණුවේ පිහිටි සිය නිවස ඉදිරිපිට අට්ටාලයක මෙසේ උපවාසයක් අරඹා ඇත්තේ සිය සහෝදරයකු වන ශ්‍රී ලංකා යුද හමුදාවේ කර්නල් වරයකු සමඟ ඉඩම් ආරවුලක් සම්බන්ධයෙන් පවතින ගැටලුවකට බුත්තල පොලිසියෙන් සාධාරණය ඉටු නොවන බව කියමිනි. එමෙන්ම තමන්ට එරෙහිව අසත්‍ය පැමිණිලි කරන බවටද චෝදනා කරමින් මේ උපවාසය ආරඹා තිබේ. මෙම ප්‍රධාන පොලිස් පරීක්ෂකවරයා ඔහුගේ සහෝදරයා වන කර්නල්වරයාගේ හෝටලයකට අලාභහානි සිදුකිරීම සම්බන්ධයෙන් මීට පෙර අත්අඩංගුවටගෙන රක්ෂිත බන්ධනාගාර ගතකර සිට ඇපමත මුදාහැර සිටින අයෙකි. බුත්තල පොලිසියේ උසස් නිලධාරීන් විසින් තමාට අගතිදායක ලෙස විමර්ශන සිදුකිරීම සහ විරුද්ධ පාර්ශ්වයට පක්ෂග්‍රාහී ලෙස කටයුතු කිරීම හෙළා දකිමින් මෙම උපවාසය අරඹා ඇත. පොලිසියෙන් සාධාරණය ඉටුවනතෙක් උපවාසය අඛණ්ඩව සිදුකරන බව ඔහු පවසයි.
