පැනමා රාජ්‍යයේ එළැඹෙන මහමැතිවරණයේදී ජනාධිපතිවරයා ලෙස පත්වීමේ වැඩිම වාසිය අත්කරගෙන සිටි හිටපු ජනාධිපති 73 හැවිරිදි රිකාඩෝ මාටිනෙලිගේ අපේක්ෂකත්වය එරට මැතිවරණ කොමිසම ඉවත දමා ඇතැයි විදෙස් මාධ්‍ය වාර්තා කළේය. එවැනි පියවරක් ගෙන ඇත්තේ මුදල් විශුද්ධිකරණ චෝදනා එල්ල වී සිටි හිටපු ජනාධිපතිවරයාට පසුගිය වසරේදී එරට අධිකරණයෙන් වසර 11ක සිර දඬුවම් නියම කර තිබීම හේතුවෙනි.
හිටපු ජනාධිපතිවරයා වෙනුවට මෙවර මහමැතිවරණයේදි ජනාධිපති අපේක්ෂක ලෙස මාටිනෙලි රජයේ හිටපු අධිකරණ ඇමැති ජොස් රාවුල් මුලිනෝ පළමුවරට එම ධුරයට පත්වනු ඇතැයි ද අනාවැකි පළ වී තිබේ. මෙවර පැනමා මහමැතිවරණයේදී ජනාධිපති සටනට අපේක්ෂකයන් අටදෙනකු ඉදිරිපත් වී සිටින බවත්, පළමු වටයේදී වැඩිම ඡන්ද ප්‍රමාණයක් ලබා ගන්නා අපේක්ෂකයා පැනමා රාජ්‍යයේ මීළඟ ජනාධිපති ලෙස ලබන ජූලි මස 1 වැනිදා දිවුරුම් දෙනු ඇති බවත් වාර්තා වේ.
