යක්කල පොලිසිය විසින් ඉකුත්දා රාත්රියේදී සැක කටයුතු ලෙස ගමන් කරමින් සිටි පුද්ගලයකු අත්අඩංගුවට ගෙන පරීක්ෂා කිරීමේදී ඔහු සන්තකයේ තිබී අයිස් මත්ද්රව්ය මිලිග්රෑම් 6500ක්, විදේශ මුදල් හා රන් භාණ්ඩ තොගයක් භාරයට ගත් බව යක්කල පොලිසිය පවසයි.
අත්අඩංගුවට ගත් සැකකරු අධිකරණ නියෝගයෙන් සතියක කාලයක් රඳවාගෙන ප්රශ්න කිරීමෙන් අනතුරුව අධිකරණයට ඉදිරිපත් කිරීමෙන් පසු ඔහු ලියාපදිංචි අපරාධකරුවකු බවට තොරතුරු අනාවරණය වී ඇත. ඔහු රත්නපුර, ඇහැලියගොඩ, පැල්මඩුල්ල, අවිස්සාවේල්ල හා ගම්පහ යන ප්රදේශවල නිවාස බිඳ දේපොළ සොරකම් කිරීමේ චෝදනා රැසක් සම්බන්ධයෙන් අත්අඩංගුවට ගෙන ඇප මත මුදාහැර සිටින බවත් ඔහුට වරෙන්තු හයක් නිකුත්ව තිබෙන බවත් ඉහත කී ප්රදේශවල පොලිසිවලට අවශ්යව සිටින පුද්ගලයෙකු බවද මෙහිදී අධිකරණය හමුවේදී පොලිසිය ප්රකාශ කර සිටියේය.
කොළඹ ග්රෑන්ඩ්පාස් ප්රදේශයේ පදිංචිකරුවකු වන තිස්වෙනි වියෙහි පසුවන සැකකරු මැයි මස 17 වැනි දින දක්වා රිමන්ඩ් භාරයට පත් කළ මහේස්ත්රාත්වරිය ඔහුව මැයි 06 වැනි දින අවිස්සාවේල්ල අධිකරණයටත් මැයි 13 වැනි දින ගම්පහ අධිකරණයටත් ඉදිරිපත් කරන ලෙසට බන්ධනාගාරයට නියම කළාය. යක්කල පොලිසියේ නිමල්සිරි මහතා පැමිණිල්ල ඉදිරිපත් කළේය.